Podcasts by Category

نبي نفهم

Selma

بودكاست يشجع على الفهم العميق للأمور والمواضيع المختلفة. يركز على الجوانب اللي تساعدنا نفهموا روحنا وبعدها نفهموا اللي حوالينا. العام الثاني من البودكاست حنركزوا أكثرعلى تهدريزات عميقة مع ناس مميزة في مجالات مختلفة من علم النفس والطب ومجالات زي البرمجيات و التصميم الداخلي و إدارة أعمال. وجوانب عميقة في حياة كل ضيف واللي ساعدهم يوصلوا للي وصلوله. شاركونا رايكم على الانستاقرام وتقدروا تسألوا لو في موضوع تبوا تفهموه وتبونا نحكوا عليه ولو فى شخص تقترحوا ان يكون ضيف . ❤️

16 - الأمل شن هو وكيف يولي عندنا أمل؟ (كلام علمي) Hope, What it is and how to get hopeful?.

0:00 / 0:00

16 - الأمل شن هو وكيف يولي عندنا أمل؟ (كلام علمي) Hope, What it is and how to get hopeful?.
موضوع الحلقة هذه يحكي على موضوع مانحكوش عليه هلبا لكن يأثر فينا هلبا وفى ثقتنا بنفس ان نوصلوا للي نبيه.
الأمل هو حاجتين: العزيمة Agency( أعتقادك وايمانك ان تقدر ادير المطلوب باش توصل للي تبيه هذا الفعل, الطريقة Pathway ايمانك في قدرتك أن تطلع بطرق مختلفة باش توصل للي تبيه).
تقدروا تقيسوا الأمل متاعكم عن طريق المقياس الموجود فى الرابط .
وشاركوا نتيجتكم معانا على صفحة البودكاست على فيس بوك او انستقرام
https://www.facebook.com/NebbiNafehim
https://www.instagram.com/?hl=en
الرابط للأبحاث المذكورة فى الحلقة:
و تقدروا تتواصلوا مع صانع اللحن والفنان اللي صنع الارت وورك:
صانع اللحن على : catch22beatz@gmail.com
صانع الأرت وورك : omarmustafa671@gmail.com
Wed, 02 Feb 2022 - 05min
15 - !مرحبا بكم في بودكاست نبي نفهم
This is the Podcast Trailer.
Sat, 22 Jan 2022 - 03min
14 - النضج العاطفي 2 Emotional Maturity (II)
الحلقة 14
النضج العاطفي الجزء الثاني (تأثير النضج العاطفي في حياتنا الشخصية وفي الشغل وفي العلاقات العاطفية )
هذه الحلقة ملهمة من كتاب اسمه Adult Children of emotionally immature parents ومع أبحاث علمية تانية على تأتير النضج علينا وعلاقته بتعاملنا مع التوتر وعلاقة النضج العاطفي مع القيادة الفعالة وحتى نجاح العلاقات العاطفية في حياتنا.
وحنشارك معاكم حاجة تعلمتا من Life Coaching وهيا كيف نقدروا ف الاخير نساعدوا روحنا ان ننضجوا عاطفيا ونتعاملوا مع الحاجات اللي تصيرلنا بنضج.
اللنك للأبحاث المذكورة فى الحلقة:
تقدروا تتواصلوا مع صانع اللحن وصانع الأرت وورك:
صانع اللحن على : catch22beatz@gmail.com
صانع الأرت وورك : omarmustafa671@gmail.com
<3
فريق البودكاست
Thu, 12 Aug 2021 - 06min
13 - النضج العاطفي 1
الحلقة 13
النضج العاطفي 1 ( شن هو النضج العاطفي و كيف نعرفوا الانطباع الاول عليه في الناس وفينا )
سابقك بليلية أقدم منك بحيلة مثل معروف واعتقاد كبير بين الناس ان اللي أكبر منك يعرف أكثر وأنضج منك .لكن الحاجة هذه ماتتماشاش مع النضج العاطفي للناس. لأننا كبشر ننضجوا عاطفيا عن طريق التعامل مع تجاربنا ومشاعرنا وبهكي أي حد يتجاهل فى الجانب هذا من حياته هو غير ناضج. باهي كيف نعرفوا لو الحد فينا او حوالينا ناضج أو لا ؟؟ في صفات معينة ادل على نضوج الشخص عاطفيا وفي صلة مقربة بين نضج امالينا امهاتنا وابهاتنا ونضجنا العاطفي.

