ْاَلْ بٌودْكَاست

الحلقة بتعاون معا MAVEN creative house

الحلقة طناش (اَلْ بُودْكَاستْ ) مع صديقنا زياد الورفلي وحلقة المتغربين هذه كانت فيها مشاركة من صديقنا معتصم الشمام، كانت تهدريزة شبابية ضحك، بداية الحلقة على كيف ممكن تكون متغرب في بلادك بعد ماترجع، وكيف طريقة تكوين الروابط الاجتماعيه في العيشا برا، وكيف تقدر تتأقلم مع مجتمع تاني مختلف عليك مع وجود العوائق اهمها عائق اللغة، وهدرزنا على ماليزيا وتقسيمها الثقافي بتعمق، والمعيشه فيها شن موضوعها، وتكلمنا على سنغافوره والمطارات والفرق بيناتهم وموضوع الترانزيت، وتكلمنا على السياحة في شرق اسيا، هدرزلنا زياد على قصته الي مسميها جاكرتا قصة معبيه اكشن شد روحك، وتكلمنا على الفروقات في المعيشه بين مصر وماليزيا، وحكالنا زياد كيف تعرف علينا، وهدرزنا على العُرف في الاعراس في ليبيا، والاعراس في ماليزيا ومصر، وتكلمنا مع معتصم وزياد على تجربتهم في تكوين علاقات في مصر سوا كانت مصريه او ليبية، وتكلمنا على اختلاف اهتمامات الشعوب، وعطانا زياد من وجهة نظره شن النصائح للشخص ماشي يبي يقرا في ماليزيا، وتكلمنا على الطبقية في مصر، وسوق العمل في مصر، ونهاية الحلقة تكلمنا على البزنس وفرص العمل في ليبيا.

تاسع حلقات (اَلْ بُودْكَاستْ ) مع ضيفنا الدكتور حسين الهادي، اخصائي امراض العقم، ومتخصص في الطب الرياضي، الحلقه هيا اقل مايقال عليها انها للعقول الكبيرة والقلوب القوية كان مش قدها فوتها شد روحك معناها، تفرعنا لهلبا مواضيع سواء كانت في الطب او حاجات ثانيه، في البداية تكلمنا على انواع التخصص في الطب، وطريقة التعامل مع المريض، وتعمقنا في تخصص العقم وانواعه واسباب العقم وعلاجه، وشن انواع مرض الدوالي واسبابه، وتكلمنا ببساطة على الفراغ وشن يسبب، وانواع المواهب وضروري عمل شيء يفيد المجتمع، وتكلمنا على العمل كيف انه عباده وعلاش ربي خلقنا ومشكلة الالحاد عند العرب وانتشار الاسلام عند الغرب، وشن صاير مع الاسلام حالياً في العالم، تكلمنا على معجزات القرآن العلمية، وهدرزنا على الاحاديث النبوية، وتكلمنا على السفر وفوائده، وهدرزنا على حكم في العالم، وكيف متكون النظام السياحي وكيف ممكن تخلقه في ليبيا، وهدرزنا على اهمية الصلاة وعواقب انك ماتصليش, وهدرزنا على الشرع في الدين، وتكلمنا انحراف معنى كلمة حُريات، وتعمقنا في موضوع كيف انه ابليس مسيطر على الناس وكيف خاش في حاجات الي صايره في العالم حالياً، وشن قصة التفاحة التي تبثت انه ابليس انه قاعد هني، هدرزنا على شن قصة تابوت الرحمة والسلام الي مذكور في سورة البقرة، وتكلمنا على قوة جهاد النفس، وعطي معلومات على اضرار هرمونات كمال الاجسام، وكيف يزيد هرمون التيستوستيرون بطريقة الطبيعية، وهدرزنا على قصة المؤامرة كيف انه يبو ينقصو التعداد السكاني اللأرض، وتفرعنا على مشاكل. خصوصيات الزواج، وتكلمنا على كيف يبو يتحكمو في هرمونات الاجيال مش يصنعو جيل مرخي، وناقشنا موضوع تأثير الأفلام الإباحية، وتكلمنا على رحلة حسين معا الكشاف وشن الإيجابيات الي خذاها منها، واهمية لازم التغير مش الثبات على حاجة معينة، وتكلمنا علي كيف تحافظ على الصداقة معا صحابك، وتكلمنا على فهم معنى العشره، وتعمقنا في موضوع الحسد وكيف تعرف الحاسد وكيف تتجنبه، ونهايتها والخلاصه نحبك وحش، وتفتح عقلك واستفتي قلبك وافهم الامور من اكثر من وجهة نظر.

