王桑一工 Awesome One Day 秀容來講

愛一个人敢有需要為伊犧牲學業？大學四年的矣，你敢會因為有身就放棄學業？欲按怎判斷查埔人是自私的？敢需要為家庭完全犧牲家己？查埔人若雄雄共你講欲佮你離婚，你會有啥物反應？你敢會共所有的罪攏怪家己？敢會否定家己？敢有朋友陪你講心事？你敢會共恁囝照實講？你敢會放無情的人煞？你敢會容允家己有新的戀情？你為家庭的犧牲青春、學業、身材了後，欲按怎重新共家己的自信揣轉來？你敢會感覺家己老矣，拍拚嘛無效矣？ -- Hosting provided by SoundOn

你敢有飼寵物？你較佮意貓仔抑是狗仔？你的爸母敢有贊成你飼動物伴？你有啥物經驗？萬物攏有性命的價值？你若無予厝裡的人重視你會按怎化解？欲按怎過正面的人生？若一時失志，你欲按怎莫去沐著無好的慣勢？欲按怎行出暗影？你一世人無放棄的是啥？敢會因為一隻貓仔的來改變人生？揣著人生的意義佮動力？ -- Hosting provided by SoundOn

人講人生無常，無常才是正常，無永遠的歡喜，嘛無永遠的悲傷。你敢捌聽過本底是喜事變喪事？千算萬算，毋值拄搪，拄著矣，心情款款咧嘛是愛照常生活，早日行出暗影。佇你欲生囝進前，你敢準備好勢、欲按做爸母矣？囡仔生落來了後，敢有影是照你原本設想的行？你敢是單親家庭大漢的人？抑是你目前是扞一个單親家庭？你有啥物應變的方法佮心情？ -- Hosting provided by SoundOn

你敢有舊情人？當初分手的原因是啥？分手了後敢有閣拄著？相拄的時家己的生活事業按怎？相逢敢有按怎、敢閣有感覺？你敢敢共現任的抑是恁某講？你敢會想欲佮舊情人閣愛一擺？你敢有贊成感情重來？你的親情朋友敢有人因為佮舊情人花袂清就家庭失和諧？ -- Hosting provided by SoundOn

恁兜啥人上重要？有可能攏重要。毋過若真正欲拚懸低，是阿爸抑是阿母較重要？若爸母做伙拍拚事業，啥人是董的？啥是正港的總管？啥人對外拚業務？對內的工課敢有影較輕考？等阿爸成功大趁錢的時，伊敢有感謝阿母背後的貢獻？你敢甘願因為一个看起來若幸福有愛家庭來委屈家己、欺騙家己佮社會？ -- Hosting provided by SoundOn

你敢會想欲發財？你敢會教你的囡仔按怎投資，按怎買保險？按怎莫予人騙去？人講生理人攏算贏，你敢捌予人騙去？欲按怎分辨真假、較袂予人騙去？世間騙子實在有夠濟，若發現予人騙去矣，欲按怎保護家己、降低損失？ -- Hosting provided by SoundOn

你敢有姊妹仔？恁的感情按怎？是衫褲公家穿？抑是物件袂使烏白動？你敢有姊妹仔伴？敢捌予姊妹仔伴出賣？因為你啥物攏講，伊啥物攏知，甚至奪你所愛？欲按怎雙方有站有節有邊界？冊教咱愛別人，哪會社會現實攏無仝？欲按無撙節較好咧？姊妹仔同根生，毋過啥物才會改變人生？ -- Hosting provided by SoundOn

你若是一个出名的人，你敢會驚老矣、無人欲看你矣？你敢會想講江山代有人才出，會予少年的拚過？你想欲做啥物款的資深的先輩？面對心內著傷、失去信心的囡仔，你欲按怎陪伴伊、安慰伊、解救伊？有當時仔囡仔無欲聽你的話，誤會你，你敢會感覺無奈，躇躊是欲管抑是毋管？你敢會放棄？抑是靜心等待時機？欲按怎予伊改變的力量佮勇氣？ -- Hosting provided by SoundOn

人生有足濟意外，上驚的是出人命。我攏共學生囡仔講，戀愛會使盡量談，愈談愈有經驗，毋過，袂當出人命。出人命有兩種意思：第一，若失戀，毋通予人無命抑是予家己無命。第二，若愛甲欲死，愛考慮予好勢，踏擋仔，抑是做安全的防備，愛會曉算日子，毋通有身，到時愛決定囡仔欲挃毋挃。結束一个無辜的性命，一世人攏會想著。迎接意外，想予好，順其自然。 -- Hosting provided by SoundOn

你的人生是彩色的？抑是烏白的？你拜一上班，敢會有Monday Blue，抑是你逐家攏足鬱卒？你敢有佮意你目前的生活？若準講有一工你的財產、地位攏無去，你會緊想辦法恢復過去的生活水準，抑是平平淡淡過後半世人？你敢有儉錢？抑是盡趁盡開，甚至借錢度日子？生活佮經濟的壓力，敢有可能共一个人逼甲起痟？你敢有自信你閣較按怎都袂鬱卒、袂起痟？ -- Hosting provided by SoundOn

