Filtra per genere
- 56 - بعدك زعلانة؟ لاء، عطيت وقت لمشاعري وهلّق صرت أحسن
ليش مهم نسمح لولادنا يحزنوا وما نتسرّع ونحاول نتحكّم بمشاعرهم لنوقّف الشي لي عم يشعروا فيه إن كان خوفاً عليهم أو إن كان لأنو كان معنا وقت لمشاعرهم؟ قدي مهم نعلّمهم يواجهوا ويقولوا الحقيقة للشخص لي زعجهم ليكبروا صادقين مع حالهم؟ قدي مهم أطفال غزّة اليوم بكل لي عم يمرّوا فيه من قساوة نسمحلهم كمان يزعلوا ويبكوا ويأخدوا كل وقتهم وما نحطلّهم براسهم ولا براس أي طفل إنو خليكم اقوياء كرمال كرامتكم. خلينا نختار نمنح أطفالنا حقهم بالحزن! تابعوا معي هيدي الحلقة الجديدة من بودكاست 'بكل حب'.
Sun, 04 Feb 2024 - 55 - وقت كنتو زغار ما كنت شيل ولا غرض من قدامكم! كم مرّة سمعتوا هالجملة؟
وقت كنتوا زغار ما كنت شيل ولا غرض من قدامكم. البيت كان يضلّ مرتب، نضيف، ما كنتوا تمسكوا منفضة. كم مرّة سمعتوا هالجملة من أهاليكم؟ وقدي خلق هالشي ميل لكل شي يكون مثالي وكامل بحياتكم وقدي بتقسوا على حالكم إذا ما كان كل شي كامل ومثالي؟ ليش مهم نسمح للطفل يعيش حياة حقيقية وحيوية بالبيت مع رسم حدود صحية؟ قدي في وجع وألم بغزّة اليوم وقت الأهل لي فقدوا أطفالهم عم يشتاقوا لحضورهم ووجودهم وكل الفوضى لي ممكن يخلقوها بالبيت؟ قدي ممكن نتعلّم المرونة مع حالنا ومع أطفالنا ونسمح للقصص تكون حقيقية وطبيعية بعيداً عن المثالية والكمال؟ تابعوا معي هيدي الحلقة الجديدة من بودكاست 'بكل حب'.
Sun, 28 Jan 2024 - 54 - كيف منربّي جيل بيعرف ياخد مواقف إنسانية؟
وعّتني بنتي من كم يوم لتخبرّني عن شي صار معها من سنة وزعجها كتير وقدرت بوقتها تعبّر عن موقفها بحزم. هيي وعم تحكي ذكّرتني بكتير مواقف منتربّى فيها على الخوف من إنو ناخد موقف صح. قدي مهم نسمح لأطفالنا يسمعوا لحدسهم، ومشاعرهم، ويميزوا بين المقبول وغير المقبول، ويشوفونا عم ناخد مواقف عادلة قدامهم لننمي عندهم حس الإنسانية والعدالة وليتعلّموا بدورهم يكون عندهم رأي ومواقف إنسانية عادلة؟ تابعوا معي هيدي الحلقة الجديدة من بودكاست 'بكل حب'.
Sun, 21 Jan 2024 - 53 - سألتني بنتي إذا تم تدمير كل شي بفلسطين وقتلوا كل الناس لي بتعمّر بيوت مين بيرجع يعمّر؟
بطريقة كتير بريئة وصادقة سألتني بنتي هيدا السؤال وأخذني دقايق لإقدر جاوبها واشرحلها على قد عمرها انو صحيح في وجع ودمار واشيا مؤلمة عم تصير، رح يضلّ في مكان للحلم بفلسطين حرّة وعم ترجع تتعمّر ! كيف منساعد الأطفال اليوم يؤمنوا بتحقيق بأحلاهم وبفلسطين متحررة من كل هالظلم؟ تابعوا معي هيدي الحلقة الجديدة من بودكاست 'بكل حب'.
Sun, 14 Jan 2024 - 52 - كيف منعلّم ولادنا يقدّروا قيمة أي شي بالحياة؟ من خلال تعزيز الإمتنان بقلوبهم
ابني ما بيعجبه شي؟ بنتي شو ما اشتريتلا ما بتقدّر شي؟ ولادي ما عم يعرفوا قيمة شو عم نقدملّهم، كل لي عندهم ياه هلّق ما كان عنا ياه بعمرهم! لأنو كنتوا شاطرين أخذناكم هالمشوار. قلت شكراً لتيتا وجدو ؟ مع بداية هيدا العام كيف منخلق تغيير عند أطفالنا من خلال تعزيز التقدير الإمتنان الحقيقي والعفوي بقلوبهم؟ تابعوا معي هيدي الحلقة الجديدة من بودكاست 'بكل حب'.
