مش لوحدك

المسامحة الحقيقية مش سريعة، ومش سهلة، ومش معناها إنك تنسى أو توافق على اللي حصل. هي قرار إنك تحرر نفسك من ثقل الغضب، من غير ما تسيب الباب مفتوح لنفس الأذى يتكرر.

رد فعلك القوي مش دايمًا عن اللحظة اللي انت فيها. أحيانًا هو صوت قديم بيحاول يحميك من حاجة كانت مؤلمة زمان.

مش المطلوب إنك تلغي الصوت ده، لكن إنك تتعرف عليه، عشان يبقى ليك اختيار: ترد من مكان الخوف القديم، ولا من مكان الوعي بتاعك دلوقتي.

الوحدة جوه العلاقة مش عيب فيك، ومش دايمًا عيب في العلاقة. هي إشارة. وزي أي إشارة، مش هتختفي لو تجاهلتها لكنها هتكبر.

مش كل علاقة فيها وحدة لازم تخلص. بس كل وحدة لازم تتسمع - سواء من نفسك، أو من اللي بتحبه.

كلنا بندور على حاجتين،  الإحتواء اللي يطمنا والمهارات اللي تساعدنا في مواجهة العالم الكبير والصعب ده. 

احساسنا بعدم القيمة هو من اعمق الجروح اللي بنصارع معاها

حاجات بتهدر كل طاقتك وإمكانياتك، تفضل عطلان مكانك. 

هنتكلم عن ٣ حاجات ممكن تكون بتعملهم هيخلوك دايماً حاسس انك مش كويس، دايماً حاسس انك واقف في مكانك ومش عارف تتحرك لقدام مهما حاولت.

ساعات بنبقي للأسف احنا اكبر عدو لنفسنا، وكأن دماغنا بتلعب ضدنا. بس الحقيقة هي ان دماغنا عايزه تحمينا مش أكتر. 

احنا الكائن الوحيد اللي على الكوكب اللي عنده قدرة هائلة انه يعذب نفسه من خلال احساسنا بالذنب والندم.

مفيش حاجة اسمها حب عير مشروط في علاقة بين اتنين كبار وواعين اختاروا يكملوا مع بعض لأن العلاقات لها شروط عشان تكمل. 

وجودك في علاقة قوية مش معناه تجنب الخلافات والمشاكل، لكن بقدرتنا على خوض النقاشات الصعبة والغير مريحة عشان نوصل لعمق.

هو احنا محتاجين نعمل ايه عشان نبقي سعداء بجد وبتكلم عن السعادة الحقيقة، مش السعادة المؤقتة.

الحياة هتقدملك اختيارين، انك تقبل أو انك تاخد خطوة تجاه التغيير. فكرة رفضك الاختيارين او انتظارك اختيار تالت هتخليك تفضل واقف مكانك.

في حاجات من بره تبان انها أمان أو سعادة، لكن في الحقيقة هي حاجات سطحية أو مؤقتة.

مهارة انك 'تسمي الحاجة بأسمها الحقيقي' هي مهارة هتفرق اوي معاك. هتساعدك تشوف الحاجة بوضوح وعلى حقيقتها وبالتالي منظورك هيختلف تماماً.

مفيش تغيير ممكن يحصل بدون ما نعرف الحكاية اللي بنحكيها وعايشنها. البداية بتيجي لما تبدأ تحكي الحكاية بشكل مختلف، واقعي بس مختلف.

لما بنبدأ نشوف ونخلي كل حاجة عادي مع الوقت بنبدأ نتوه ونبقي مش عارفين احنا مين ورايحين فين.

هل العادي اللي انت شايفه فعلاً عادي ؟!

الحلقة دي هتساعدك تفهم انت ليه واقف مكانك ومش عرف تتحرك، وايه الحاجات اللي محتاج تعملها عشان تبدأ تتحرك وتعيش. 

كلنا بنصارع مع ألم معين، وبنلاقي في رحلة صراعنا مع الألم ناس بتقدر تتخطي، وناس الألم بيبلعها. 

كل واحد فينا عايش صورة وواقع ونفسه يكون في صورة تانيه، وكل لما الفرق بين الصورتين بيكبر بنتعب اكتر. 

كتير اوي بنمشي سكك وبنبذل مجهود وفي الاخر بنلاقي نفسنا موصلناش لأي مكان. في الحلقة دي هنتكلم عن شوية سكك غلط بنمشي فيها على أمل انها توصلنا لأهدافنا.