你揀伴的時目睭敢褫有開？抑是目睭去糊著蜊仔肉？結婚進前知影對方心術無正，你敢會欺騙家己仝款嫁娶？抑是你會隨踏擋仔，解救家己？看起來好好的夫妻雄雄宣佈離緣，你敢會驚一趒？你敢有想欲離緣？抑是你予翁婿惜命命天子萬年？你閣欲假偌久？人生海海你敢會孤單？你敢會怨嘆？ -- Hosting provided by SoundOn

你敢有啥物代誌無知袂使？你敢有代誌莫知較好的經驗？抑是因為知影一件代誌了後，予你人生有無仝的體會？你敢相信人出世進前佇天頂就家己揀爸母矣？你對你目前的爸母敢有滿意？你敢有想過爸母對你敢有滿意？ -- Hosting provided by SoundOn

你敢看會出你拄著的是貴人？抑是小人？你敢會曉分好人、歹人？你感覺個性佮心性欲按怎分？你敢捌拄著好外才、漚腹內，人媠媠有喙水，久才知影是雙面刀鬼？你若有食虧過，敢會一改拄著蛇，三年驚草索？你敢了解世間本底就是有光、有暗，有善、有惡，人生無永遠的烏暗，囂徘無落魄的久？你敢有法度回復信心，堅持善良佮堅強？ -- Hosting provided by SoundOn

你自細漢的理想是啥？你這馬的頭路敢是你少年想欲做的？你的第一份工課是啥？你是重錢抑是重意義？你欲食啥物頭路，爸母敢攏有贊成？你的職業佮爸母的敢有仝？爸母的期待是啥物？你佇好額人的面頭前是啥物表情？敢有看重家己？抑是驚去得失伊？每一个職業做久會有彼款性格，你若是律師性格，你敢會足矜？一个足矜的人敢無浪漫的情懷？ -- Hosting provided by SoundOn

你是家己扞公司做頭家，抑是做人的辛勞趁薪水？你佇辦公室敢有定定看著頭家？若看著你敢敢和頭家講話？抑是予頭家叫去講話？看著頭家攏講袂出話？你佮同事的感情按怎？你敢有讚成辦公室的戀情？若真正雙方有感情，敢會影響恁的工課？敢有啥物問題？啥物款的頭家才是好頭家？ -- Hosting provided by SoundOn

你人生珍惜、要意的是啥？有的人重精神，有的重金錢。少年時代要意的，佮食老是無仝的，毋過，毋管啥物年歲，攏會追求被愛的感覺。查埔的要意的佮查某要意的無仝。查埔人無啥可能為查某人犧牲理想，毋過查某人閣較巧嘛會為對方犧牲，放棄一切。 毋管是理想抑是愛情，是欲堅持抑是放棄？是愛看啥物時機？先顧腹肚，才顧佛祖？。每一个人佮意、心動的理由無仝。心甘情願，心中有愛，人生較無遺憾。 -- Hosting provided by SoundOn

你敢有細漢佮你做伙大漢的初戀？是啥物原因離開？啥人對不起啥人？敢有共心內的話講出來、講清楚？抑是雄雄離開，無予對方解說的機會？分手的傷痕敢有影響你一世人？你是失戀檢討家己，重新出發？抑是檢討別人，對愛情失去信心？你是一改交一个，抑是一睏交幾若个？你的愛情觀是啥物？你按怎面對少年毋捌代誌的愛情？ -- Hosting provided by SoundOn

你這世人食甲上緊張的一頓飯是當時？是佮啥人食？是佮頂司食飯？是佮心愛的人食？抑是佮見對方的家長？兩人的交往上重要的是啥？感情？抑是家庭？你感覺你是強勢族群，抑是弱勢？眾人認為的強勢敢有影強勢？弱勢敢有影弱勢？你敢捌聽過弱欺強，下司欺侮頂司，學生佮家長創治老師的代誌？ -- Hosting provided by SoundOn

你是相親抑是自由戀愛？你是家己逐著恁某恁翁，抑是人安排的？你敢會主動佮人接接？你講話敢有人欲聽？你敢有勇氣去熟似生份人？你敢同意小動一下仔頭殼做寡安排予對方感動？你敢有信心會揣著伴？抑是準備欲一世人孤單？你敢敢大膽去奅一个眾人迷？你敢知欲按怎展現個人的魔力？ -- Hosting provided by SoundOn

你上佮意啥物動物？你敢物去過海生館？你敢有定定去動物園？你敢有飼動物伴？你敢愛看介紹動物的節目？你敢相信萬物有靈性？動物園的動物咧想啥？你的人生敢有啥物囥佇心內無講出來的心事？你敢有佮意章魚？你敢知影伊的名有幾種講法？你感覺伊是恐怖的妖，抑是溫暖的神？ -- Hosting provided by SoundOn