Sun, 07 Jan 2024 - 51 - كل عام والأطفال أحرار، محميّين، غير مبرمجين، صوتهم مسموع وبصيرتهم مفتوحة
بليلة راس السنة، أمنيتي الأطفال يكبروا بأمان، يكونوا دايماً محميين، حقوقهم محفوظة، أحرار بفكرهم، غير مبرمجين، صوتهم مسموع، بصيرتهم مفتوحة ومحبوبين من دون تمييز وأجندات وحسابات وشروط. نحنا وعم ننهي سنة ونبدا سنة جديدة مع أطفالنا مهم جداً نذكرّهم بالوقوف الدايم مع الحق بوجه الظلم. نحنا وياهم نضوي شمعة لأطفال فلسطين والسودان وجنوب لبنان ونبعت من قلبنا حب ونور وسلام! بهيدي الليلة لي معظم الناس فيها ملتهية بالإحتفالات، قدي مهم نختار نخصص وقت حقيقي وصادق لأطفالنا ونخبرهم قدي ممتنين إلهم، قدي فخورين فيهم متل ما هني، وقدي بيهمنا يكونوا عم يعيشوا حياتهم بفرح، وبصدق وبتناغم من دون الحاجة للعيش تحت أي ضغوطات لنيل الرضا والقبول والتقدير؟ تابعوا معي هيدي الحلقة الجديدة من بودكاست 'بكل حب'.
Sun, 31 Dec 2023 - 50 - بليلة عيد الميلاد، حب كبير لكل طفل موجوع وحيد
بليلة عيد الميلاد، بتمنى نتذكر انو بلحظات الاحتفالات الكبيرة؟ في أطفال عم تنقصف بكل دقيقة وفي أطفال وحيدة وموجوعة وخسرت كل شي بيعطيها الأمان والدفا. بكل حب بتمنى نمنح ولو ٥ دقايق من وقتنا نبعت فيها نية حب وسلام لقلب كل طفل موجوع ووحيد الليلة. تابعوا معي هيدي الحلقة الجديدة من بودكاست 'بكل حب'.
Sun, 24 Dec 2023 - 49 - وسط تحضيرات الأعياد، كيف مننمّي حسّ الإنسانية عند أطفالنا بعيداً عن اللامبالاة والذنب؟
بين مش قادرين نعيّد ولا بدنا نعيّد ولا نحتفل أو عم نحاول بس كرمال ولادنا وبين لا والله بدنا نعيّد، ونعيش، تعبنا وهيدي الحرب مش عنا ونحنا أصلاً ما بدنا الحرب.. شو منقول لأطفالنا وكيف منمّي فيهم الإنسانية، وروح العيد الحقيقية، وحس التعاطف الحقيقي بعيداً عن الإنقسام والإنفصال واللامبالاة والحرمان والذنب والشفقة؟ تابعوا معي هيدي الحلقة الجديدة من بودكاست 'بكل حب'.
Sun, 17 Dec 2023 - 48 - ليش ما بتبعتوا بنتكم عالمدرسة؟ لعدّة أسباب وكرمال ما تتعلّم التاريخ والجغرافيا غلط
إذا قدام عيوننا عم يحاولوا اليوم يغيروا ويكذّبوا لي عم يصير بفلسطين كيف بدنا نختار نصدّق كل شي علّمونا ياه بالكتب والمناهج عن التاريخ والإحتلال والإستعمار؟ وين دورنا اليوم كأهل نختار يكون عنا دور بشو عم يتعلّموا ولادنا ونرفض نسمحلهم يحفظوا تاريخ وجغرافيا عن غايب ومن دون مساءلة بس ليجيبوا علامة منيحة ! وين دورنا بالحفاظ على بصيرة أطفالنا مفتوحة؟ تابعوا معي هيدي الحلقة الجديدة من بودكاست 'بكل حب'.
Sun, 10 Dec 2023 - 47 - كيف شرحت المقاطعة لبنتي لي عمرها ٧ سنين؟
كيف اخترت اشرح لبنتي لي عمرها ٧ سنين عن مبدأ المقاطعة بشكل بسيط جداً وعلى قد عمرها وسمحتلا تكون عم تحافظ على وعيها وبصيرتها وإرادتها الحرّة لتقدر تكون عم تكبر وتميّز صح وبوضوح وتقدر تحافظ على الحق من خلال صوتها ورأيها الحر ! تابعوا معي هيدي الحلقة الجديدة من بودكاست 'بكل حب'.
