臺灣夜市Taiwan Yes

專訪：吳佩貞、陳婉嫈、張慧鈴 老師 《臺灣夜市Taiwan Yes!》台語教師系列第四集，邀請張慧鈴、吳佩貞佮陳婉嫈三位老師，分享in按怎對家庭、教學佮生活行入台語、金門話的世界。 對金門來的吳佩貞老師，用金門話唱出故鄉的山、海佮人情。伊表示，金門話佮台語雖然有共同的語言根源，毋過無論變調、腔口抑是用詞，攏有家己的特色。金門話經過長期倡議，正式納入國家語言體系，毋過提著名分只是第一步，真正重要的，是按怎予語言繼續活落去。 吳佩貞建議，公車、機場、飛行機佮觀光景點攏會當增加金門話，閣會當邀請國小、國中佮高中的學生參與錄音。按呢毋但來金門的旅客聽會著，囡仔嘛會佇日常生活中，自然接觸家己的語言。雖然已經退休，伊猶原投入本土語言教育，甚至學習手語，因為對伊來講，「學一種語言，就加一个世界」。 另外教國文的的張慧鈴老師，出世佇做油飯的家庭。對阿媽彼代開始，厝內就替人準備油飯。逐擺若有人訂貨，半暝一、兩點就愛起來做。看著爸母的辛苦，伊嘛會起來鬥相共。油飯毋但是家族的生理，嘛是一家伙仔共同的記持。 原本教國文的張慧鈴，考入學校無偌久就拄著減班，險險去予人調往僻遠的學校。彼時囡仔才出世三、四個月，交通佮照顧的問題，予伊煩惱甲直直流目屎。後來學校因為台語課程需要人力，伊才有機會留落來。這段經歷，嘛意外改變伊的人生。 毋過，教學現場的挑戰猶真大。一班四十个高中生，可能干焦十个會當用簡單的台語應答。張慧鈴鼓勵學生，講一句有分、唸予同學聽閣再加分，予逐家慢慢仔開喙。雖然學生兩冬無接觸了後，定定閣會共學過的「還」倒轉來，伊猶認為語言需要長時間累積，袂當因為短期看袂著成果就放棄。 陳婉嫈的台語啟蒙老師，是鹽分地帶的重要作家黃勁連。佇臺南社教館學台語的過程中，老師毋但教語言，嘛教台灣歷史，予原本讀中文系的伊，重新理解家己佮這片土地的關係。伊講，進前甚至無意識著家己袂曉講台語；開始學習了後，對人生、社會佮國家的看法攏總反一大反。 面對高中佮高職學生，陳婉嫈認為台語課，毋通一下仔窒傷濟內容，愛先設計活動，予學生共學著的語詞實際用出來。程度較好的學生，嘛會當協助猶無遐熟的同學。若會當進一步佮專業科目合作，就會當真正用佇生活佮工課之中。 三位老師行過無仝款的人生道路，煞攏佇台語相拄搪。對家庭的油飯芳、金門的記持，到台南的文學，台語攏等待，咱重新開喙，共伊講轉來。

專訪：楊珮琪、尤碧慈、游巧玲 老師 臺語欲行入校園，需要老師共語言佮歷史、文化以及生活連結起來。《臺灣夜市Taiwan Yes!》邀請游巧玲、尤碧慈佮楊珮琪三位老師，分享in佇教學現場教台語的經驗，以及對台語教育的想像。 目前佇國中教歷史的游巧玲表示，這馬的歷史課本已經漸漸改對台灣出發，看向世界。比起過去以中國史做中心的教材，台灣史佮學生生活的所在較接近，嘛較會當引起學習興趣。伊過去就不時佇歷史課內底加入台語，用較趣味的方式介紹台灣史。除了教學，伊嘛參與台語舞台劇演出佮配音課程，對無仝款領域拓展台語使用的可能。 佇內湖國中教國文二十外冬的尤碧慈指出，當地學生講台語的機會較少。老師用台語講課了後，定定愛閣用華語解說一改，學生才有法度理解。雖然台語佇升學競爭的環境內底，較無受重視，伊猶原指導學生參加台語比賽，進一步投入台語教學。未來嘛欲共語言的趣味、民間智慧以及文化智識，融入國文佮台語課程。 楊珮琪對家庭佮教育兩方面實踐台語。伊的查某囝投入小學教育，嘛兼教台語；後生選擇臺北教育大學台語系，成為頭一屆的新生。對臺灣歷史、文學佮文化繼續深造。伊支持囡仔照興趣選擇家己的人生道路，認為台語程度就算猶未遐扭掠，嘛會當對基礎開始學。 三位老師攏認為，台語無應該只是比賽、抑是偷偷仔講的語言。對課堂內的一句台語開始，沓沓仔提懸使用的比例，共台語融入歷史、文化佮日常生活，未來才有機會光明正大，予台語成為學校的「正課」。