你敢會曉看好歹人？是刁工看無？抑是目睭糊著蜊仔肉？這佮價值觀、人生的計畫有關係。你的幸福源泉是啥？啥人才是正港會予你幸福的人？倚近你的人，有可能是有企圖，外表斯文，內底情緒控制無妥當的。欲按怎分辯有善心的人？欲按怎篩除無好的對象？選伴欲按怎選？愛細膩，莫予人騙去。 -- Hosting provided by SoundOn

你幾歲離開故鄉為人生拍拚？我是18歲離開高雄去臺南讀大學，紲落愈離愈遠。你離開故鄉的心情是啥物？離開故鄉去拍拚，你敢有基本的才情佮欲成功的向望？面對社會現實，欲按怎表現家己、爭取權利、 化危機變轉機？成名了後，欲按怎珍惜名聲，知影家己人生欲愛啥？出外是欲靠啥人？出外欲拍拚有啥物臺灣俗語的智慧，會當用來提醒家己？ -- Hosting provided by SoundOn

王桑一工一冬矣。啥物叫做浪漫？自然流露、浪漫就是勇敢，就是浪漫。千算萬算，毋值得拄搪。你一世人的想法敢會改變。細漢人定勝天，一定拚會過，食老煞愈來愈感覺，一人一款命。毋過人生有足濟選擇的點，你敢有看著天公伯仔的啟示？有的代誌是家己想欲變？有的是想足久，想欲變煞無勇氣變？有的是出大代誌矣，無變袂使。代誌來的時，你會按怎判斷才來做選擇。人講查某人有直覺，你敢欲信？上無，你會感覺較好過。選就選矣。時到才來調整。 -- Hosting provided by SoundOn

你是𠢕讀冊的人，抑是頇顢讀冊的人？你感覺家己是天才，抑是庸才？你感覺家己是好額人，普通人，抑是散赤人？你選對象的條件是啥？敢愛佮爸母參詳？你交朋友敢會佮爸母討論？若意見無仝欲按怎？交往到啥物程度敢會老實講？若有一个條件佮你天差咧地的夢中情人，你敢會勇敢講出你的愛？講出你欲奅伊？欲用啥物步數來表達愛？啥物是人做伙較重要的咧？姼仔、菝仔按怎讀？查埔、查某俗語有啥物？ -- Hosting provided by SoundOn

生離較痛苦？抑是死別較痛苦？應該是攏痛苦。無心理準備的更加痛苦。毋管按怎，攏愛有面對的智慧佮勇氣。人生上大的疼，是老的送細的。有人行會出親人過身的疼，有人無法度。會赴講再會，你會按怎講？袂赴講再會？你會按怎過日子？ -- Hosting provided by SoundOn

你感覺逐家敢有了解你？你敢有咧等一个了解你、會使陪伴你的人？有人含金湯匙仔出世，有的人是隨出世隨變孤兒。你心內一定有藏祕密，心事啥人知，講袂清楚，嘛需要等待。面對人生的苦，家己愛振作，莫放棄，才會趁著好運會拄著貴人，貴人會看你敢有志氣，因為天助自助。有時歹運拄著小人，交著歹朋友，浪子著愛緊回頭，才有法度改變命運。到底欲佮啥物做朋友咧？去大自然揣安慰佮啟示上妥當。 -- Hosting provided by SoundOn

你最近一改發票著獎是當時？著偌濟？你發票著過的上大獎是幾箍？你敢有用載具？你敢會共發票捐出去？你敢有偏財運？你敢會想欲著200萬？1000萬？你敢會足欣羨人開小錢著大獎？人是感情較重要抑是好額較重要？大富小富啥人決定？啥物是門當戶對？啥物夫妻是百世哀？你敢有法度認命？欲按怎寶惜翁某的感情？ -- Hosting provided by SoundOn

你是愛笑的？抑是愛吼的？你今仔日有笑無？啥物原因？笑佇面？抑是笑佇心？ 你的笑是文文仔笑抑是大聲笑？毋管拄著啥物代誌，有啥物苦楚，毋通袂記得笑。有法度就大笑，上無文文仔笑，無法度對人笑，上無佇家己的心內笑。笑久就慣勢矣。有笑有保庇，無笑會出代誌。有笑變少年，無笑會變可憐。有笑就會好運喔！ -- Hosting provided by SoundOn

你的名啥人號的？是序大人？抑是包紅包央相命先的­號的？你敢有佮意你的名？伊代表啥物意思？古早重男輕女，生著查某囝也共號罔腰罔市足仔滿仔春仔尾仔。你若無佮意家己的名抑是欲求好運，會使改名。你敢會為著一頓特餐優惠，共家己改名『鮭魚』？現代的家長用浪漫的古字共囡仔號名，所以愛會曉查甘字典捌音、看有諧音無。閣有人開店抑是藝名是文青風，家己造字抑是用有字特別的意思。毋管啥物名，用積極佮樂觀，建立好名聲，勇敢做家己。 -- Hosting provided by SoundOn