Sun, 03 Dec 2023 - 46 - ننزل لعند طفلنا ونغمره ونكرّر حتى لو غلّط هيدي مش عادات من الغرب، هيدا إسمه أمان وحب
"من نظرة وحدة إبني بيجمد بأرضه وبيسكت! كلمة وحدة وما بعوز عيدها ولادي بيسمعوا الكلمة! جيل اليوم كتير مدلل ومغنّج وما عم نقدر نهدّي.. هيدي تربية الغرب لازم نقاطعها وهيدي موضة التربية الحديثة لازم نرفضها ومن شو بتشكي طريقة أهالينا؟ ليك كيف كبرنا ما بنا شي وما بحياتو طلع صوتنا ومنخاف من أهلنا ومنحترمهم." كم مرّة سمعتوا هيدي الجمل أو يمكن كررتوها؟ بين طفرة الوعظ والكوتشينغ من دون وعي وموجة المسخرة على موضوع التربية الحديثة، انتشرت مؤخراً عدة آراء حول إنو نكرر للطفل، ننزل لعندو إن كان غلّط أو عم يصرّخ كتير ويبكي وننظر بعيونو ونعطي مساحة أمان هي عادات من الغرب لازم نقاطعها. بالحقيقة هيدي ما اسمها تربية حديثة، اسمها تربية لطيفة وعن وعي وهيدي لا عادات غربية ولا عادات شرقية هيدي اسمها خلق مساحة أمان وحب وتفهّم وتصحيح للأمور عن وعي وبكل حب. هل فعلاً نحنا كنا عم نسمع الكلمة من مكان احترام أو من مكان خوف ورعب؟ تابعوا معي هيدي الحلقة الجديدة من بودكاست 'بكل حب'.
Sun, 26 Nov 2023 - 45 - بمناسبة اليوم العالمي للطفل، هل فعلاً كل أطفال العالم بأمان وآخدين حقوقهم صح؟
بالحديث عن اليوم العالمي لحقوق الطفل لي بيصادف بكرا ب ٢٠ نوفمبر ومع كل لي عم يشهدوا أطفال غزة وفلسطين كلها هل فعلاً بعد في مصداقية بس تحكي المنظمات عن حقوق الطفل؟ هل فعلاً كل أطفال العالم بأمان وآخدين حقوقهم صح وبشكل عادل؟ تابعوا معي هيدي الحلقة الجديدة من بودكاست 'بكل حب'.
Sun, 19 Nov 2023 - 44 - سألت أطفال من كل الأعمار والجنسيات شو يعني سلام؟ هيك كان السلام بعيونهم
طلبت من صديقات وأصدقاء من مختلف الجنسيات يسألوا أطفالهم لي من مختلف الأعمار شو يعني سلام، وشو بيعنيلهم السلام؟ أجوبتهم كانت كتير معبّرة، مميّزة ومؤثّرة! شو هوي السلام بعيون أطفالنا؟ تابعوا معي هيدي الحلقة الجديدة من بودكاست 'بكل حب'.
Sun, 12 Nov 2023 - 43 - أطفال اليوم قادة المستقبل.. إذا بدنا تغيير وسلام خلينا نشوف كيف عم نربّي أطفالنا
إذا نحنا اليوم مزعوجين من كل شي عم يصير حوالينا وعم نشوف قادة ورؤساء دول عم يخذلونا وإعلام عم يضللّ ويتحيّز ويسكت عن الحق.. وإذا نحنا عن جد بدنا تغيير وسلام بهالدنيا خلينا نختار نشوف نحنا كيف عم نربّي أطفالنا لأنو أطفال اليوم هني قادة المستقبل! تابعوا معي هيدي القصة بحلقة جديدة من بودكاست 'بكل حب'.
Sun, 05 Nov 2023 - 42 - بالحرب أنا وزغيرة كنت إسرح بالغيوم لإشعر بالأمان، اليوم كيف منساعد أطفالنا؟
أنا وزغيرة لإنسى ألم الحرب كنت إسرح بالغيوم والنجوم واتخايل عالم أفضل وأجمل وكنت غوص بالكتب وعيش مغامرات مع الشخصيات لإشعر إني بمكان أفضل. اليوم بهيدي الحرب كيف فينا نساعد أطفالنا يهدأوا؟ كيف منقدر نخبرهم عن الشاكرات ونساعدهم يفهموا مشاعرهم يعبّروا عنها؟ تابعوا معي هيدي القصة بحلقة جديدة من بودكاست 'بكل حب'.