《臺灣夜市Taiwan Yes!》主持人阿旻這集邀請康瑞宗、邱麗慧佮林佳慧三位老師，分享𪜶按怎對本身的學科專業出發，共台語帶入校園。 康瑞宗：對國文專業行入台語 佇多元校園開拓母語新視野 康瑞宗本底是國文老師，過去嘛捌擔任學校的組長佮主任。因為教務主任鼓勵，伊參加師大五年的台語師資培育課程，重新轉來做學生。細漢予阿媽𤆬大漢的伊，本底聽有嘛會曉講台語，毋過過去爸、母用台語問，伊定定用華語應。學台語了後，伊毋但閣共台語抾轉來，嘛對語言行入文化、民俗、宗教、現代文學佮小說的世界，接觸過去國文教育較少講著的內容。 康瑞宗服務的華僑高中，有真濟對印尼、越南、泰國佮緬甸來的學生。伊認為，面對語言背景無仝的學生，台語課程愛對基礎開始，嘛愛按照𪜶的生活經驗設計。未來伊希望共五年來所學的智識化做課堂的養份，予本地佮外國學生攏會當透過台語，閣較深入認捌臺灣多元的語言佮文化。 邱麗慧：英語鬥台語 用宜蘭腔佮生活體驗予囡仔趣味學母語 來自宜蘭的邱麗慧是英語老師，因為國、高中開始開設台語課，伊參加台語認證，愈學愈感覺趣味，嘛想欲共台語教學變做退休了後的第二春。伊認為，逐種腔口攏愛有人傳落去。過去宜蘭腔捌予人笑做「庄跤腔」，這馬愈來愈少人講，伊煞愈感覺愛用宜蘭腔教宜蘭囡仔，予地方的聲音，繼續留落來。 邱麗慧定定佇英語課講台語，嘛佇台語課講英語，學生攏講伊是「三語老師」。伊會利用囡仔已經有的英語基礎，幫助𪜶理解台語的發音，嘛透過食食、影片、錄音、寫詩佮演戲等等的活動，予課程閣較好耍。學校也設計作業，鼓勵學生用台語佮序大開講、錄做影片。伊相信，學語言上重要的是興趣，囡仔感覺好耍，才會願意共台語佇生活中使用。 林佳慧：數學嘛會當用台語教 對生活語詞練習邏輯佮思考 林佳慧是數學老師。伊觀察，台北的家長佮學生較注重英語、國文、數學等等的考試科目，影響逐家對無考試的台語學習，意願自然就降低。為著引起囡仔的興趣，伊會先透過影片共學生𤆬入來，閣用生活中看會著的物件，予台語佮日常經驗產生連結，降低開喙講台語的壓力。 林佳慧嘛參與校內跨領域計畫，佮各科老師做伙共台語融入正式課程。伊用「數線」做例，透過向正爿、向倒爿佮單位的變化，引導學生用台語理解數字、位置佮空間，證明數學觀念嘛會當用台語講清楚。伊認為，數學是訓練邏輯佮組織能力，台語予學生用另外一種語言思考。

專訪：中學教師陳雅玲、蕭雅文、游千慧 陳雅玲：對國文老師變台語推廣者 予高中生閣認捌母語 陳雅玲老師佇臺北市立大學附屬高中服務，本底是國文老師，因為校內欠台語師資，主動報考台語認證，對遮踏入台語教育的領域。伊分享，家己雖然對細漢就佇台北大漢，厝內有時會講台語，毋過成長的過程差不多無使用台語的環境。所以，重新學台語，對伊來講嘛是挑戰家己的過程。 面對高中學生，伊發現真濟囡仔對細漢就捌上過本土語言課，煞真少有實際運用的機會，聽有，煞毋敢開喙講。伊認為，高中的台語教學著愛閣較接近生活，袂使干焦照教材教，愛予學生感受台語佮日常生活、家庭以及文化的連結，才有法度真正提升𪜶學習的動機。 蕭雅文：共家政課變做台語教室 對飲食文化認捌臺灣 臺北市北投區桃源國中教家政科教師蕭雅文，過去捌佇臺南白河服務。彼段時間，伊感受南部豐富的台語生活環境，嘛予伊重新認捌家己的母語能力。伊出身嘉義家庭，自細漢就佇台語的環境當中成長，所以希望共這份語言佮文化帶入去課堂，結合家政教育，予學生透過食食、食材佮料理來認捌臺灣文化。 蕭雅文老師分享，北投的學生大部份攏聽有基本的台語，毋過欠缺開喙講的機會。所以，伊設計唱台語歌、影片配音佮模仿戲劇等等的活動，引起學生的興趣，嘛予台語學習變甲自然閣趣味。伊閣共食材名、傳統料理佮𪜶背後的文化故事融入家政課，希望學生毋但學會曉台語，閣會當理解臺灣食食文化的價值，透過日常實踐，予母語真正行入校園。 游千慧：用台語行向世界 予母語成為國際交流的橋 游千慧老師來自宜蘭，有外文專業背景，嘛捌做過網路新聞記者。大學佇臺大讀冊的時，伊參加台語文社，重新揣轉來家己的母語，嘛接觸客家佮臺灣多元族群的文化，予伊深深體會保存語言的重要。後來因為投入教師培訓，伊閣再共台語抾轉來，並且共語言教育佮國際交流結合做伙。 游千慧老師長期經營國際教育社團，逐年嘛響應世界母語日，𤆬學生用台語、英語佮臺灣各族群的語言向世界介紹家己，嘛佮日本、韓國、印度、印尼、馬來西亞、摩洛哥等等的國家師生進行線頂交流。伊也鼓勵學生勇敢使用家己的母語，嘛愛學習尊重世界各地無仝的文化，予台語成為臺灣向世界發聲的重要文化名片。