你感覺人生啥物較重要？外才較重要抑是內才較重要？自細漢爸母共你講讀冊較重要抑是人品較重要？學校家長日的時，我一定交待家長。「讀冊足重要」，除非你的囡仔已經知影家己人生的方向。千萬毋通共囡仔講「讀冊無重要，乖就好，會曉做人就好」，若無，伊佇學校規工八點鐘就可能失去拍拚的目標。咱看著人，拄開始是看外才，毋過後來一定會看內才。啥物星座的個性人人佮意？欲按怎共遮的優點融合做伙，予家己內才外才攏可愛？ -- Hosting provided by SoundOn

你敢是一个超人？你敢是攏咧為別人無閒？攏先想著別人？人若叫你是超級祕書，你敢會足歡喜？甚至你犧牲家己所愛就是為著責任感？毋過心內敢是有怨嘆？你敢是高敏感度，多才多藝，仝時間無閒足濟代誌？你當時會為家己？你當時才會停止做超級英雄？你的願望敢會因為你一直犧牲，顛倒無法度完成的閣愈離愈遠，若天頂的仙桃，想欲挽煞挽袂著？ -- Hosting provided by SoundOn

你幾歲？當時欲老？你敢會感覺老矣？厝裡敢有老人？食老敢欲家己蹛？你的退休金當時開始儉？準備欲按怎運用才有法度過一个平安快樂的退休生活？計畫當時欲執行？你敢會驚失智？你敢有用心去理解無囡仔佇身軀邊仔的老人有偌孤單？欲按怎過一个安全佮放下的老人生活？你敢有老人友情？ -- Hosting provided by SoundOn

你感覺人是自然生成抑是環境造成？一切天註定抑是會當靠拍拚？出世佇啥物家庭無法度揀，哪會有人歹竹出好筍，有人好竹出痀崙？那會有人生活鞏金閣包銀，有人橐袋仔空空無半仙銀？毋管背景是人啥貨，一定愛有栽培，好額的捌禮數，散赤的求進步。愛拚才會贏。所有的拍拚攏袂無彩。有愛的所在，就無失敗！ -- Hosting provided by SoundOn

你自細漢的夢想是啥？你這馬的工課敢是你細漢想的？大學是佗位畢業的敢有影響？足濟頭家攏講做工課的態度比學歷較重要。人看輕你、無信任你、阻擋你，你敢會起懷疑、放棄？欲治人無信任的方法就是認真、堅持佮招一陣有熱情的人做伙拚，久來定著會有成果、會感動人。做辛勞佮做頭家的立場、承擔佮貢獻無仝，用熱情盡本份認真做，一定會圓夢。 -- Hosting provided by SoundOn

你最近當時出國？你佮意家己一个人出國，抑是會招伴較鬧熱？是佮厝裡的人出國？抑是孤一人？出國的目的是啥物？是純𨑨迌？是做生理？抑是綴時行？有時出國足好耍，嘛有小可仔緊張，毋管按怎，一切攏是安全第一。出國心情傷過放輕鬆，抑是真正需要人鬥相共，敢會無細膩一時失覺察傷過信任人，就予人騙去。歹人的面頂懸袂寫家己是歹人，旅遊的人真正愛目睭褫予金，家己栽一欉，較贏靠別人，隨時留退路。 -- Hosting provided by SoundOn

你敢捌食酒醉？是因為少年毋捌代誌？抑是因為工課場的應酬無法度？抑是家己愛啉？抑是家族的習慣？抑是做月內啉雞酒？啉酒的理由百百款，佇古早激酒無簡單，勝利、豐收、大日子的時才有酒通啉，閣不醉不歸。佇現代，有錢就有通買酒，敢需要逐改都啉甲醉茫茫？其實快樂佮痛苦是仝時間出現，我絕對尊重個人的選擇，毋過若問我個人佮意佗一款，我感覺隨時保持頭殼清醒較安全。若因為按呢減少人生的一寡趣味，嘛無要緊。命較重要。 -- Hosting provided by SoundOn

你有佮意食羊羹無？你知影伊的來源佮引起的誤會無？你敢會予外表騙去？你敢看會清世間人的真面目？人人扶挺若甜心的主角，伊正港的生活敢是你看的、你想的按呢？你想欲做主角抑是配角？路遙知馬力，足濟主角嘛是對配角開始的。你較愛永遠做配角抑是恬恬仔拍拚栽培家己的才情等待時機，抑是無撙無節護龍懸過正身？ -- Hosting provided by SoundOn