هذه الحلقة ملهمة من كتاب قريته اسمه Adult Children of emotionally immature parents ومع أبحاث علمية تانية على تأتير النضج علينا وعلاقته بتعاملنا مع التوتر وعلاقة النضج العاطفي مع القيادة الفعالة وحتى نجاح العلاقات العاطفية في حياتنا.
*فقرة جديدة من البودكاست وحيتم مشاركة وإعطاء الكتاب اللي دوت عليه سلمى فى الحلقة لأحد المستمعين بشرط إجابتهم على أسألة الحلقة وبعد ما يكمل المستمع اللي عنده الكتاب من قراية الكتاب يرجعه باش يوصل لأكبر قدر ممكن من المستمعين.
تقدروا تتواصلوا مع صانع اللحن وصانع الأرت وورك:
صانع اللحن على : catch22beatz@gmail.com
صانع الأرت وورك : omarmustafa671@gmail.com
<3
فريق البودكاست
Sat, 26 Jun 2021 - 06min
12 - التحفيز الخارجي والداخلي في العمل مع محمود ابوقرين "مكّي"
الحلقة 12 حلقة عميقة و ثرية بالمعلومات على حياتنا العملية والنضج الشخصي. ضيف الحلقة متحصل على عدة منح دراسية زي منحة MEPI الامريكية ومنحة ال Chevening البريطانية واللي حضر الماجستير بيها في ريادة الاعمال و استراتجيات التسويق. وحاليا قاعد يحضر في ماجستير فى علم النفس فى العمل بجامعة بالاضافة إلى كونه ناشط فى المجتمع الليبي وعضو فعال فيه ومهتم بعلم النفس وسلوكيات الانسان و الفلسفة. مكي ابوقرين كان ضيف الحلقة هذه. أهم الحاجات اللي تكلم فيها مكي هيا : الفرق بين التحفيز الخارجي والتحفيز الداخلي في العمل. ارتباط التحفيز الخارجي زي المكافآت بالمهام الواضحة واللي ماتحتاجش ابداع. ارتباط التحفيز الداخلي بحلول ابداعية وباش تعرف لمن تعطي مهمة معينة محتاجة ابداع وتحفيز داخلي لازم ماتسأل سؤال بسيط وهو شن ايمانيات الشخص واعتقاداته وتفهم شن قصته. أهمية معرفة الشخص باللي يمشي معاه من ناحية الشغل وتجربته الشخصية فى العمل بدوام كامل واختبارBig Five وكيف صنف الناس في العمل وكونه اختبار مبني على ابحاث علمية. وأيضا تكلم فيها على رحلة نضجه الشخصي والحاجات اللي تعامل معاها والحاجات المميزة فى شخصيته والتوازن بين كون الانسان اجتماعي وانطوائي. دوينا في موضوع الصوت الداخلي والقصة اللي نقولوا فيها لروحنا وكيف انها تأثر فى كل شي وتأثر في حياتنا وكيف نستقبلوا فى الاحداث ونتعاملوا معاه. صانع اللحن على : catch22beatz@gmail.com صانع الأرت وورك : omarmustafa671@gmail.com <3 سلمى
Sun, 11 Apr 2021 - 43min
11 - الحل مع الصدمات النفسية وكيف نتعاملوا معاها