سابع حلقات (اَلْ بُودْكَاستْ ) مع ضيوفنا الشباب المبدعة ال Artists المهندس علي بوشقيفا (البوشقا) و المهندس سالم النايلي (بوبزي)، وفي ضيف شرف في نهاية الحلقة صديقنا الرسام امين العالم، الحلقه كانت فيها هلبا معرفه وحقائق في واقعنا وتقدير للهوية الليبية ومعبيه بالتجارب، في البداية تكلمنا على المظهر الخارجي للشاب وتأثيره عليك من كل ناحية، وهدرزنا معا البوشقا علي مجاله في رسم الجرافيتي (رسم على الحيوط) وثقافة النوع هذا من الرسم، وتكلمنا على ألبومه (بطاقة الشخصيه) ونوع الموسيقى الي يدير فيه ، وهدرزنا بصفه عامه على الهوية بتاعك كيف تقدر ادخلها في المجال بتاعك ، وهدرزنا مع البوب في مجال التصميم الداخلي وكيف تخلي البصمه بتاعك على الشي الي تخدم فيه، وكيف ممكن تأثر البيئة المحيطه عليك منذ الصغر على الشي الي ادير فيه، وناقشنا موضوع شن هما اساسيات انك تكون احسن نسخة من روحك، وتكلمنا على السفر وإيجابياته، واهمية الثقافة والتنوع و الحفاظ على الهويه بتاعك، وتعمقنا بموضوع التجاره وعالم الاعمال وسوق العمل والتسويق وانواعه والسوق الليبي، وهدرزنا على العلاقات بالبيئه المحيطة وتأثيرها عليك، وفي الختام هدرزنا على ضبظ العقلية وكيف تقاوم الضربات الي تجيك وقالك من اراد العسل تحمل لدغ النحل.

سادس حلقات (اَلْ بُودْكَاستْ ) مع ضيفنا المخرج و الكاتب أَمْجَد المَرِيمِي، حلقه كانت فيها معرفة ومتعة هلبا لو كنت مهتم بمجال السينما وصناعة الأفلام والمسلسلات، تكلمنا في الاول على السينما الليبية وبدايتها، وهدرزنا على التلفيزيون الليبي وشن هما المسلسلات الكويسة في الساحة، وفي حاجه حصريا هدرزنا فيها معا امجد الي هيا جانب من قصة فيلمه الي حيديره(ثلاثة برانية)، تكلمنا على معنى كلمة الاخراج وشن وظيفة المخرج، وشن هما الكوادر الي محتاجها مش تقدر ادير فيلم او مسلسل، والمشاكل الي تواجهك في انتاج الافلام، هدرزنا على السينما العالميه وتاريخها وتطورها، تكلمنا على الفرق بين المدرسه الفرنسيه والامريكيه، وتكلمنا على الساحة العربيه بصفة عامة، و في الختام تكلمنا علي شن عيوب الساحة الليبية وكيف ممكن تقدر تتحسن وتتطور، والسينما هيا الفن الذي يجمع جميع الفنون على قولت أمجد.

خامس حلقات (اَلْ بُودْكَاستْ ) مع ضيفنا البروديوسر بِيجْ سِينُو الي يعتبر من اقدم الأشخاص في صناعة الموسيقى في ليبيا وكانت التهدريزه الجميله هادي بمشاركه ضيوف الشرف البروديوسرز العلو والتيكا، تكلمنا في اول الحلقة على بداية البيج سِينُو في مجاله وحبه للثقافة الراب والهيب هوب وكيف اطور الموضوع معاه، وهدرزنا على الفن بصفه عامه في ليبيا وخارج ليبيا، وكيف ان الشغف اهم شيء في صناعة الشيء الي تحبه، درنا دوره عميقة على معظم السينات سواء كانت غربيه او عربية ودوره حلوا ايضاً على السين الليبي، وتكلمنا حتى على اليوتيوب ومحتواه والفرق بين البلدان في المنصة هادي، و في الختام تكلمنا علي اسباب ضعف المشهد الموسيقي الليبي ومواكبته للتطور الي صاير في العالم وكيف ممكن يتغير الضعف هذا.

ثاني حلقات (اَلْ بُودْكَاستْ ) مع ضيفنا الفوتوغرافي والدكتور سِرَاجُ الدِينْ عَرابْ هدرزنا في الحلقه علي مواضيع تشدك لو انت مهتم بالحضارات والثقافات والأساطير على مر العصور و هدرزنا ايضاً علي اهمية وجود شغف في حياتك و كيف كانت رحلته مع التصوير والطب، وشن هيا المصاعب الي واجهت سراج وكيف قدر يتغلب عليها.