Sun, 29 Oct 2023 - 41 - سألتني بنتي مين فلسطين، ليش في حرب؟ وهل في شجر زيتون كفاية لكل بيت بفلسطين؟
أنا وزغيرة سألت مين فلسطين؟ وليش عم تقتلوا الفلسطينية ما حدا جاوبني؟ اليوم بعد ٤٠ سنة بنتي سألتني نفس السؤال وسألتني ليش عم يدمّروا الجمال ويدمّروا فلسطين؟ وفي شجر زيتون كفاية لكل بيت بفلسطين؟ شو جاوبتها وشو خبرتها عن فلسطين؟ كيف خبرتها عن الحرب من دون ما اخلق خوف ورعب بقلبها؟ تابعوا معي هيدي القصة بحلقة جديدة من بودكاست 'بكل حب'.
Sun, 22 Oct 2023 - 40 - ما بدّي إعتذر! هل لازم نجبر أطفالنا على الإعتذار؟
يلا قول Sorry لخيّك… إعتذري من رفيقتك فوراً.. روح قول pardon للتيتا، معكم ٥ دقايق تعتذروا من بعض وتحلّوا المشكل.. ما بدي إعتذر… وأنا ما عملت شي غلط… مش مزبوط أنا عملت هيك… هل لازم نجبر أطفالنا على الإعتذار؟ ليش خطأ نجبرهم يقولوا شي مش حاسّينو؟ كيف منعطيهم مساحة ووقت ليكون الإعتذار حقيقي وصادق من بعد ما يكونوا أخذوا مساحة للتعبير عن مشاعرهم وليفهموا لي صار ويقبلوا ويكون الإعتذار بمبادرة شخصية وصادقة منهم مش بالإكراه؟ تابعوا معي هيدي القصة بحلقة جديدة من بودكاست 'بكل حب'.
Sun, 08 Oct 2023 - 39 - ما بدهم يلعبوا معي… ما بدهم يكونوا رفقاتي
ما بدهم يلعبوا معي وما بدهم يكونوا رفقاتي هني من الجمل لي بيخلّوا كتير من الأهل يتألّموا ويغضبوا بس يسمعوا إنو طفلهم عم يشعر إنو متروك أو منبوذ. كيف فينا نساعد أطفالنا على تخطي هيدي المرحلة بشكل صحّي من دون الشعور إنهم أقل شأناً من غيرهم ومن دون فرض أي صداقة عليه؟ تابعوا معي حلقة اليوم الجديدة من بودكاست 'بكل حب.'
Sun, 01 Oct 2023 - 38 - أفضل وجبة سناك عالمدرسة هي الوجبة المحضّرة بحب مش للتباهي
بين مين بيحضّر وبيصوّر أفضل وجبة سناك للمدرسة ومن شو بتشكي ساندويش اللبنة الملشّلشة وساندويش الحلاوة المقرقحة: أفضل وجبة سناك عالمدرسة هيي الوجبة المحضّرة بحب مش للتباهي! كيف فينا نختار نحضر السناك الأنسب لأطفالنا بكل حب ومصداقية من دون التأثّر بالتراندات ومن دون الشعور بالتقصير أو بالعيب أو بالخجل إذا وجبة طفلنا مختلفة شكلاً ومضموناً عن وجبات باقي الطلّاب؟
Sun, 24 Sep 2023 - 37 - بسيطة بيبكي كم يوم وبيتعوّد.. بدِّكم تقسّوا قلبكم
أكتر جملة وأقسى جملة ممكن يسمعوها الأهل عند أول يوم بيروح فيها الطفل عالحضانة أو عالمدرسة هيي بسيطة بيبكي كم يوم وبكرا بيتعوّد وبدكم تقسّوا قلبكم! ليش مهم نوقف نستخدم هيدي النصيحة المؤلمة للطفل وللأهل؟ كيف فينا نختار نعطي كل الوقت اللازم لطفلنا كرمال مرحلة الإنفصال تكون مبنية على الترابط الصحّي وعلى الشعور بالأمان بعيداً عن الغصب والتهديد والمقارنات والرشوة والوعود وتحديد المهل كرمال ما بقى الطفل يبكي ويتعوّد بأسرع وقت ممكن؟ قدي مهم لإلنا كأهل وككبار كمان إنو ندعم بعض ونعطي حالنا كل الوقت والمساحة لي منحتاجهم لتخطَي هيدي المرحلة بشكل طبيعي وصحَي من دون الحاجة لكبت مشاعرنا؟
Sun, 17 Sep 2023 - 36 - مع الرجعة عالمدرسة، أهم من الشنطة الجديدة المعاملة اللطيفة
مع الرجعة عالمدرسة لي أهم من الشنطة الجديدة وكل القرطاسية الحلوة، هوي إنو نذكّر أطفالنا بأهمية قيمتهم الذاتية لي ما بتحددها لا الشنطة الجديدة ولا المقلمة القديمة ولا العلامة لي رح يجيبوها بالإمتحان. نذكّرهم بأهمية المعاملة اللطيفة والإحترام بين بعض كطلّاب شو ما كانت اختلافاتهم، بعدم معايرة بعضهم مين أغراضه أفضل وأجمل، مين الأقوى والأفضل، بعدم التنمّر، المشاركة بالتنمّر والتستّر عن التنمّر أو أي نوع من أنواع الإساءة الموجهّة إلهم أو للغير. ليش مهم نواكبهم ونحاورهم يومياً لنفهم شو عم يصير معهم خلال يومياتهم بالمدرسة؟ تابعوا معي هيدي القصة بحلقة جديدة من بودكاست 'بكل حب'.