專訪：台語巢成員 王詩涵/余宥潔/阿Ｑ 台語現代化，這陣嘛是少年家創作、研究佮實現夢想的工具。《臺灣夜市Taiwan Yes!》主持人阿旻繼續邀請「台語巢」三位少年成員詩涵、宥潔佮阿Q，分享𪜶對台語比賽行入台文創作、Podcast、文史研究佮語言復振的故事。 三位受訪者對台語的熱情有夠強，宥潔透過特殊選才考牢成功大學台灣文學系，對高中階段就定好目標、準備三年的資料，總算完成家己的心願。 阿Q是予阿公、阿媽𤆬大的囡仔，對細漢就慣勢講台語。一直到國小讀本土語言課，伊才發現，原來毋是逐个囡仔攏會曉講台語。經過老師鼓勵，伊開始參加台語演講比賽，嘛對遮發現台語，毋但會當佇厝內開講，閣會當正式徛起去舞台。這馬伊參與Podcast製作，希望用聲音佮網路，予閣較濟人聽著台語。 詩涵是對大學開始接觸台文，伊嘛想欲繼續讀台文研究所，研究台語語法，嘛用台文書寫家己佮阿媽的生命記持。伊以「鹽水泡飯」做題目，寫出破病時阿媽照顧伊的情景。簡單的鹽佮飯，毋但有祖孫之間的疼痛，嘛表現台灣人佇艱苦生活內底，猶原無放棄的性格。 「台語巢」予成員按照興趣參與主持、文字、錄音佮影像製作。三位少年家用行動證明，台語毋是干焦為著比賽，嘛毋是留佇過去的語言。當當少年家願意講、願意寫、願意創作，逐个人攏是火種，會當共台語的火繼續傳落去。

專訪：台語創作者黃啟軒、肉圓仔 《臺灣夜市Taiwan Yes!》主持人阿旻繼續專訪少年台語創作者黃啟軒，佮伊的Podcast搭檔「肉圓仔」，對台語學習、網路世代、地方文化，一路講著台灣社會的未來。兩位少年囡仔面對歷史、語言佮文化議題，已經有非常深入的觀察。 講著網路世代，黃啟軒坦白講，演算法予仝款意見的人愈來愈集中，社會頂懸欠缺理性討論的空間。伊家己嘛捌予手機佮網路縛牢咧，逐工接收大量資訊，煞愈來愈少深度思考。考著大學了後，伊開始練習離開手機仔、加讀一寡冊，重新思考生活的能力。肉圓仔嘛分享，家己捌因為網路頂懸的美貌佮精彩生活感覺自卑過，後來透過佮媽媽開講，才漸漸了解社群媒體所呈現的，毋是一个人生活的全部。

受訪者：國立陽明交通大學 廖元甫教授 AI會曉聽台語、講台語，敢代表台語科技，就已經成功？《臺灣夜市 Taiwan Yes!》繼續訪問國立陽明交通大學廖元甫教授，對語言學習、智慧通譯、低資源語言佮AI主權，探討台語科技的後一步，欲行去佗位。 廖教授指出，科技團隊會當開發語音辨識、翻譯、語音合成佮大型語言模型，毋過，真正知影學生按怎學、老師需要啥物教材的人，猶原是第一線教育工作者。 若欲發展AI輔助台語學習，工程師、台語老師、學生佮家庭愛做伙投入。科技團隊提供親像樂高積木仝款的基礎模組，使用者閣依照教學現場的需求，設計真正實用的工具，按呢才有法度建立通久久長長發展的生態系。 未來，學生下課了後，可能會當佮台語AI練習對話，請伊修正講法；民眾去辦代誌，嘛可能透過智慧通譯機器人，用台語得著服務。 廖教授閣提出一个更大的想像：親像《星際大戰》會曉六千萬種語言的C-3PO，敢有可能打造一个智慧通譯機器人，予人用台語學習全世界的知識，嘛予國際社會認捌臺灣？ 台語屬於低資源語言，佮其他親像加拿大原住民族語、威爾斯語佮世界真濟弱勢語言，攏有資料不足、使用人口減少的危機。若準臺灣會當建立成功的技術佮合作模式，台語經驗就有機會成為國際案例，協助其他語言行入AI時代。 廖教授強調，國際化的基礎其實是本土化。若準臺灣干焦提供英語佮華語，佮其他所在無啥物差別；台語佮多元語言，才是臺灣上特殊的文化資產。加上AI猶咧起步，語言嘛猶未失去希望。重點是老師、學生、社群、政府佮產業敢會當做伙，予科技毋但保存台語，閣會當予人佮人之間的台語對話繼續流傳，敬請收聽《臺灣夜市 Taiwan Yes!》。