若同齊有兩个人會使揀，理想佮現實你會揀佗一項？社會價值佮真心的感受你會按怎選？看人是欲看過去？抑是看目前？抑是看未來？抑是看家己永遠的價值？實在是足為難，人生是一連串的選擇，有時少年淺想，毋過有時是經過風霜，才知初心的珍貴。欲按怎揣著平衡點？有時是靠運氣，閣較需要一直問家己。毋管是家己一个人，拄著一个人，有兩个人，有足濟人，毋管拄著未，簡單的原則是：心內有一直為你設想的才是真正愛你的、妥當的人。 -- Hosting provided by SoundOn

你的人生敢有斜槓？你的人生敢有合你的意？你的人生敢有予人放棄？你敢有放棄你的人生。閣較艱苦、無奈嘛毋通放棄，透過學習來改變家己的運命。這需要有天生的善良佮毋認輸的決心，佇奮鬥的過程，會使欣羨別人，有一个楷模認同，千萬毋通怨妒抑是害人，人咧做天咧看，你的良心嘛較會得過。上好是學一兩項仔才藝，變做一世人貢獻佮快樂的源泉，等你功成名就，千萬毋通袂記得你的初心佮善心，看人的奮鬥，學人的力量。人生的旅程會愈來愈光明。 -- Hosting provided by SoundOn

人生會經歷啥物無一定，有的歡喜，有的悲傷，有的綴計畫，有的誠突然，每一个人的傷痕深淺無仝，有的人會轉念和家己和解，有的人愛經歷痛苦，甚至傷害關心伊的人，最後才理解別人嘛是足傷心，嘛為你幼稚的面對方式傷心流目屎，好運的最後行出悲傷，歹運的影響一世人，甚至強欲無命。生離死別，人生艱料，若會當加思考一下你思念的人上希望你按怎過日子，通常是希望你平安健康，轉念毋若會當行出悲傷，嘛會當行向光明。 -- Hosting provided by SoundOn

地球有70%的水，人是70%的感性，基本上是感情、感動世界才會使運作。你是理性抑是感性的人？你若是有話攏毋講出喙，做代誌有計畫、袂衝碰，就是理性的人，你若是定定為愛付出一切，無考慮後果，抑是做選擇的時干焦看心情，聽心內的想欲，無聽頭殼的需要，你就是較感性的人，若會使揣著平衝點，會較自在、平安。每一个個性攏是神上好的設計，免煩惱，一定有欣實你的人，嘛一定會揣著對同的伴，只是你愛了解家己的個性，累積人生的經驗，跋一倒抾著一隻金雞母。 -- Hosting provided by SoundOn

你是唯物？抑是唯愛？你揀對象是看物質？抑是看精神？抑是兩種攏欲？兩種欲平衝？是當初青春少年用草仔做手指的純情愛？抑是年歲到矣參加婚友社比家伙看璇石？毋管按怎，揣著真情愛、仝價值觀佮仝習慣的才嫁，較袂後悔。結婚毋是嫁一个人，是嫁一家族。看娘嬭、看老爸、嘛愛看兄弟姊妹，有基本的家伙，嘛愛有品德才嫁。莫降低標準，無放棄就有機會。 -- Hosting provided by SoundOn

拄著就知。到時就會曉。你其實比你想的較強！孤單是世間平常的代誌，有的自細漢予親人棄養，有的予愛人放捒、有的是嫁娶重耽、有的踮佇身軀邊煞無疼惜、有的老伴無法度陪你到老，毋管按怎你閣會喘氣，閣有家己的意志，你閣有天地佮大自然陪你、予你啟示。世間無絕對，嘛無啥物道理，只要你無放棄學習充實家己，你猶原會當活落去，閣活出志氣。 -- Hosting provided by SoundOn

你敢是厚操煩的人？抑是啥物攏毋驚？你驚的人事物有幾項？敢有一百項？有一兩項仔驚無要緊，若傷濟致使焦慮感超磅已經造成生活、精神、工課佮人際問題，可能就需要去除焦慮的練習抑是揣心理專業鬥相共。佇日常生活、學校的日子、出業了後的頭路、愛情的追求，攏有可能佮家己的期待和想像無仝，你敢有法度做一个無咧驚、看會開、誠自在、享受孤單、勇敢的人？ -- Hosting provided by SoundOn

你有幾个皮包仔？是實用貯物抑是造型看媠？有啥物記持？你捌食啥物包？菜包？肉包？卵包？你心內的包是啥物包？有幾包？是半包？兩包？……八包？內底是包含偌濟人對你的愛佮支持？有啥物溫暖佮趣味？人生敢有包好運的？無喔！毋過，毋管拄著啥物代誌，只要面對，家己無放棄，攏是好滋味，包你佮意。 -- Hosting provided by SoundOn