Sun, 10 Sep 2023 - 35 - ما بدي إتصوّر! هل لازم نصوّر الأطفال وننشر صورهم من دون إذن منهم؟
ما بدي إتصوّر، مش عبالي إتصوّر اليوم، ما بحب حدا يصوّرني.. هل بتسمعوا لأطفالكم بس يقولولكم ما بدهم يتصوروا أو بتحبروهم يتصوّروا بالقوة لأنو اليوم تيابهم حلوين، عملوا شي مهضوم، اليوم عيد لازم نتصور مع تيتا وجدو، الكل عم يحط صورة هالعيد عالسوشيل ميديا ولازم نحنا كمان نحط صورة لو الطفل عم يبكي وما بدو؟؟ ومنزّل صورته عم يبكي!! هل فكرتوا شي مرة قدي مهم ناخد إذن من الطفل قبل ما نصوره وقبل ما ننشر ونشارك صورته ونراعي مشاعره ورغبته؟ وين خطورة يتم إستغلال الأطفال بفيديوهات ومحتوى مش لعمرهم ويتم تسويق هيك صفحات على السوشيل ميديا؟ وين مسؤوليتنا كأهل وكبار بإحترام عالم الطفل وعدم إقحامه بمواضيع مش لعمره إرضاءً لغرورنا، للتراند وللسعي خلف الشهرة؟ تابعوا معي حلقة اليوم الجديدة من بودكاست 'بكل حب.'
Sun, 03 Sep 2023 - 34 - إذا ما رح تمشي معنا بهيدي اللحظة، نحنا مغادرين من دونك
إذا ما رح تمشي معنا بهيدي اللحظة، نحنا فالّين من بلاك أو مغادرين من دونك.. وبيمشوا الأهل وبيتركوا الطفل بركي هيك بيتعلّم وبيتربّى وبيصير يسمع الكلمة وما يعاندهم ! هيدي الجملة مرعبة جداً لدماغ الطفل! هيدي آخر مرّة منضهر أو بجيبك تلعب هون… هيدي الجملة تهديد وترهيب وترك الطفل مع شعور بعدم الإستحقاق. أخّرتني على شغلي، أخّرتني الكل على كل شي، خربطت المشوار عالجميع، كلها كلمات بتخلق شعور بالذنب… وكل القصة إنو الطفل فرحان باللحظة ونحنا بلا ما ننتبه عم نحوّل الفرح لمشاعر تقيلة ولسلسلة معتقدات غير صحية! كيف فينا نتعامل بعبارات صحيحة مع الطفل بس يرفض يغادر مكان اللعب ويقدر يقتنع يغادر من دون صريخ وبكي وزعل ومن دون ما نحوّل المشوار لضغط نفسي على الجميع؟ تابعوا معي حلقة اليوم الجديدة من بودكاست 'بكل حب.'
Sun, 27 Aug 2023 - 33 - أنا كم مرّة قلت ما تعملوا هيك…
أنا كم مرّة قلتلّك هيدا الأغراض بالبيت مش لإلك وما تلعب فيها؟ أنا كم مرّة قلتلّك رح توقع؟ كم مرّة كررت إنو هيدي الشغلة خطرة وما تمسكها؟ ليه ما بتفهم ؟ شفت شو صار معك؟ انبسطت هلّق كيف خرّبتها؟ هالمرّة ما صار شي مرّة تاني بتؤذي حالك ما رح اطلع فيك لتتعلّم وتسمعني بس إحكيك! شي مرّة انتبهتوا قدي هيدي الجمل فيها ترهيب، وتخويف، وتخلّي وخلق شعور بالعار وبالذنب وكسر للثقة بين الطفل والأهل؟ كيف ممكن نشرح للطفل لنوجّهو صح ونقبل إنو بسيطة لو كررنا وتكون عباراتنا ونصائحنا بنّاءة ومساعِدة مش مدمّرة؟ تابعوا معي هيدي القصة بحلقة جديدة من بودكاست 'بكل حب'.
Sun, 20 Aug 2023 - 32 - إنتَ بطل.. إنتَ قبضاي.. ما عندي صبيان بيخافوا!