專訪：國立陽明交通大學教授 廖元甫 《臺灣夜市 Taiwan Yes!》這集邀請廖元甫教授，對電腦、語料庫佮大型語言模型出發，開破科技按怎成為台語復振的新工具。 台語教育面對兩項大困難，一个是老師無夠，一个是學生離開教室了後，欠缺會當練習的語境。廖教授的團隊希望開發會曉聽台語、講台語的大型語言模型，予電腦成為老師的助教，協助準備教材；嘛會當成為學生的練習伴，予in轉去厝裡，猶會當繼續用台語問問題、學智識。 欲予AI學會台語，資料就是上重要的基礎。團隊透過教育部計畫，整理公共媒體、網路影音佮會議錄音，建立語音佮文字會當對應的語料。對人工校正的高品質資料，到電腦自動掠的大量素材，攏是訓練模型袂當欠缺的養分。未來，台語聽寫、會議紀錄、字幕、摘要佮關鍵字整理，攏會使透過AI完成。 廖教授嘛提醒，AI時代真正重要的，毋是人會曉寫偌濟程式，顛倒是敢會曉清楚表達問題、組織想法佮提出判斷。台語、客語、原住民族語，攏面對資料無夠的挑戰。語言科技的發展毋是相搶資源，是愛共享經驗、做伙建立臺灣家己的AI能力。敬請收聽《臺灣夜市 Taiwan Yes!》。

專訪：基隆二信高中學生 張語宸 《臺灣夜市 Taiwan Yes!》節目邀請基隆二信高中學生張語宸，分享伊自國小開始就投入台語朗讀比賽，已經提著國小、國中kah高中三座全國冠軍。除了語言專長，張語宸目前讀藍碳實驗班，關心環境kah能源等等的公共議題。 少年世代展現新的台語使用者面貌，張語宸講：未來會koh參加社會組的台語朗讀比賽，阿旻鼓勵愛共語言，「行入社會的應用」，不只是停留佇「社會組的語言競賽」。 雖然無一定愛成為語言工作者，毋過透過日常生活繼續講台語，本身就是語言復振上重要的力量。張語宸16歲少女的故事，嘛予咱看著台語傳承的新希望。 張語宸相信，「台語一定愛靠阮這代繼續講落去，若無，講的人會愈來愈少。」主持人阿旻也建議語宸，佇AI時代，會當發揮語言專長kah理科的頭殼，幫助台語建立新的AI語言模型kah AI主權。

專訪：新竹市本土語推廣協會 前理事 游沛綺 《臺灣夜市 Taiwan Yes!》節目邀請新竹市本土語推廣協會前理事游沛綺Nóo-lah，分享伊行入校園推動台語教育的第一線經驗。Nóo-lah自2010年代開始投入台語復振，後來進入新竹科學園區邊仔的學校教台語，才發現真濟孩子連「菜頭粿」都聽無。 Nóo-lah指出，台語教育的問題毋是單一孩子袂曉講，是規个語言環境出問題。學校一禮拜一節課，下課踏出教室，生活內底就無台語。家長重視英文kah升學，台語四常被看做無路用的科目，這是語言復振上大的結構挑戰。 面對這款現場，Nóo-lah用民主、人本的方式設計課程。低年級用故事、配音、遊戲kah合作任務，引導孩子開喙講台語。伊強調，語言愛先予孩子感覺有趣，才有機會變成生活的一部分。 中高年級的課程，Nóo-lah改用《小王子》台文版、媽祖出巡等等的主題，予學生用台語熟似世界、理解在地文化。伊相信，台語不只是數念過去，mā會當講科技kah公共議題。 主持人阿旻指出，台語教育若欲成功，除了老師愛有熱情，koh需要制度支持。Nóo-lah也主張，台灣需要建立官方語言制度，予本土語進入政府、學校、公共空間kah就業條件，形成真正沉浸式的語言環境。 自遊戲到制度，Nóo-lah的故事提醒咱：台語復振愛有人佇教室內陪孩子開喙，更加愛國家社會共規片語言樹林顧予好勢。

專訪：作家 吳品瑜 《臺灣夜市 Taiwan Yes!》節目邀請作家吳品瑜分享新作品《誰是黃欣？》。作品以日本時代台南仕紳黃欣做主角，透過小說重新共台灣人對本土歷史人物的記持叫精神。 吳品瑜指出，黃欣除了是企業家、政治人物，mā是慈善家kah文化推手。伊的一生有五十外个職務，不而過無予身份限制，面對台灣議會請願運動等等，猶原願意出面請律師、救人，展現台灣人佇殖民時代的勇氣kah智慧。 節目中，吳品瑜特別講著台南大舞台的故事。1924年上海劇團來台南演出，因為中人走路，五十外人無錢轉去上海，黃欣kah府城人士共同包票支持，最後協助劇團平安轉去中國。吳品瑜形容這段歷史，予人看著百冬前，就實現「Taiwan can help」的精神。 主持人阿旻指出，黃欣的故事除了是挖歷史，koh是台灣人重新共認同揣轉來的過程。吳品瑜開七冬寫作、三冬揣資料，自黃欣6百外條漢詩內底，看見台灣人用漢文、台語保存思想kah情感的力量。 作品也延伸到校園舞台。台南家齊女中學生共《誰是黃欣？》改編做台語讀劇，用母語講台灣人的故事。吳品瑜感動表示，少年人透過台語演出，會當重新發現母語，會當表達koh較深層的感情。