الفقد من اصعب التجارب اللي الشخص ممكن يعدي بها، في الحلقة هنتكلم عن المراحل اللي الشخص بيعدي فيها بعد الفقد وايه اللي ممكن يعطله او يساعده يوصل لنقطة يحس فيها بالقبول ويكون قادر يكمل.

ايه الاسباب اللي بتخلينا مكملين في علاقات فاشلة ؟ ليه بنفضل مكملين في علاقات ملهاش مستقبل ؟ 

ليه مش بنعرف نمشي ؟

ليه كل مرة بقع مع نفس الناس التوكسيك ؟ 

ليه حظي كده ؟ اكيد انا فيا مشكلة…

الحقيقة ان المشكلة مش فيك لكن في اختياراتك.

مش دايماً الحل مع التعب انك ترتاح !

مهم تعرف انت تعبان من ايه، تعبان جسدياً ولا ذهنياً ولا عاطفياً، ساعتها هتعرف محتاج ايه عشان ترتاح ؟ 

الثقة بالنفس هي مهارة نقدر نتعلمها ونكتسبها ومع الوقت نكون احسن فيها.. في الحلقة دي هنتكلم عن شوية خطوات ممكن تساعدك تكتسب مهارة الثقة بالنفس. 

المشكلة مش انك مش لاقي وقت عشان تعمل اللي نفسك فيه وبتحبه، لكن  المشكلة انك مش عارف تستغل وقتك بشكل كويس. 

المشكلة مش في احساس القلق والخوف ان يفوتك حاجة، لكن في احساس الخوف الاعمق انك متأخر في الحياة وفايتاك كتير. 

مش جاي اقولك محتاج تحط اهداف واضحة وخطوات تمشي عليها للسنة الجديدة، لانك عارف ده. انا بس عايزك تبدأ السنة بمنظور مختلف.

كتير بيتقدم لنا فكرة ان في حاجة ناقصة ولو حققناها حياتنا هتكون احسن، في الحلقة دي انا جاي اقولك العكس…ان في حاجات لازم اتخلي عنها عشان اكون احسن.

هل الناس فعلاً ممكن تتغيير ولا الطبع غالب

مع عصر السرعة اللي احنا فيه بقينا عايزين الانجاز، بندور على الحلول السريعة والإشباع السريع في كل حاجة، عايزين ناخد كل حاجة بدون اي مجهود أو بأقل مجهود ممكن.

مش دايماً المعايير اللي بيقدمها المجتمع والمسطرة اللي بيقيس بها النجاح أو السعادة بتكون صح ومش دايماً لازم تكون مناسبة لينا. 

من وقت للتاني محتاجين نراجع مسطرتنا.

في بعض الاوقات او مراحل حياتنا بنلاقي نفسنا مضطرين نلعب ادوار مش بتاعتنا…هل انت عارف ايه الدور اللي بتلعبه وواعي له ولا لأ

في الحلقة هنتكلم عن الاسر المضطربة وايه صفاتها. هنتكلم عن ١٠ نقاط بتمييز النوع ده من الاسر.

وازاي الاسر دي بتأثر على الادوار اللي الشخص بيلعبها لما بيكبر.

الدنيا بقت صعبة وكل واحد عنده مشاكلة وصراعاته، بس ده سبب يخلينا محتاجين بعض اكتر، محتاجين نقرب ونتسند علي بعض بدل ما نبعدوننعزل

حلقة عن التروما

مفهومها، تأثرها، وازاي نتخطاها 

نسمع كتير ان الحل لمعظم مشاكلنا هو اننا نقبل ونحب نفسنا، بس محدش بيقولنا نعمل ده ازاي.

في الحلقة دي هنتكلم عن شوية خطوات تساعدنا نبدأ نمشي رحلة تساعدنا نقبل ونحب نفسنا. 

دماغنا هدفها الاساسي تحمينا من اي حاجة ممكن تكون مصدر خطر وتهديد لنا، سواء مواقف او مشاعر معينة. بس المشكلة ان دماغنا اوقات كتيرة بتحمينا من حاجات مش بتشكل خطر حقيقي علينا او بتحمينا باشكال غلط ومش صحية. 

في الحلقة هنتكلم عن خمسة من اشهر اخطاء التفكير اللي معظمنا بيقع فيها، هنفهمها اكتر ونشوف قد ايه بتأثر على الصورة اللي بنشوف بها نفسنا، واللي حوالينا والعالم. 