إنتَ بطل، إنتَ قبضاي، إبني رجّال، ما عندي صبيان بيخافوا، ليش عم تبكي متل البنات؟ أختك أزغر منك وما بتخاف، ليش تركتهم يضربوك؟ شدّ حالك، بدي ياك رجّال! سجّلوا كاراتيه بركي بيقوى وبيبطّل حسّاس… وغيرها كتير من الكلمات بتنقال للصبي إذا بكي أو خاف. كيف فينا نغيّرها ونصححها ونخلق مساحة آمنة للصبي يكون عم يعبّر عن مشاعره من دون معاقبته، تأنيبه، الحكم عليه أو الخوف عليه؟ تابعوا معي حلقة اليوم الجديدة من بودكاست 'بكل حب.'
Sun, 13 Aug 2023 - 31 - بنهار عيد ميلادي حابة ابعت رسالة حب
لأنو كل شي بيبدأ من طفولتنا ولأني تألّمت كتير بطفولتي وبمراهقتي نتيجة الرفض ولأني يومياً بشغلي وبجلساتي بستمع لكتير قصص بشوف فيها قدي في ألم جاية من الطفولة نتيجة غياب الوعي والحب غير المشروط، بعيد ميلادي اليوم حابة كون عم وجّه بكل حب رسالة حب. تابعوا معي هيدي القصة بحلقة جديدة من بودكاست 'بكل حب.'
Sun, 30 Jul 2023 - 30 - هيدي اللعبة لإلي.. لاء لإلي… هل لازم نجبر الأطفال يشاركوا لعبتهم؟
كلنا تربينا على فكرة أهمية نشارك ألعابنا مع غير أطفال بالوقت لي فعلياً ما كان عبالنا إنو نتشارك بس عملنا هيك إرضاءً لرغبة الأهل، خوفاً من تهديداتهم أو من العقاب و حفاظاً على صورة جميلة وإيجابية أمام العالم ولو هالشي كان على حساب مشاعرنا. هل فعلياً من الصحّي نجبر أطفالنا يتشاركوا ألعابهم الخاصة أو أي لعبة معيّنة بمكان عام مخصص لألعاب الأطفال؟ تابعوا معي هيدي القصة بحلقة جديدة من بودكاست 'بكل حب.'
Sun, 23 Jul 2023 - 29 - وين مسؤوليتنا جميعاً بالحد من تعريض الأطفال للعنف؟
بعد لي صار مع الأطفال لي تم تعنيفهم وتعريض حياتهم للخطر داخل إحدى الحضانات بلبنان، وين مسؤولية المجتمع كلو بالعمل على تفادي إنو تتكرر هيدي الحوادث لي صارت أو لي عم تصير يومياً إنما بالسرّ أو عالسكت وبالحد من كافة أشكال العنف لي ممكن يكون عم يتعرّض إلها الطفل وين ما كان؟ تابعوا معي هيدي القصة بحلقة جديدة من بودكاست 'بكل حب.'
Sun, 16 Jul 2023 - 28 - كيف منحمي أطفالنا من التحرّش وكيف منتصرّف في حال حصل تحرّش؟
كيف ممكن نحمي أطفالنا من التحرّش الجنسي بكل أشكاله وكيف منتصرّف ومنحتضنهم ومنخلقلهم مساحة آمنة في حال تعرّضوا للإغتصاب أو لأي نوع من التحرّش المباشر أو عبر الإنترنت؟ تابعوا معي هيدي القصة بحلقة جديدة من بودكاست 'بكل حب.' بكل حب سلام ونور لروح الطفلة لين طالب ولروح كل طفل وطفلة فقدوا حياتهم نتيجة الإعتداءات الجنسية. كل الحب لكل طفل وطفلة ومراهق ومراهقة عانوا وبعدهم عم يعانوا من التحرّش، من الإغتصاب، من الإبتزاز ما حكيوا أو تم إسكاتهم. صار الوقت نبدأ نكسر حاجز الصمت حول الإعتداءات الجنسية بكل أشكالها. التستّر عن التحرّش والإغتصاب خيانة كبيرة للطفل وجريمة تانية وأكبر بحقه.
Sun, 09 Jul 2023 - 27 - ليه بنتك بتستحي هلقد؟
ليه ابنك أو بنتك بتستحي هلّقد؟ هل عم تسمعوا هيدي الجملة بس تكونوا بمكان عام مع أطفالكم وبيرفضوا أو بياخدوا وقتهم ليحكوا ويتفاعلوا مع الموجودين؟ هل يتجبروهم يحكوا أو بتعطوهم وقتهم ومساحتهم؟ وهل فعلاً إذا ما تفاعلوا هني أطفال خجولين؟ تابعوا معي هيدي القصّة بحلقة جديدة من بودكاست 'بكل حب'.