綜合訪問：臺文作家洪明道、臺語文運動者陳豐惠、少年臺文創作者王詩涵＆孫翊倫、臺語Hip-hop音樂人黃啟軒、家庭語言實踐者四寶媽、德國語言學者君德、臺灣AI研究團隊廖元甫教授。 欲消滅一種語言，可能只要一个政策命令。不而過，欲共伊救轉來，煞可能需要一个世紀。 《臺灣夜市Taiwan Yes!》製作「佇AI 袂記得進前：臺灣走揣語言的百年旅程」，結合歷史聲音，人物訪談、文學創作、音樂、人工智慧佮聲音設計的創新廣播專題。 專題由兩改國語經驗開始講起，透過七十外冬的歷史錄音：蔣介石抗戰勝利講話，加上國語運動推動參與者何容等等的聲音檔案。並且訪問臺文作家洪明道、臺語文運動推行者陳豐惠、少年臺文創作者王詩涵佮孫翊倫，Hip-hop音樂人黃啟軒、家庭語言實踐者四寶媽、德國語言學者君德、臺灣AI研究團隊廖元甫教授等等十外位受訪者。 內容由家庭、教育、文學、音樂、科技等等的角度出發，呈現語言流失，毋是自然發生，顛倒是歷史政策、社會觀念佮世代創傷共同造成的結果。 節目當中，洪明道分享家己猶因為「台灣國語」，媽媽送伊去接受正音教育，甚至去手術「擢舌根」的經驗，證明國語政策的世代創傷。陳豐惠老師反省細漢的時，捌糾舉講台語的同學。不而過，投入台語文運動了後，也重新思考臺灣這段猶未完成的語言轉型正義。 少年世代成立語言巢，透過文學、音樂創作，台語家庭投入台語親子教育，用屬於in 的方式，重新共台語建立佇日常生活。 節目後半段共視角，延伸到人工智慧。當當大型語言模型成為未來人類主要的智識入口，若AI無台語語料，語言可能毋是消失佇公共空間，顛倒消失佇數位世界。透過國立陽明交通大學AI團隊，廖元甫教授分享按怎建立台語大語言模型、語音資料庫佮 AI語言主權，提出語言復振進入AI時代的新課題。 《佇AI 袂記得進前》不只是討論台語，嘛提出全球瀕危語言共同面對的問題。當當AI開始學習人類語言，人類欲留予AI啥物聲音？這毋是臺灣獨有的課題，嘛是全球語言文化共同的未來。 透過聲音穿過歷史、人物生命故事佮未來科技，將語言復振由文化保存延伸到AI治理，期待予世界聽見：真正需要記得語言的，毋是AI，是咱家己。

專訪：音樂人 黃靜雅 《臺灣夜市Taiwan Yes!》邀請台語音樂創作者黃靜雅，來節目分享伊自《看月娘》到《春天佇佗位》，堅持用台語寫土地、寫情感的音樂故事。甚至到這陣，猶咧繼續投入台語囡仔歌的創作。二十外年來，伊ê歌陪伴誠濟人大漢，也予誠濟人重新發現台語ê媠kah力量。 黃靜雅過去讀大氣科學系，踏入台語創作ê路，竟然kah伊ê大學同班同學──台語搖滾先知先覺朱約信（朱頭皮）有關係。一个溫柔、一个充滿創意，看起來風格全然無仝ê音樂人，共同對台語kah音樂有真大ê熱情，建立超過三十年ê友誼kah創作緣分。 對一首歌曲，一張專輯，到一齣音樂劇；對一場演出，另外koh欲挑戰一百場ê夢想。《春天佇佗位》音樂劇，累積超過三十幾場演出，今年十月就beh佇台北兒童新樂，定目演出六十場，離「一百場」ê目標愈來愈倚近。這毋但是一齣音樂劇ê成功，mā是台語文化繼續向前行ê證明。 當當有人煩惱台語，愈來愈少人講ê時，黃靜雅選擇用歌聲掖種。伊相信，只要繼續唱、繼續寫、繼續演，春天就會一直佇咧。因為春天，一直佇台語。

專訪：漁業科主任蕭承胤、蔡天益老師、蔡宇三老師、許智宇老師 金門四面環海，海洋除了是地方生活的一部分，嘛是培育專業人才的重要資源。《臺灣夜市 Taiwan Yes!》這集來到金門農工漁業科，了解in按怎透過專業訓練佮證照制度，培育兼備技術、國際觀佮海洋素養的人才，替臺灣海洋產業注入新的活力。 現任漁業科主任蕭承胤，過去考過高考，嘛捌佇漁業署做工課。後來選擇轉來金門投入教育工作，並且推動全臺唯一設佇高中職的動力小船駕訓班，予學生佇學校內底就會當接受專業訓練，提早提著相關證照。 金門農工漁業科目前有完整的海事教育資源，包括實習船「金農二號」、動力小船駕訓設備，以及國內外航海實習機會。學生毋但會當考著相關證照，嘛有機會參與國際航海見習，培養全球視野。 佇AI快速發展的時代，海事專業猶原需要豐富的實務經驗佮現場判斷能力。蔡天益老師長期教漁業氣象、航海地圖判讀佮方向導航等等的課程。伊表示，出海作業上重要的是安全觀念佮專業判斷能力，所以學生對基礎的海象觀察、風向判讀開始學起，建立完整的海事專業知識。 實務經驗的傳授，也有做過漁業觀察員，來自澎湖西嶼的許智宇老師，離開故鄉來到金門農工教冊，共過去漁業觀察員的經歷，化作教材解說予學生囡仔聽。 另外一位老師是校友蔡宇三，因為細漢就誠愛藏水，所以選擇讀漁業科。畢業了後繼續進修，最後閣轉來母校教冊。不而過伊也分享，這陣的金門海域，佮過去細漢的海，已經無仝。受著中國境外的糞掃，海洋已經嚴重污染。也致使這陣的金門人，已經無遐爾倚近海。