موضوع الصدمات موضوع عميق وكبير هلبا وفى حلقة اليوم حنحكي على كيف نتعافوا ونتعاملوا مع الصدمات اللي مرينا بيها.
ملخص الخطوات للتعافي من الصدمات النفسية هيا:
1. التعامل مع فرط المشاعر. وحكيت فيه على طريقة تنفس مليحة هلبا وتساعد ان تهدينا في الاوقات الصعبة.
2.الوعي الذاتي. ان نعرفوا شن صايرلنا وشن نحسوا وعلاش نحسوا هكي.
3.العلاقات وشبكة اجتماعية داعمة.
4. الحنان الإنساني واللمسات. الأحضان والسحر متعهم فى التعافي من الصدمات.
5.التناغم الاجتماعي . النشاطات الجماعية واللي تبي فريق وتناغم ف اللعب.
6. الفعل أو التصرف. ان نتخلصوا من هرمونات التوتر او ان نديروا رد فعل.
الحياة من غير صدمات نفسية حاجة شبه مستحيلة وهذا علاش مهم هلبا ان نعرفوا كيف نتعاملوا مع الصدمات ونكلموا حياتنا ونستمروا.

يارب تستفيدوا

<3
تقدروا تتواصلوا مع صانع اللحن على : catch22beatz@gmail.com
وتتواصلوا مع صانع الأرت وورك : omarmustafa671@gmail.com
Thu, 04 Mar 2021 - 06min
10 - (الصدمات النفسية وتأثيرها علينا الجزء الثاني)
الحلقة 10
فى تأثير مباشر على الشخص من الصدمات النفسية اللي صارتله فى طفولته. ولو كانت الصدمات هذه حاجات تعرضلها من أهله فتأثير الصدمة اكبر وأكبر. Childhood trauma موضوع كبير وهلبا مهم لأن علم النفس يقول ان الصغار كائنات قاعدة ماتعرفش الدنيا ومش فاهمة كيف تمشي والاهم من هكي ما تعرفش تتعامل مع روحها ومشاعرها. وان الصغار يتعلموا كيف يتعاملوا مع مشاعرهم من اللي حوالينهم ومنهم الأهل فلما تجي الصدمة منهم يكبر الشخص وهو ماتعاملش مع اللي صارله ويتبنى طرق تأقلم تخليه ينغلق على روحه أو ينعزل أو ييدمن على حاجات مختلفة وممكن يصير اضطرابات نفسية توصل لاضطرابات شخصية كاملة.

فى الحلقة هذه حنحكي على كيف كصغار مرينا بصدمات وفى العادة تبنينا طريقة تعامل امالينا مع الصدمات والظروف.
الحلقة الجاية حنحكي فيها على كيف نقدروا نتعاملوا ونتعافوا من اللي مرينا بيه.

