بودكاست عوافي

سولفنا عن أصعب لحظات الانتظار، ومتى تسحب على المواعيد، ومتى تتحول الشجاعة إلى دلاخة، وأكثر الوظائف اللي تتطلب شجاعة. وعرفنا مصطلح «قوفي» وتعريف الكرنج، وبعدها تكلمنا عن الفشلة والمواقف اللي تصير لك لما تفشل. وسألنا لو عوافي مو عوافي وش بيكون؟ وبالنهاية لعبنا لعبة وش الكلمة؟

سولفنا عن هل تبني بيت ولا تشتري جاهز؟ وعن سرعة الحياة ومتعة الأشياء البسيطة وصيام السوشل ميديا، وتكلمنا عن الانتقاد ومصطلحات الجيل الجديد، وحدود المزح، ومواقف السيارات، وآخر شيء لعبنا لعبة على طرف أذنك.

سولفنا عن تجارب الدبلجة السعودية خاصة توي ستوري بالسعودي، وعرفنا ترند 67 وكيف ومتى يستخدم وشكله أعجبنا، وتكلمنا عن الحسد وأن العين حق، وسولفنا عن البروتوكولات الاجتماعية اللي لازم نتبعها، وهل لازم تواجه مشاكلك ولا تبعد عن الشر وتغني له، وكيف ترفض باحترام، وسولفنا عن آداب رسائل الواتساب، وآخر شيء لعبنا لعبة الزوم إن.

سولفنا عن مصادر الأخبار، الجريدة، وفن المونولوج، والبرامج المباشرة، بعدين تكلمنا عن المصطلحات القديمة وتعديل السيارات، والطفل الداخلي، ووش هي متلازمة المحتال، وإرضاء الناس! وآخر شيء لعبنا لعبة ممتعة وهي كوّن الكلمات.

سولفنا عن الاحتفالات في اليوم الوطني وكيف كانت الاحتفالات قبل والحين وسولقنا عن إعلانات اليوم الوطني والأغاني اللي تهيض المشاعر، ولعبنا لعبة من أكون وحابين نحيطكم علم بأن لجنة النزاهة والمنازعات تنفي كل الاتهامات الباطلة فيما صدر من بعض الأشخاص من التشكيك في نزاهة اللجنة ومن يفوز في اللعبة هو يستحق الفوز بشكل كامل

استفردنا بعبدالله الحسين وكشفنا أسرار خفية وسولفنا عن التمييز بين يصير خير وعوافي، وسولفنا عن الاهتمامات الغريبة ومصطلحات الجيل الجديد وعن راينا في حلقات يصير خير وعوافي، وسولفنا عن الأبوبة أو الأبوية أو الأبوة ما ندري وش الصح منهم، وسولفنا عن الأعمال السابقة وخلف الكواليس، ومواقف تصير مع الجمهور، وأشياء مستفزة، وانتهت الحلقة بهواش وإسقاطات ومطالبات ضيف الحلقة عبدالله الحسين

سولفنا عن الحواري، ومطاعمها، وعن أغرب الإعلانات اللي جات لخيرو وخالد، واستعرضنا شطحات غريبة في برامج التوظيف، وسولفنا عن المسلسلات، ونادي عوافي، وعن أهمية طريقة نقل الأخبار، وختمنا الحلقة بتحدي اختبار القدرات.

سولفنا عن اللي يقضي حوائجه بالكتمان، وعن الوجه الآخر للمشاهير، وسولفنا عن الاستماع والمقاطعة، وعن النادي وشوية فضفضة عن الأشخاص بالنوادي، وعن كيف تستمر بالنادي وخيرو كان عنده دروس مستفادة

سولفنا عن الزواج، واختلاف الماديات، وناقشنا موضوع أفضلية إنك تبني بيت بنفسك أو تشتريه جاهز؟ثم تكلمنا عن الصمت العقابي، والمواقف الغريبة، والتصوير، وختمنا الحلقة بلعبة الميزان.

سولفنا عن شعور الأشياء، وهل تحس الجمادات؟ بعدها تكلمنا عن الترندات القديمة، ومين صنعها، وعن الألعاب وقوانينها، وكيف تكون خال كول، ثم سولفنا عن العقابات في المدرسة، وآخر شيء لعبنا لعبة خمّن مكونات العصير.

سولفنا عن الصيف والناس اللي يحبونه أكثر من الشتاء، وتكلمنا عن اختراعات تاريخية، والمهارات اللي لازم نكتسبها في الحياة، ثم انضم لنا ضيف مميز كلّمنا عن دراسته في اليابان وعلّمنا أشياء عن الثقافة اليابانية، ثم ناقشنا موضوع التواصل مع الناس اللي ما نعرفهم، وقارنا بين اللغة العربية واليابانية، وآخر شيء لعبنا لعبة خمّن اللغة.