專訪：遊戲製作人Maso Lim（林秉舒） 台語、文進入各大創作領域，實在是有夠衝，遊戲就是一例。《臺灣夜市 Taiwan Yes!》訪問遊戲製作人Maso Lim，伊分享伊開發《神影無踪廖添丁》台文遊戲ê歷程。 自碩士論文的想法湠到遊戲市場ê落實，Maso指出語言本身就是文化體驗ê一部分。伊認為台語文的實踐真重要，若準遊戲內底使用華語字幕，玩家腦中浮現ê聲音自然會變成華語，無法度呈現角色原本ê語感，所以堅持倩顧問用台文書寫，嘛請人來配台語，予遊戲玩家直接感受台語kah遊戲ê結合。 Maso表示，台文遊戲推出以後，也吸引親子kah少年族群關注，有遊戲玩家透過《廖添丁》遊戲開始接觸台文，甚至佇直播內底引發討論，展現語言推廣ê無仝可能性。 毋過，台灣遊戲產業猶原面對資金kah規模限制，較僫發展大型作品。Maso認為，台灣優勢是自由ê創作環境，會當自小型ê作品開始累積，建立在地IP。未來結合文化、故事kah遊戲設計，台語內容真有機會，透過數位遊戲產業，形成長期ê影響力。

專訪：遊戲音樂製作人 楊尚峯 你敢有想過，音樂佇咧遊戲內底的重要性？對耍遊戲的玩家來講，音樂確實是體驗ê重要元素。《臺灣夜市 Taiwan Yes!》訪問遊戲音樂製作人楊尚峯，伊分享投入數位音樂創作七、八冬ê經驗，指出音樂不只是背景，嘛是引導情緒kah強化劇情ê關鍵角色。尚峯表示，過去自博弈類的遊戲到動畫、廣告，甚至實體店面，攏需要原創音樂來建立氣氛，毋過創作過程內底，kah業主ê溝通，攏比作曲本身閣較重要。透過來來回回ê討論、修正kah測試，才會當完成符合畫面kah角色ê作品。 楊尚峯認為，台灣音樂創作環境激烈競爭，科技變化快速，加上創作者多數較內向，予產業發展較有挑戰性。面對AI音樂興起，伊指出目前猶原無法度完全取代專業製作，但是會當做為輔助工具，提升效率。伊強調，真正ê關鍵，是佇創作者本身ê音樂理解kah創意。展望未來，伊希望繼續拓展跨領域合作，自遊戲延伸到影視、商業空間等等ê應用，並且累積台灣原創ê IP，予音樂也是成為推動遊戲文化內容，行向國際ê力量。

專訪：遊戲製作人 余政彥 Allen Yu 影視kah遊戲跨界發展，台灣IP行向多元應用。《臺灣夜市 Taiwan Yes!》訪問遊戲製作人Allen Yu，伊分享改編經典台語齣《臺灣霹靂火》做遊戲ê經驗。Allen指出，這款計畫就親像內底ê經典臺詞「一支番仔火」，希望共台灣IP新性命點予著（to̍h，點燃），透過遊戲形式，予少年世代重新熟似過去經典。 為著還原經典戲齣，遊戲團隊重新看百外集戲齣，整理劇情精華；也加入創意，針對現代流行文化調整文本，加入多元結局、戀愛互動 kah RPG戰鬥系統，提升沉浸體驗，予耍遊戲ê玩家，會當融入「參與」故事。Allen表示作品特別重視台語配音kah文化呈現，並且規劃國際市場，期待透過遊戲共台灣故事推向全球。 主持人阿旻也分享過去台語影視，早就已經流傳到東南亞，有跨文化ê潛力；未來若結合影視、遊戲kah串流平台，就會當形成完整 ê IP生態。面對日本、韓國等等ê強勢市場，Allen認為台灣雖然起步較慢，毋過技術門檻已經降較低，創作者會當用較低ê成本投入創作。伊強調，只要有好故事kah在地文化，就有機會共這葩火點予著、行向國際。

專訪：遊戲製作人 何威毅（River） 全球內容產業競爭激烈，台灣創作環境較屬於個人、小群組ê獨立製作，四常愛面對資金不足ê挑戰。《臺灣夜市 Taiwan Yes!》訪問遊戲製作人何威毅（River），伊分享投入創作三十外冬ê經驗，指出台灣創作者其實真有實力，毋過長期欠缺資本支持，愛佇真有限資源之下完成作品。伊表示，國際親像韓國這寡成功ê案例，攏是政府大量投入資金，才會當建立產業規模。回頭看台灣，真濟創作者甚至需要賣厝，來完成作品，顯示產業發展ê困境。 何威毅認為，台灣未來ê機會，是結合在地文化kah創新故事，發展台灣味ê內容。伊指出，台灣獨立遊戲，最近幾冬，已經展現國際競爭力，創作者之間也形成互相支持ê環境，是重要ê優勢。伊用家己「台語鬼仔厝」ê遊戲作品做例，共台灣公寓、宮廟等等ê日常轉化做遊戲內容，強調在地就是國際。伊也鼓勵少年人主動創作、分享作品，透過好故事，吸引世界熟似台語kah台灣文化，為本土創作開創新出路。 閣較精彩的內容，敬請鎖定《臺灣夜市 Taiwan Yes!》。