انت حقيقي ممكن تكون ضحية اشخاص او ضحية الظروف لكن مش لازم تكمل حياتك بعقلية الضحية.

في الحلقة هنتكلم عن ايه هو الpeople pleasing, اسبابه، وازاي نعرف نبطل السلوك ده. 

ليه بنشوف ناس بتقدر تتخطي بسرعة، وناس بتعطل سنين ومش بتبقي عارفة تتخطي…ايه اللي بيعطلنا، ونعمل ايه يساعدنا نتخطي ونقفل الصفحة عشان نكون قادرين نفتح صفحة جديدة، عشان نكون قادرين نرجع نستقبل ونقدم حب

شوية حاجات بنعملهم بوعي او بدون وعي بيضمنوا فشل اي علاقة. 

ورقة وقلم واكتب ورايا الحاجات اللي محتاج تبعد عنها وتتجنبها، الحاجات اللي محتاج تكون واعي لها عشان متمشيش في طريق فشل العلاقة اللي انت فيها.

ليه في ناس بتخاف تدخل في علاقات حقيقية، بتبقي مرتاحه طول ما العلاقة من بعيد لبعيد. وبنشوف ناس تانيه بتّكون علاقات بمنتهي السهولة والاريحيه. وفي ناس دايماً خايفه تتساب.

الاجابة هي انماط التعلق !

للأسف محدش كلمنا وفهمنا ايه هو الحب وازاي نحب، فالنتيجة بتكون اننا بنتعلق باشخاص وعلاقات متخيلين انها الحب.

في الحلقة هنتكلم عن خيط رفيع بيفصل بين الحب والتعلق.

طول الوقت بندور على السعادة اللي هناك.

طول الوقت حاسين اننا هنلاقيها في الخطوة الجاية.

ونفضل من خطوة لخطوة وبرضو مش بنرتاح.

بنفضل نجري وراء اللي مفروض ونسيب اللي موجود.

عايز اثق اكتر في نفسي، عايز اشوف ناس جديدة.

عايز احب واتحب..

السنة دي هتكون مختلفة، هيكون عندي إرادة وهلاقي الشغف.

كام مرة قولت كده في بداية سنة جديدة وبعد كام شهر تنسي الكلام ده كله.

تعالوا نفهم اكتر عن التغيير ومراحله وصراعات كل مرحلة عشان نقدر نوصل لاهدافنا ويكون في تغيير حقيقي.

أنا مش عارفني، أنا تهت مني

هو اللي أنا بعمله في حياتي ده نتيجة اختياراتي ولا نتيجة القوالب اللي اهلي والمجتمع حطوني فيها

هنكمل كلامنا عن الألعاب النفسية في محاولة اننا نكون واعين وفاهمين اكتر عن علاقتنا عشان منسمحش لحد يستغلنا أو يوجعنا.

في الحلقة دي هنتكلم عن ٣ من أشهر الألعاب النفسية اللي بتتلعب في العلاقات، اللي للأسف أوقات كتير بنكون ضحيتها

في الحلقة دي هنتكلم عن موضوع بيلمسنا كلنا…هنتكلم عن العلاقات.

انت من الناس اللي بتدور على علاقة تحس فيها بقبول، علاقة تتسمع فيها وتطمن، ولا انت من الناس اللي بتشتكي من العلاقات ؟ 

عمرك سألت نفسك ايه افكارك ومعتقداتك عن العلاقات، عمرك سألت نفسك عن دورك في العلاقة ؟

احساس اني مش كفاية.

احساس سخيف ومزعج بنحسه من وقت للتاني.

اللي بعمله واللي بقدمه للناس اللي حواليا مش كفاية…اللي بوصل له وبحققه مش كفاية.

احساس بيخليني حاسس ان كل حاجة ناقصة. 

لو انت بتحس الإحساس ده من وقت للتاني ف أحب أقولك إنك مش لوحدك. 

مع أول خطوة في سكة طويلة هنمشيها مع بعض، ف محتاجين نجاوب على سؤال مهم !!

هو احنا محتاجين نتغيير ولا محتاجين نقبل نفسنا وبس ؟

مش لوحدك !

مش لوحدك اللي بتصارع في الحياة.

مش لوحدك اللي عندك اسئلة كتير.

الوحدة بتصعب علينا كل حاجة، وفي البودكاست ده هدفي اننا منحسش بالوحدة.

نصارع، ونفهم، ونتعلم، ونكبر مع بعض.

ف متخافش انت 'مش لوحدك'