سولفنا عن نظريات المؤامرة، والكلانات، وتكلمنا عن مواقف الطفولة والتعفن الدماغي، وحوّلنا على الذكاء الاصطناعي ومخاوفنا حوله، وآخر شيء لعبنا لعبة نحارب فيها التعفن الدماغي.

سولفنا عن الحنكة والسطحية في الرياضة والأفلام والحياة، وعن فعاليات ودنا تصير، وتناقشنا حول أفضلية أنك تكون أب صارم أو حبيّب، وعن وش الأشياء اللي تنسمع في السيارة، وتكلمنا عن إمكانية تعبير الرجل لمشاعره، وآخر شيء لعبنا اللعبة الرهيبة مين في الصورة.

جاوبنا على أسئلتكم من التعليقات وسولفنا عن أنواع الشخصيات الباردة والحارة وعن الأشياء اللي ممكن تندثر مع الوقت، وطرحنا أسئلة عن الأمور اللي ممكن يغيرها الواحد في نفسه ولعبنا لعبة الرسمة الأفضل وكان في تحيز واضح لأحد الأطراف.

سولفنا عن إجازة خيرو وخالد كيف كانت، وعن التجارب الجديدة في السفر، وهل ودهم يجربون دبلجة المسلسلات والأفلام، وعن التجارب المختلفة في الأكل، وتكلمنا عن الجيل الجديد وليه هم أجرأ، وعن الإعتذار، وختمناها بلعبة المزاد.

سولفنا عن أبرزالتعليقات اللي وصلتنا منكم، وعن الاتكالية متى تكون صح ومتى خطأ، وتكلمنا عن النسيان وامتيازات الأخ الوسطاني، وختمنا بفقرة اتصالات الجمهور.

سولفنا عن المطاعم الغالية، والأكل، والاكتناز القهري وأغرب أمثلته، وتكلمنا عن الهدايا والمواقف اللي تصير بسببها، والعانيات، وإعادة تدوير الهدايا وهل هي حركة مقبولة أو لا، وفي النهاية لعبنا لعبة “مين أنا؟”.

سولفنا عن القرارات الخطأ وكيف ممكن نتجنبها، وعن المشاورة ومتى تكون مفيدة، وعن المعايير في الأشياء، ووقفنا عند بعض المواضيع مثل الأطفال والمحتوى الخاص فيهم، وتكلمنا عن المعلومات اللي نسمعها بعد كلمة "يقولون"، وختمنا بلعبة فيفا.

سولفنا عن مقاطع الذكاء الاصطناعي وتأثيرها على المحتوى، وعن الدايت وكيف أحيانًا يضيع الالتزام، وعن مستقبل التقنية واختراعات ودنا تصير، وتكلمنا عن السفر والمرونة فيه، وفكرة سفر الشخص لحاله، وتكلمنا عن أقسام المخ وطريقة تفكير الإنسان، وختمنا بلعبة السماعة.

سولفنا عن طقوس مشاهدة الأفلام وكيف نوصف لأحد فيلم بدون حرق، وعن الأشياء اللي تقهرنا بالسينما وأفضل الأفلام اللي شفناها، وتكلمنا عن الأنمي والتأقلم مع التغييرات وفوبيا الطيران وأسماء الفوبيات الغريبة، وختمنا بلعبة الميدان.

سولفنا عن التشجيع ومدربين الحياة، وتطوير الذات، وعن التخطيط، وتكلمنا عن الهبات الرهيبة والهبات اللي المفروض توقف، واجتماعات الأونلاين وخرابات البيت والبيوت القديمة، وعن الفرق بين المدينة والمحافظة، وختمنا بلعبة صادق وإلا.

ضيف الحلقة نواف الشبيلي سولفنا عن حب نواف للمقاولات وهوايته الجديدة، وعن غرائب وعجائب نواف، وسولفنا عن أعمال الدراما السعودية، وعن كأس العالم ومنتخبنا وعن جمهور الكورة، وسولفنا عن السفر وأنهينا الحلقة بلعبة سؤال وجواب

سولفنا عن النوادي الرياضية وحماس البدايات، وعن أسئلة العزايم الكريهة وصار الوضع فضفضة، وعن السلف والتسول، وعن الذب والتنمر، وطلعنا بكم نصيحة اجتماعية، وسولفنا عن الخصوصية واللي ياخذ موقف سيارتك، وعن أسماء الناس الغريبة بجوالاتنا، وعن الكذب وختمنا الحلقة بفقرة مقطع وتعليق

سولفنا عن أول سيارة سقناها وتدليع السيارات وألوانها والمخالفات، وعن سواقة البنات والناس اللي بالشارع، والجوال اللي يسمع، وتكلمنا عن الذكريات وأطفال اليوم وأول شيء نتذكره بحياتنا، وختمنا بفقرة لو خيروك ولعبة خمن الصوت.

