نفهمها صح

كل موضوع من مواضيع نقراوه او نسمعوه عن الطلاق.. نسمعوا هذه العبارات “آفة خطيرة” “نسب مهولة في السنوات الأخيرة”.. “تسجيل أرقام قياسية مؤخرا”.. كي تسمع هذه العبارات جيت تساؤول اسكو هذا الشي معنتها في السنوات لي فاتت والقرون القديمة ماكاش الطلاق أو أنه كان كاين بصح حاجة قليلة؟! كيفاش كان الطلاق عند المجتمعات القديمة؟! واش هي أهم أسباب الطلاق سوغتو مع انتشار سوشل ميديا..؟! واسكو صح سوشل ميديا هي السبة الاولى في كثرة الانفصالات اليوم..؟! اسك مازال نظرة المجتمع لعيانة عن المرأة المطلقة.ولى تبدلت هذه النظرة مع التغيرات لي راهي صايرة..؟! واسكو نقدروا نقولو بلي الطلاق ممكن يكون أفضل حل للعلاقة الزوجية..؟! أسئلة بزاااف راح نجاوب عليها انا أمال عباس في هذا بودكاست.. ظاهرة الطلاق لازم نفهمها صح..

هذه مشاعر تع الصداقة فريدة من نوعها.. علابيها إذا تقست فيهم راح تكره الناس كامل .. وراح تعزل روحك .. وماتحبش تزيد تخالط.. وكاين بزااااف مايعاودوش تجربة الصداقة باسكو ماولاوش يديروا الثقة.. هي عندهم الحق وماعندهمش .. علابيها جاوني أسئلة بزااااف في راسي.. الواحد كي تكون عنده صحبة وتفشل اسكو صح كانت صداقة بمعنى الكلمة ولى حاجة أخرى ماعرفوش يصنفوها..؟!هنا راح نزيد نتعمق أكثر .. اسك كاين صداقة في ظل انتشار social média ؟! وباست فراند.. كيفاش يعني واسكو المرأة يقدر يكون عندها باست فرند راجل أو الراجل تقدر تكون عنده باست فراند امرأة.. يعني كاينة l’amitié بين الرجل والمرأة؟ والصداقة هذه لي بين الراجل والمراة ممكن تتحول للحب؟! أسئلة بزاااف عن الصحبة راح نجاوبوا عليها أنا أمال عباس في هذا البودكاست ..l’amitié لازم نفهمها صح..

واش معنتها النسوية او الفيمينيزم؟ وهنا لازم نحطو في بالنا التغيرات لي صرات على المفهوم كمصطلح.. هل وصلت النسوية لدرجة تقول انا فمينيست لازم تقدم شروحات..؟! وهل هذا المصطلح بدا يفقد قيمته ورجع من الضروري يبدلوه بمصطلح اخر..؟!! وكاين لي يقولك أنه بمجرد الواحدة تقول فمينيست معنتها منحرفة اخلاقيا.. واذا افترضنا أنه حقيقة.. والنسوية الاسلامية واش حكايتها.. كيفاش بدات ؟، وواش تقدم للنساء المسلمات؟ وواش موقعها من النسوية العالمية؟ أسئلة بزااااف راح نجاوب عليها أنا أمال عباس في هذا البودكاست النسوية لازم نفهمها صح..

واش معنتها الخرافة؟ وواش هي أبرز المعتقدات أو خريفات لي نأمنوا بها سواء عندنا أو في دول أخرى .. وواش هي هذه نظريات المؤامرة كيفاش جات؟ كيفاش نصدقوها؟ وكيفاش نحبسوا ومانزيدش نامنوا بها؟! ونساهموا باش نحبسوا الاخرين ومايزيدوش يصدقوها؟!! كل هذه التساؤولات راح نجاوب عليها أنا أمال عباس في هذا البودكاست الخرافات لازم نفهمها صح..