專訪：遊戲製作人 簡明哲 隨數位內容ê發展，台灣遊戲產業也經歷變化。《臺灣夜市 Taiwan Yes!》訪問投入遊戲產業超過四十冬ê創作者簡明哲，分享伊自少年時代愛耍電動遊戲，到進入美術設計kah電腦創作ê歷程。伊講著，早期台灣社會對「耍電動」有真濟負面印象，家庭也強烈反對，毋過透過畫圖kah電腦工具，沓沓仔行入遊戲創作ê世界。簡明哲指出，台灣電動遊戲發展早期多數受著日本文化影響，毋過這陣台灣ê本土文化，也已經開始變成台語遊戲IP ê 重要起點，展現出台灣文化ê獨特性。 簡明哲認為，台灣文化ê優勢就是包容性，會當吸收世界各地ê元素，閣再用台灣ê角度重新解釋，形成「台灣味」。面對中國ê大市場，簡明哲強調台灣無需要硬去拚規模，顛倒應該重視文化深度kah價值，發展有在地特色ê創作。 簡明哲也指出這陣創作者，面對市場壓力，共作品做出來，並毋是上大ê困難，是按怎予作品被看見，才是真正ê挑戰。伊建議少年創作者，應該加強思考能力，自生活經驗出發，發展屬於台灣ê文化內容，才有機會行向國際。

專訪：國立陽明交通大學傳播與科技學系教授 魏玓 隨數位串流平台ê發展，觀眾愈來愈習慣用倍速來看影視作品。《臺灣夜市Taiwan Yes!》訪問國立陽明交通大學傳播與科技學系教授魏玓，伊指出這款「快轉文化」，反映時間被切予幼幼幼，真破碎。 若準用倍速觀看，魏玓講創作者，透過作品想欲傳達ê情感kah意義，其實是看袂著，看影像ê經驗也會變薄。閱聽人其實會當透過練習，有機會重新建立完整ê觀看能力。 魏玓也分析短影音時代，過去流行「幾分鐘看完一齣戲」，這款內容雖然方便閱聽人理解劇情，毋過畫面、細節、角色表情kah節奏攏總被犧牲。 面對這款趨勢，魏玓提出「慢步佇雲頂」，慢慢仔看影視ê方式，主張用慢節奏重新感受影像的力量，也對抗時間碎片化。 魏玓認為看影集、電影，不只是理解故事，嘛包含直觀感受、美學技術kah社會脈絡ê閱讀。 另外一種趨勢，是商業創作為著留觀眾，需要頭幾分鐘就「下重藥」，魏玓指出，這也可能壓縮多元講故事ê空間。閣較濟精彩內容，敬請收聽《臺灣夜市Taiwan Yes!》。

《臺灣夜市 Taiwan Yes!》閣一改來到金門，訪問金門高農鄭延榕佮陳麒安兩位學生，in過去捌參加台語情境式演說比賽，對金門話有真深的情份。 鄭延榕佮陳麒安兩个人，自細漢就熟似對方，兩家伙仔情誼也真深，聽in節目頂的對話，有影展現好感情。 兩个人攏出身金門縣金湖鎮，雖然生長佇這个真有文化牽挽的環境內。延榕過去也因為參加本土語言的競賽，開始產生疑問，「是按怎爸爸、媽媽攏佮阿公 、阿媽這輩講金門話，但是無對伊講」？勇敢問出這个問題以後，爸爸、媽媽嘛開喙佮延榕講金門話，這就是一種鼓勵序大共語言講轉來的實踐。 延榕對金門話充滿感情，嘛希望透過家己个努力，繼續傳承金門話。麒安也承諾，雖然伊這陣猶無按呢做，但是會沓沓仔開始改變佮實踐。 鄭延榕佮陳麒安兩个人真緊就欲出業，in繼續約定，未來欲做伙到台灣讀冊，目標鎖定台科大，追求閣較懸的學問，嘛為家己的夢想拍拚。

專訪：台語巢成員 王詩涵/阿Ｑ/余宥潔 佇濟濟人ê印象內底，台語定定予人看做是「序大ê語言」，毋過有一陣由高中生佮大學生組成ê青年團隊「台語巢」，用創意轉踅這款想法。《臺灣夜市 Taiwan Yes!》 這回邀請三位成員來節目分享，按怎用台語做核心，透過社群經營佮影音創作，予台語行入去少年人ê生活。 「台語巢」這个名，源頭是毛利人復振族語「語言巢」ê經驗，強調對生活中重新建立語言ê使用環境。「阮想欲予閣較濟人知影，台語毋但干焦是傳統，嘛會當真貼近生活、真趣味。」 三位少年女同學攏有無仝ê背景佮故事，有咧讀中文系ê大學生王詩涵，進一步投入台文學習佮創作。高中生宥潔，透過特殊選才，已經考入去成大台文系，共語言興趣，甚至影響媽媽變做台語老師。 另外一位成員阿Q，本底叫是家己是巴賽族，就共巴賽語學起來。結果今年去掃墓，才發現原來家族仔是福佬客，但是既然已經學起來，就繼續共學予深。 佇訪問當中，詩涵嘛分享伊 ê創作成果，改編安徒生童話《小美人魚》變《海女阿珠的故事》，象徵台語ê歷史處境：受著壓迫所以台語「失聲」，毋過其實攏無消失。只要有人願意閣開喙，語言就會當閣重新活起來。 台語巢用實際行動證明，語言ê保存無干焦懷念過去，嘛會當透過創新繼續發展。這陣青年正正咧用in ê方式，予台語成為新世代ê文化象徵。