سولفنا عن عالم الألعاب وفرضيات “ماذا لو”، وعلقنا على تعليقاتكم، وصارت شوي تصفية حسابات، وسولفنا عن متى تثبت الشخصية والوحدانية، وعن السفر بخريطة ولو انقطع النت عن العالم، وسولفنا عن عن الصداقات وتطبيقات التعارف، وعن كلانات اليوتيوب، وختمنا بلعبة خمن الكلمة من الصورة.

سولفنا عن العيديات وتجميعها، ووش بقى من فطور رمضان، وسيارة عبدالرحمن، ودخولياته بكأس العالم، وأكرمناه شوي، وسولفنا عن جدول العيد ومصايب العيد ومتى تكبر على العيدية ومتى تبدأ تعطي عيدية، والسفر في العيد وغيبوبة العيد، وجمعات العيد وسفراته وهموم السفر والطيران، وصارت شوية شخصنة، وكانت فقرات الحلقة لعبة الاترجال ولعبة الشخصيات، وللأسف في رسالة حزينة نهاية الحلقة

سولفنا عن الهبات وكيف تنتشر بين الناس، وعن العطور، وعن التجميل للرجال والبنات، وعن زراعة الشعر وابتسامة هوليوود، وعن مقاومة المرض وتجارب التنويم، وعن دكتور الأسنان وليه نخاف منه، وجاوبنا على سؤال لو خيرونا نصير دكتور.. أي مجال بنختار؟، وكانت فقرة هالحلقة هي لعبة تخمين المكان، وختمنا الحلقة برسالة منا عنوانها خذوا راحتكم.

بدينا الحلقة هالمرة بشكل مختلف، وسولفنا فيها عن لحظة السكوت في السواليف وليه تصير، وعن جدول رمضان وكيف يتغير الروتين فيه، وعن الراديو والشوربة، وعن لعبة الطايرة، وعن المسلسلات، واتصلنا على شخصية رهيبة، وسولفنا عن السوشال ميديا والحسابات الوهمية، وعن ليه بعض الناس تشتري متابعين، وكانت لعبة اليوم عن طاش ما طاش، ثم تنهد وقال إلغي رحلتي.

سولفنا عن أجواء رمضان من التراويح والصيام وأول مرة صمنا فيها، وعن الأخلاق في رمضان والجوع والعطش والوزن والدايت، وعن الرياضة ولعب الطائرة في رمضان، والدوام في رمضان والعشر الأواخر، وتكلمنا عن زينة رمضان و الخياطين، وعن المدير والموظف المثالي ومعايير الترقية، وختمنا الحلقة بفوازير عوافي وانتهت الفوازير بكيف تتمالك نفسك عند الغضب.

سولفنا عن حلول جوع آخر الليل والطبخ والطلب من المطاعم وأكلات رمضانية، وعن السيارات والغرام فيها وعن الألعاب والهوايات والعزوبية وعن خطوط السفر ومواقف السفر والأكل في السفر، ولعبوا لعبة عرفته من عيونه

سولفنا عن لخبطة النوم والنومات الزينة والشينة وعن عادات قبل النوم، والمصارعة وكيف كانت وكيف صارت، وعن المراحل العمرية وأفضل مرحلة عمرية، وعن المناسبات والزفات وزواجات الرجال وبروفات الزفة، ولعبوا لعبة مين الكذاب، وعلى غير العادة انتهت بتصالح جميع الأطراف بكل حب وسلمية وتعاون وتآخي وترابط

سولفنا عن الحلاقين ومين الأفضل فيهم وعن القصات وعلاقتك مع الحلاق وخيانة الحلاق، وسولفوا عن الدوامات والعلاقات في الدوام ومفهوم العائلة الواحدة والبصمة والحضور وربطها بالإنتاجية، وكانت لعبة اليوم هذا صدف ولا ذكاء اصطناعي، وما يحتاج نقول أنهم تهاوشوا كالعادة

سولفنا عن تشبيه خالد بالقرفة وعن الانتقاد وتقبله، وعن أيام اليورومارشيه والتنكس، وعن مصطلحات حديثة مدري من وين جت وتنرفزهم، وعن التسوق الإلكتروني ولعبوا لعبة مين الشخصية وانتهت الحلقة بهواش والمطالبة بالرجوع للفار

سولفنا عن هواش خالد مع الوكالة، ومواكبتهم للتقنية وخدمة العملاء وعن الحظ وتربية الحيوانات وقليلًا من الكورة والراب والأنمي، ولعبوا لعبة المعلق الأفضل وكالعادة تهاوشوا نهاية الحلقة

عوافي هو بودكاست مرئي ومسموع من تقديم إبراهيم الخيرالله وخالد عبدالعزيز، ومشاركة محمد النملة. يسولفون ويتناقشون بعفوية في مواضيع عامة بطابع كوميدي لطيف. وأحيانًا ما يوصلون لحلول أو نتائج عميقة، لأن الموضوع ببساطة: عوافي