يارب تستفيدوا

<3
تقدروا تتواصلوا مع صانع اللحن على : catch22beatz@gmail.com
وتتواصلوا مع صانع الأرت وورك : omarmustafa671@gmail.com
Sat, 06 Feb 2021 - 06min
9 - الصدمات النفسية وتأثيرها علينا (الجزء 1) .
الحلقة 9 (الصدمات النفسية وتأثيرها الجزء 1 ) تعرفوا ان كلمة العار اللي نكرروا فيها في كلامنا هيا شعور وصفة لشن نحسوا ومش لموقف او فعل! تكلمت في الحلقة هذه على ارتباط شعور العار واللي جاي من شعور بالذنب المستمر والصدمات النفسية ولما نمروا بموقف صعب هلبا لينا. نشبح في الموضوع هذا مهم هلبا ولهذا حيكون فيه جزء ثاني وطالما قاعدة نقرا في كتاب علمي على الصدمات النفسية حنشارك كل اللي نتعلمه منه واللي فهمته منه معاكم. يارب الحلقة هذه تخلينا نتعاطفوا مع روحنا ومع اللي حوالينا لما نمروا بفترة صعبة وان نفهموا ان الدنيا ماتخلاش من الصدمات النفسية ولكن ان نعرفوا كيف نتعاملوا معاها ونفهموا اللي نمروا بيه وهذا الهدف من الحلقة هذه. تقدروا تتواصلوا مع صانع اللحن على : catch22beatz@gmail.com وتتواصلوا مع صانع الأرت وورك : omarmustafa671@gmail.com Resources المراجع 1.Understanding and Healing Emotional trauma By Daniela F. Sieff https://books.google.com.ly/books?hl=en&lr=&id=LkScBQAAQBAJ&oi=fnd&pg=PP1&dq=emotional+trauma+researchers&ots=OZuLrv_wLk&sig=0EjKquAVHc28LGKALaVHV0T9PqU&redir_esc=y#v=onepage&q=emotional%20trauma%20researchers&f=false 2. The Body Keeps the Score By Bessel van der Kolk ❤️
Fri, 08 Jan 2021 - 09min
8 - تعدد المواهب والتعلم المستمر مع محمد زيد
الحلقة 8 تهدريزة مع محمد زيد على شن اللي صاير في حياته وكيف يحاول يحافظ على شغفه فى التعلم المستمر و يتعلم حتى من التجارب اللي يمر بيها فى حياته حاليا. ان تكون متعدد المهارات والمواهب حاجة مش ساهلة بكل ويجي معاها توتر وضغط , وتحتاج عادات صحية تدعم اللي نبوا انديروه وهدف واضح وتفكير فى النتيجة مستمر وهذا اللي قاله محمد فى التهدريزة هذه وقدم نصيحة ان الانسان يقعد يحاول ويطلب المساعدة وقت يحتاجها. استفدت هلبا وتعلمت منه حاجات وعداني شغفه للعلم المستمر ويارب تستفيدوا حتى انتوا. رابط القناة متاعه على يوتيوب: https://www.youtube.com/channel/UCywbwcOuqby-UzeRkASFcqA قدروا تتواصلوا مع صانع اللحن على : catch22beatz@gmail.com وتتواصلوا مع صانع الأرت وورك : omarmustafa671@gmail.com
Sat, 28 Nov 2020 - 58min
7 - تجارب وشخصية ملاك التائب والكتابة
الحلقة 7
تهدريزة مع ملاك التائب صاحبة مدونة
(My Life as a Human and as a Libyan)
هدرزنا فيها على كيف لقت روحها فى الكتابة وكيف تجاربها خلتها تعرف شن اللي يمشي معاها, وهدرزنا شوية على نوع شخصيتها وكيف الكتابة ضافت لشخصيتها ومهاراتها.
تهدرزية عميقة واستفدت منها شخصيا ويارب تستفيدوا منها حتى انتوا.