Sun, 02 Jul 2023 - 26 - ما بدي إلبس هول التياب وبدي كل كلسات لون
ما بدي إلبس هول التياب، وبدي إلبس كل فردة كلسات لون، وهيدا الحذاء بيزعجني، وبرتاح ضلّني حافية، وما بحب إنقل من التياب الشتوي للصيفي، وبحب كون بالتياب لي أنا برتاح فيهم. هل بتسمحولهم يلبسوا لي بيرتاحوا فيه أو بتجبروهم يلبسوا على ذوقكم حتى لو كانوا مزعوجين؟ تابعوا معي هيدي القصّة بحلقة جديدة من بودكاست 'بكل حب'.
Sun, 25 Jun 2023 - 25 - كم مرّة قلتلّك ما تلوّن برّا الزيح؟
كم مرّة قالولكم إنتو وزغار ممنوع أو غلط تلوّنوا برّا الزيح أو خارج الخطوط؟ وهل اليوم عم تقولوا الجملة ذاتها لأطفالكم؟ ليش مهم جداً ما نجبر الطفل كيف يلوّن، وأي لون يستخّدم وكيف يعمل الأشغال اليدوية وكيف ممكن هالشي ينعكس عليه بس يكبر؟ تابعوا معي هيدي القصة بحلقة جديدة من بودكاست 'بكل حب.'
Sun, 18 Jun 2023 - 24 - ليه ما فيني آكل غزل البنات؟
ليه ما فيني آكل غزل البنات؟ وليه بيعملوا إشيا ملوّنة ومغلّفة بعلب ورسومات وألوان ملفتة ومغرية للأطفال وهيي مش صحية؟ كرمال يخدعولنا دماغنا بأشكال حلوة ونحنا نصدق ونشتريها وهيي مؤذية لجسمنا؟ هيك سألت وعبّرت ياسمينا. أنا شو جاوبتها وكيف شرحّتلا عن غزل البنات وكل الأطعمة الإصطناعية والسكاكر الملوّنة؟ تابعوا معي هيدي القصة بحلقة جديدة من بودكاست 'بكل حب.'
Sun, 11 Jun 2023 - 23 - ليش سني تأخّر كتير ليطلع وباقي الأسنان طلعوا بسرعة؟
ليش سنّي لي نزل من فترة تأخّر كتير ليطلع وباقي الأسنان لي راحوا من قبل طلعوا أسرع؟ وليش عم ياخد وقت كتير هالمرّة؟ كتير أوقات أطفالنا بيشعروا بضرورة الإشيا تصير بعجلة ومفهوم الوقت لإلهم ما كتير بيكون واضح، وكتير أوقات نحنا ككبار وكأهل منستعجلّهم وبدنا كل مراحل النمو والمراحل التعليمية تصير بسرعة من دون الأخذ بعين الإعتبار وتيرة جسمهم وجهوزيتهم. كيف شرحتلّها مفهوم الوقت لبنتي بس ضلّت تسأل عن سنها لي أخد وقته ليطلع؟ تابعوا معي هيدي القصّة بحلقة جديدة من بودكاست 'بكل حب'.
Sun, 04 Jun 2023 - 22 - ليه ما فيني حط ماكياج هلّق وعلى أي عمر بقدر حط؟
ليش ما فيني حط ماكياج على وجّي وليه ما فيني حط مانيكير (طلاء أظافر) على ضفيري؟ وبس يصير عمري قدي بقدر حط؟ طيب وليش ما فيني استعمل علب الماكياج المعمولة للأطفال والموجودة بمحلّات الألعاب؟ من الطبيعي جداً بناتنا الزغار يشعروا إنو عبالهم يحطوا ماكياج وطلاء أظافر ويقلّدوا أمهاتهن وشو عم يشوفوا من حولهم. ليش من الأحسن ما نسمح بهالشي وكيف ممكن نشرحلهم وشو جاوبتها لبنتي بس سألتني عن هالموضوع؟ تابعوا معي هيدي القصة بحلقة جديدة من بودكاست 'بكل حب.'
Sun, 28 May 2023 - 21 - ما بدي دافع عن حالي.. يمكن يقولوا عني غير لطيفة
أوقات كتير منشعر بالخوف إذا اضطرينا نرسم حدود ونقول لا لشخص كل يوم عم يؤذينا ويجرحنا ومنصير خايفين عمشاعره أكتر من حرصنا على مشاعرنا. كيف منربي أطفالنا يعرفوا يدافعوا عن حالهم من دون الخوف من حكم الآخرين عليهم؟ تابعوا معي هيدي القصّة بحلقة جديدة من بودكاست 'بكل حب'.
Sat, 20 May 2023 - 20 - أنا بحب شعراتي كتير وما بدي قصهم!