這集是特別為聖誕節製作。自出世離開母體，一世人就是相連紲的離別，有時不得己著面對，充滿傷悲；有時離開，顛倒是獨立成長的開始，感恩歡喜。正常佮好人、愛你的人分離，毋管是啥物原因，攏會毋甘佮懷念，若無細膩拄著歹人，上好是安全第一，離予遠遠遠較清心，較無代誌，必要的時閣愛採取行動保護家己。雖然人和為貴，毋過「和諧」是對外的關係，「和解」是對內的救贖，和解的心情若像重生，就若聖誕遐快樂。 -- Hosting provided by SoundOn

是烏白配抑是有創意有四配？人是靠拍拚抑是靠運命？姻緣是欲認真揀，抑是揀啊揀，揀著一个賣龍眼？外表較重要抑是善良的人品較重要？你有啥物特色？你敢有法度欣賞別人嘛佮意家己？抑是共外表提來摃家己的信心？每一个人攏是足珍貴的，你值得愛家己嘛有人愛。相愛才會幸福，你值得人疼痛。莫委屈，慢慢仔揣，攏有四配的，揣一个你愛伊，伊嘛愛你的。 -- Hosting provided by SoundOn

你敢捌寫過批，抑是旅行的時寄一張光批予人？飛鴿傳書到這馬的電子批，真正差足濟。以前的人寫批的時心裡狀態是啥物？只要是情批，毋敢啥形式，毋管經過幾个世代，攏是佮「情」有關係。有愛情敢有法度結成夫妻？無望的愛情，敢是永遠無機會？最後彼張情批有可能講啥貨？伊的影響有偌濟？情批敢欲予後一代看咧？留予囝兒序細到底欲留啥貨？留偌濟？ -- Hosting provided by SoundOn

你是有膽出聲的人？抑是驚驚的術仔？抑是中中仔？若智覺生活衰尾的代誌做伙來，敢是需要改變系統予家己重新提著自我的掌握權？上簡單的方法就是勇敢為家己出聲。毋管好心共人鬥相共嘛好，為身軀邊的人設想、吞忍、犧牲嘛好，毋通袂記得對家己較好咧，免濾鏡，用真心、真面目自在對待家己佮世間的人。 -- Hosting provided by SoundOn

食老愛有尊嚴，家已栽一欉，較贏靠別人。上基本的是愛有經濟能力，錢額攏是對少年粒積起來的，想欲共錢開佇佗位，應該會當家己主張。食老猶原會當有家己的生活，嘛會當貢獻社會，予人生較有意義。毋過後生、查某囝可能會誤會你想欲享受每一工的計畫，嘛有可能共你當做失智老人抑是痟的送入精神病院，其實你是世間上清醒的人，知影啥物人著傷，知影人生揣按呢快樂，承認人生一場空。 -- Hosting provided by SoundOn

善良是咱做人上珍貴的品質，善良是一種選擇，莫懷疑家己傷善良，莫驚善良的人暫時予人創治，歹人只是暫時聳鬚，侵害善良的人是惡人，上天自然會共收。咱愛堅持較巧的善良，莫予惡人騙去就好，若無細膩予惡人害著，嘛莫失志，命運按怎行無要緊，攏是暫時的，閣較好，閣較害的日子攏會過去，閣較大的風湧嘛會變平靜，免驚，莫懷疑，向前行。善良、堅強、堅持，最後一定有好報，上無對會起家己的良心。 -- Hosting provided by SoundOn

你感覺家己敢有自信？敢有媠？你敢捌有家己設想的假想的觀眾？媠無十全，若天生有啥物各樣各樣，嘛莫怨嘆，更加愛化危機為轉機，共變做是性命成長的開始。學校隨時請教，就會當有學習，每一个性命攏是上好的設計。每一个人有家己的特免，勇敢做家己。 -- Hosting provided by SoundOn

你肩胛頭的重擔敢是欲予你接載袂牢矣？你盡本份過日子，毋過身軀邊仔的人敢知影感恩？人講人生是一个過程，講是為著靈魂欲提升，一切是空，這是自我的安慰？抑是事後的轉念？抑是你咧欺騙你的心。女性為著照顧囝兒定定忍耐佮犧牲，過彼款無自己的日子，毋過若囡仔大漢矣，閣毋捌代誌共你當做下跤手人咧利用，你敢有需要共的失敗，變做家己的自責佮鬱卒？免喔！改變系統，就可能有無仝的結果。只要有通路死窟仔水嘛有可能出發流向大海。愛會記得家己愛家己，有話愛講出喙。人生莫放棄，毋管幾歲攏愛予家己歡喜。 -- Hosting provided by SoundOn

有時至愛的人事物會臨時離開世間，有時愛情會臨時無去，有時代誌予你鬱卒冤枉，一切好歹代的發生攏是天安排，會發生就是會發生。心內著傷的時，誠濟人無法度面對現實，甘願選擇掩崁事實欺騙家己。共家己的故事寫出來了後，心內的傷敢有真正治療矣，抑是用來安慰人的堅強其實心猶碎糊糊。面對失落，若最後選擇善良，老實過日，神會還你公道。 -- Hosting provided by SoundOn