<3
رابط المدونة:
http://mylifeasahumanandasalibyan.blogspot.com/
تقدروا تتواصلوا مع صانع اللحن على : catch22beatz@gmail.com
وتتواصلوا مع صانع الأرت وورك : omarmustafa671@gmail.com
Thu, 19 Nov 2020 - 54min
6 - كيف نعرفوا ونتعاملوا مع اختلاف شخصيتنا مع غيرنا؟
اختلاف شخصيات البشر وحدة من أكثر الحاجات اللي مخليتنا مميزين ومتكامليين ووجودنا مهم لبعض, ووحدة من الحاجات اللي مخلية المشاكل وسوء التفاهم بينا كبير. لما مش قادرين نفهموا بعض ولا نفهموا كيف نفكرو يزيد الفراغ اللي بينا ويخلي تواصلنا مش فعال.
وهذا علاش فهمنا لروحنا ولموضوع نمط الشخصيات مهم هلبا وحاجة تسهل الشغل والتعاملات مع البشر.
هذا اللي دويت عليه فى حلقة اليوم اللي تكلمت فيها بتفصيل على الأنماط
اللي العلماء اختاروها وحددوها في اختبار زي ديسك مثلا.
وطبعا شخصيتنا أعمق من ان تتحدد باختبار واحد في الاعتقادات والقيم والمبادئ واللي حتى هيا تختلف من شخص لشخص.
يارب تستفيدوا <3
Sun, 08 Nov 2020 - 06min
5 - شخصية الانسان وتطورها
معظم اختلافات البشر واللي تسبب في سوء تفاهم ومرات مشاكل بيناتهم جاية من انهم مش فاهمين بعض, وباش نوصلوا لنقطة نفهموا بعض لازم ما نعرفوا ان الانسان يتكون من هلبا حاجات ووحدة منهم شخصيته وونوعها. موضوع الشخصية موضوع عميق هلبا. فى الحلقة هذه حكيت على تطوير الشخصية واختبار الديسك اللي يساعدنا نعرفوا شن انماط شخصيتنا بطريقة مبسطة ومختصرة. موضوع فادني شخصيا فى ان نفهم روحي واهتماماتي ونفهم الناس اللي حواليا وخاصة القراب منهم. رابط لاختبار بالانجليزي https://www.123test.com/disc-personality-test. تقدروا تتواصلوا مع صانع اللحن محمود والفنان عمر اللي رسم الArtwork Omar: omarmustafa671@gmail.com Mahmoud: catch22beatz@gmail.com
Sat, 31 Oct 2020 - 10min
4 - الإعتقاد الذاتي ونظرتنا لروحنا
لو سألتك شن نظرتك لشخص معين, الإجابة ساهلة وواتية ديما. .لكن لو سألتك شن نظرتك لروحك؟ ماعتقدش الجواب حيكون ساهل, وهذا اللي حنحكي فيه في حلقة اليوم وهيا "الاعتقاد الذاتي" واللي يتكون من تقديرنا لروحنا ومن الصورة الذاتية. الاعتقاد الذاتي واحد من أعقد المواضيع لكن يقربك خطوة ان تفهم روحك وتفهم علاش فى حاجات مهمة عندك أو فى حاجات معرقلة وصلوك للي تبيه. يارب تستفيدوا الشكر مقدم للفنان عمر اللي رسم صورة البودكاست والفنان محمود العمراني اللي صنع اللحن اللي فى الخلفية.
Tue, 06 Oct 2020 - 08min
3 - كيف تتكون العادات وكيف نتحكموا فيها؟
.كيف تتكون عاداتنا اليومية وكيف نغيروهم او نديروا عادات جديدة.
تكوين العادات محط اهتمام هلبا علماء, خاصة انهم عرفوا انه يقدروا يتحكموا في العادات هذه.
. في الحلقة 3 من بودكاست (نبي نفهم) حنحكي على حاجات تعلمتها من كتاب قوة العادة
The power of habit و فى بحث قريته مؤخرا لجامعة امريكية يحكوا فيه على علم النفس والعادات.
ان نعرفوا كيف تكونت عاداتنا اليوم حاجة تساعدنا في ان نحسنوا عاداتنا ونوقفوا العادات اللي مش صحية.
هذا اللنك للبحث:
https://doi.org/10.1146/annurev-psych-122414-033417
Fri, 18 Sep 2020 - 08min
2 - عقلية المنتصر مع خديجة المهلهل
الحلقة الثانية هيا تكملة لموضوع الحلقة الأولى وفيها تفاصيل على عقلية الانسان وكيف يواجه الصعوبات وحنهدرز فيها على مثال حي وهيا خديجة المهلهل وكيف واجهت فقدانها لبصرها. يارب التهدريزة هذه تكون ممتعة وتساعدكم تفهموا كيف عقلية المنتصر تفكر.
Thu, 03 Sep 2020 - 13min
1 - عقلية الضحية victim والمنتصرvictor ؟
كيف تتكون شخصية الانسان وكيف كل حد فينا يتبنى عقلية من العقليتين هذم.
Wed, 26 Aug 2020 - 05min

Show More Episodes

Podcasts by Category

نبي نفهم

Podcasts similar to نبي نفهم