أوقات بيكون ضروري ناخد قرار نحنا شايفينو الأنسب لخير أطفالنا بس هني مش قادرين يشوفوا هالقرار فعلاً مناسب يمكن لأنهم خايفين وهالشي جديد عليهم. حقهم أكيد يخافوا ونحنا دورنا نسمعلهم ونشرحلهم ونطمنهم. تابعوا معي هيدي القصّة بحلقة جديدة من بودكاست 'بكل حب'.
Sun, 14 May 2023 - 19 - يعني معقول تسمحي لبنتك ترسم على حيطان البيت؟
أوقات مننسى إنو كنا كلنا أطفال وبمراحل عديدة كلنا رسمنا على حيطان البيت أو كان عبالنا نرسم بس خفنا من القصاص واليوم بس صرنا أهل صرنا بدنا نقاصص أطفالنا كل ما رسموا عالحيط. - يعني معقول تسمحي لبنتك ترسملك على حيطان البيت؟ - نعم معقول. - كيف؟ تابعوا معي هيدي القصة بحلقة جديدة من بودكاست 'بكل حب.'
Sun, 07 May 2023 - 18 - في بنت قالتلي إنتي مش حلوة لأنو ما عندك أسنان
أوقات أطفالكم بيسمعوا عبارات وتعليقات كتيرة غير لطيفة عن جسمهم وعن مظهرهم الخارجي وهالأمر ممكن كتير يجرحهم ويزعجهم. بكل حب، كيف ممكن تعالجوا هيدا الموضوع؟ تابعوا معي هيدي القصّة بحلقة جديدة من بودكاست 'بكل حب'.
Sun, 30 Apr 2023 - 17 - خبّرت رفقاتي خبرية وضحكوا عليي
أوقات بيرجعوا أطفالكم عالبيت حزينين عم يخبروكم إنو شاركوا أصحابهم خبرية أو رأي وضحكوا عليهم أو سخروا منهم. بكل حب، كيف ممكن تستمعوا وتصغوا لإلهم وتمنحوهم مساحة آمنة للتعبير عن لي آلمهم وتساعدوهم على تخطي لي صار؟ تابعوا معي هيدي القصّة بحلقة جديدة من بودكاست 'بكل حب'.
Sun, 23 Apr 2023 - 16 - رسمتي أحلى من رسمتك
أوقات منشوف أطفالنا عم بيقارنوا حالهم مع غير أطفال أو عم يتنافسوا مين أنجز أفضل من التاني أو مين عندو ألعاب أو تياب أو أغراض أكتر أو مين الأفضل. كيف فينا نتصرّف بكل حب للحد من تربية أطفال عم يشعروا بحاجة دائمة للمقارنة والمنافسة وانعدام الأمان. تابعوا معي هيدي القصّة بحلقة جديدة من بودكاست 'بكل حب'.
Sun, 16 Apr 2023 - 15 - بنتي كسرت فنجان بحبو كتير
أوقات أطفالنا بيكسروا غرض كتير عزيز على قلبنا. كيف منقدر نتصرّف معهم بكل حب من دون أذيتهم نفسياً جسدياً وعاطفياً؟ تابعوا معي هيدي القصّة بالحلقة الأولى من بودكاست 'بكل حب'.
Sun, 09 Apr 2023 - 14 - عن البودكاستWed, 05 Apr 2023
Podcast simili a <nome>
- 8 Hour Binaural Beats 8 Hour Sleep Music
- La Venganza Será Terrible (oficial) Alejandro Dolina
- El Director - Invertir en Bolsa y finanzas Arnau Nogués
- Bloomberg Surveillance Bloomberg
- Deportes COPE COPE
- Tiempo de Juego COPE
- Daniel Martínez - Buenas Compañías Daniel Martínez
- El Estoico | Estoicismo en español El Estoico
- Fede Tessore - El Podcast Federico Tessore
- Podcast de Historia Deconstruida Gabriel Rodríguez
- Venganzas del Pasado Juan Schwindt
- Carlos Pagni en Odisea Argentina LA NACION
- Historia en Podcast Lucas Botta
- Libros para Emprendedores Luis Ramos
- Libros de Desarrollo Personal Nadia Benites
- Claudio Zuchovicki en Neura Neura
- Meditación Guiada Pérez.Mtz.Perla 2-1
- Audiolibros Por qué leer Por qué leer
- Psicologia Al Desnudo | @psi.mammoliti Psi Mammoliti
- Cuentos de medianoche Radio Nacional Argentina
- Historias de nuestra historia Radio Nacional Argentina
- Sueños eróticos Stefano Patricia
- The Go Radio Football Show Podcast thegoradiofootballshow
- Noticias Univision Univision