每一个阿母攏會用伊上好的方式來愛囝，毋過敢是囡仔欲的？每一个做老毋的無予囡仔了解，囡仔嘛感覺大人無了解伊。查某人佇家庭內底定定是孤單咧過日子， 若像無分世代攏仝款，欲講毋講、無法度講的感情佮關心，攏藏佇心內，抑是身體、心內著傷的嘛吞忍無講出來。咱應該愛做一个有薟味的人，敢講是第一步，莫向望人有法度讀你的心，無講人毋知，勇敢講出來，莫臆來臆去，人生較自在。會薟才有味，早講早輕鬆。 -- Hosting provided by SoundOn

你敢捌講白賊？你敢敢保證一世人攏無講過白賊？干焦會當盡量，閣莫去傷害人。人生猶原需要一點點仔霧霧的感覺，親像對某一个人的佮意抑是無爽快，真正袂當隨講出來抑是講甲清清楚楚。大部份毋是為著莫予對方傷心，其實這馬是無想欲浪費性命佮時間。人生無需要一切攏了解，這个世界若攏完全透明，可能會足恐怖。基本上，上好是莫白賊，老老實實較好。 -- Hosting provided by SoundOn

你欲做啥物款的老人？上無愛做疼惜家己的老人。毋管你敢會當看著未來，你猶原愛共這馬這時刻好好仔活。查某人敢真正無法度行出家己的運命，有足濟查埔人是自少年欺侮查某人，閣家己自我感覺超過好，到老無法度面對現實閣咧做大爺，到老顛倒愈固執，無賴的個性顛倒放大，為著欲證明家己是老大的。是查某人無欲計較，毋是毋知疼，查某人選擇的溫柔的對抗，雖然毋是啥物大動作，毋過卻是一種證明佮宣誓。這一切敢是查某人共查埔人倖歹去？ -- Hosting provided by SoundOn

莫予外表騙去，毋管查埔查某，外表媠媠，內底癩鬼的四界滿滿是，家庭暴力是一改都無法度容允，毋過女性攏感覺家己的母愛會當感化查埔人，無到最後時刻，毋願放棄，有時著傷，有時會無命。查埔人有啥物權利，欲控制查某人，好聽話講講的，予查某人愛著矣，就龜跤趖出來，現代女性，袂當像古早的查某人遐吞忍矣，更加袂當委屈，床頭拍，根本床尾無必要和。 -- Hosting provided by SoundOn

雖然自古以來就有騙子，毋過以前的社會較單純，人嘛較善良，生活較簡單，所以歡喜過日，接近好人，生活其實誠平安，嘛免特別防止人騙人。毋過這馬愛情騙子滿滿是，利用別人的無助、寂寞、驚惶，甚至是愛心佮毋忍心，拐人的愛情，閣利用查某人天生照顧人的母性，假影欲急用錢，錢提著，煞走甲無看見影。受害者干焦會當怪家己戇。正港有志氣的，袂數想別人的財產，遐的共人討錢的實在是無人格，真僥倖。 -- Hosting provided by SoundOn

斷捨離欲到啥物程度？人生無常，咱實在毋知會發生啥物代誌，到底原諒家己較簡單？抑是原諒別人較簡單？一件代誌是欲佇心內囥偌久？別人的一句話敢有需要共伊囥佇心內一世人？你做啥物上帝攏知影，自我的對話，佮人的對話，佮上帝的對話，到底欲講到啥物程度？有時無熟似的人顛倒比親人閣較照顧你？比親人較了解你？表相無等於真相，看起來殕殕仔的人，嘛有可能充滿智慧？啥人會選擇去做遊民？伊的心內咧想啥，可能干焦伊家己知影。 -- Hosting provided by SoundOn

一世人攏愛疼惜家己，定定問家己心內欲愛的是啥物人、事、物。做家己才會逐工攏歡喜。半老老矣更加愛勇敢做家己，毋過愛做古錐的老人，用快樂健康報答世界，愛做勇敢的老人，你嘛閣有青春的夢。一世人的堅強足重要的，家己栽一欉，人生有伴誠好，若無伴嘛著凡事感恩，歡喜向前行。 -- Hosting provided by SoundOn

AI、BI、CI、DI、EI是按怎哀？按怎愛？資訊時代向前行，無可能倒退攄，咱本底是利用電腦來計算­佮處理代誌，這馬因為AI人工智慧的生成，閣較利便，毋過竟然有人已經佮AI生成的人談戀愛，閣答應結婚。你的想法咧？你敢有贊成？ -- Hosting provided by SoundOn

油湯食油湯趁較袂散，世間上艱苦人足濟，毋過只要想欲活就無絕境，適當喝救命，人生就有機會，好天就存雨來糧，人生袂遐艱苦，特別是用讀冊來改變性命，因為一運二命三風水四積功德五讀書。 -- Hosting provided by SoundOn

你敢相信男女之間有「純友誼」？足濟人身軀邊攏有做伙起來足自然、會使啥物話攏講的「麻吉」抑是姊妹仔伴。毋過男女之間若傷過親的時，「純友誼」會予兩人智覺原來是上自在的上好，才是正港的情。人生足歹講的，無到彼工咱欲哪會知？ -- Hosting provided by SoundOn

話無講出來會著內傷。講話到底有簡單抑無？正常喙欲發音是誠簡單，毋過講出來的話語時機佮內容敢有妥當，就是一个學問，若閣愈對心肝去，無講出來的話，人人有，敢等有時機講，抑是考慮傷濟，一世人藏佇心肝底。上妥當的是有話愛講，莫用臆的，較袂著內傷。咱做伙來探討啥物是講袂出喙的心內話，欲按怎較好咧？ -- Hosting provided by SoundOn

時代無仝囉！以前生著查某囝定定號名滿仔、足仔、罔腰、罔市，這馬無仝矣，逐家感覺查某囡仔較乖、較好育飼、較免為伊攢家伙、較顧爸母、顧後頭。你的想法佮選擇是按呢？查埔查某攏總好，查某人愛較珍惜家己，思考啥人是真正疼惜你的人，你心內想欲愛的生活是啥物，莫有歹心機，只要有平靜的心快樂過日子。 -- Hosting provided by SoundOn

你有快樂無？健康和快樂佗一个優先？啥物代誌予你予你雄雄大歡喜？啥物代誌予你長時間平靜快樂？你要意的是佗一種快樂？你自細漢敢有為你的人生列清單？實現未？過去敢真正過去矣呢？你有啥物未竟的事業等你去完成、去走揣自我？ -- Hosting provided by SoundOn

家己栽一欉，較贏靠別人。鼎泰豐有黃金十八拗，你的特色佮天賦是啥物，愛好好仔發揮，毋管你拄著偌艱苦的人生，甚至若像失去一切，干焦會使睏公車過暝，你猶原愛保持樂觀。有當時仔嘛愛喝救人。欲後天培養家己的能力，嘛愛會記得培養善良的心。『小籠包』的台語叫做「包仔囝」，「包」字的有啥物台語咧？ -- Hosting provided by SoundOn

台灣上媠的風景除了人以外閣有啥？你敢有珍惜咱身軀邊的人事物？你會用啥物眼光佮選擇看世界？第36屆金曲獎最佳台語女歌手李竺芯嘛用唱的伨咱日常的「台灣查某囝」。只要心寧平靜，逐工攏是完美日常。 -- Hosting provided by SoundOn

有錢、有權、有勢、有戰功敢會當揣著完美的女神？啥物是上讚的陪伴？你若是王牌天神，敢有法度控制別人的自由意志？你欲愛的青春的面貌佮肉體？抑是思想？思想家？愛一个人愛有啥物態度、精神？你信的是啥物神？遮思考查埔的按怎吸引女神，查某的按怎成做女神。 -- Hosting provided by SoundOn

適當的愛媠是一種禮貌，天然的上好，毋過我嘛尊重欣賞有人小可畫妝抑是醫美予家己較媠、較自信。天然的外表是選擇，毋過做人天然是絕對，你家己才會佮意家己。發揮優點，共缺點嘛變優點，天公予咱的攏上媠。外表無凊彩，心內有愛，你就天然閣可愛。天然的上好，逐家攏是天公疼痛的寶。 -- Hosting provided by SoundOn

數字有意義，毋過由你來定義。翁某敢真正會浪漫做伙老？有的人翁猶佇咧，煞講哪會毋緊去死死咧？有的人是翁死了後，行袂出來。有的是欲阮全共翁的一切留落來，毋敢改變向前行。遮有佮「四、死」相關的台語。翁若疼，就做伙行。翁若無疼，咱愛共家己惜命命。 -- Hosting provided by SoundOn

想予好、有拍拚、有內心的動力佮靈魂，啥物選擇攏有幸福的機會。人生毋管做啥物選擇，愛定定提醒家已，用才情佮夢想支持家己，生活就有靈魂，十冬五冬一定會成功出頭天。掌握時機，勇敢行落去！用女性的角度看人生選擇的趣味。 -- Hosting provided by SoundOn

人生是一改閣一改的選擇，每一項選擇攏值得尊重，你有家己的定義，想予好就好。敢欲嫁娶？敢欲生？生幾个？月內按怎做？無是非對錯，是人生的選擇題。 -- Hosting provided by SoundOn

《王桑一工》第一工！動工囉！加一个人鬥放送台語的媠佮趣味！用女性的角度，講心情，講生活，講新聞，講電影，講台語，講文化，講文學。共你講做夢的過程佮心情。 -- Hosting provided by SoundOn