專訪：四寶媽盈燕＋其他五位家庭成員 《臺灣夜市 Taiwan Yes!》節目邀請一家六口，四寶爸爸、媽媽kah in 四个囡仔，特別分享台語家庭的生活經驗。上大漢--ê拄滿18歲，上細漢--ê才4歲，因為囡仔傷濟，有時陣閣愛用1號到4號，稱呼囡仔。不而過，這个六口之家長期堅持用台語做主要ê家庭語言，展現母語傳承ê力量，嘛呈現現代家庭教育ê多元面貌。 媽媽盈燕表示，伊對囡仔細漢時就開始用台語kah𪜶講話，因為「這是阿公、阿媽ê話」。初初佇都市環境內，開喙講台語有時仔，會感覺較歹勢，毋過隨時間過去，伊愈來愈堅定，甚至做到家庭內百分之百使用台語，予囡仔佇自然ê環境中學習、使用。 囡仔嘛分享，台語對𪜶來講更加是情感連結。「佇菜市仔抑是學校，用台語講話會感覺較親切，嘛較好交朋友。」透過語言，𪜶建立對社會kah土地ê感情。 佇教育方面，這个家庭並無選擇傳統補習ê路線。父母強調尊重囡仔ê選擇，鼓勵𪜶探索興趣。囡仔對細漢開始就分擔厝內事，培養責任感kah生活能力，看做日常學習ê一部分。盈燕表示，透過分工合作，嘛學會曉替家庭付出。 除了台語，囡仔嘛接觸其他語言kah文化，大寶學馬祖話、二寶學客家話四縣腔。主動去學習無仝族群ê語言，主持人阿旻也指出：「學一種語言，就是開一扇窗。」予囡仔看著較闊ê世界，嘛理解無仝文化ê價值。 毋過，台語教育佇學校體制內猶有挑戰。囡仔表示，學校ê台語課內容較簡單，袂當滿足𪜶ê學習需求，所以主動去揣資源，親像參加教會ê台語羅馬字課程拓展語言視野。 講著教養囡仔ê過程，媽媽盈燕坦白講，「辛苦一定有」，毋過收成閣較濟。隨囡仔逐个大漢，伊感受著台灣社會對語言kah文化多元ê重視愈來愈提升，嘛閣較確認家己ê選擇是有意義--ê。

專訪：台南高商學生黃啟軒、肉圓仔 《臺灣夜市 Taiwan Yes!》訪問台南高商學生黃啟軒，伊自台南七股魚塭仔大漢，結合興趣，創立Podcast節目《台語𨑨迌物》。另外一个身份是喋舌Rapper，用台語寫詞，做曲、做beat，結合生活佮青春經驗。已經透過大學特殊選才，錄取國立成功大學台灣文學系。 黃啟軒出世佇台語家庭，爸母攏做漁塭仔飼粉蟯，日常生活攏講台語。毋過細漢時，伊嘛捌因為講台語，蹛佇七股，感覺自卑、歹勢。一直到接觸嘻哈文化，開始思考語言佮自我認同的關係，才決心重新學習台語，透過網路資源開始學習，建立基礎。 阿軒主持的《台語𨑨迌物》，通講是高中生頭一檔的台語Podcast內容。伊對台語語詞，到故鄉七股的家庭記持kah生活景象，歷史調查攏總有。阿軒表示，創作的起點，是欲記錄故鄉的聲音，因為真濟語詞，若無傳落去，會慢慢仔消失。 和阿軒做伙來上節目的，是伊的女朋友肉圓仔，也是伊Podcast節目的主持同伴。兩个人佇節目頂，用開講的方式，針對個別的愛情觀，按怎受著原生家庭影響，和予in的養成，透過節目一一呈現。 伊認為，台語長期受著歷史語言政策影響，予人誤會是「較低俗」，其實台語「有音有字」，是完整閣美麗的語言。未來，黃啟軒希望投入台語文化研究佮教育，結合影像、節目佮生活，予台語毋只是過去的記憶，是當代生活的一部分。

專訪： 學生：葉宸貝、吳欣怡、卓祉呈、湯桀睿 指導：沈惠珠老師 《臺灣夜市 Taiwan Yes!》來到新竹科技城，訪問新竹市培英國中，全國語文競賽台語讀者劇場優等選手葉宸貝、吳欣怡、卓祉呈、湯桀睿四位同學，in共生活議題搬上舞台，用台語演出「手機仔使用佮自我管理」的課題，展現少年人對生活的觀察佮思考。 佇咧學生數量快速成長的新竹市，加上龍年大量生囡仔的人數競爭，四位同學也願意投入台語競賽，使人敬佩。團隊成員，差不多攏有和阿公、阿媽生活的經驗，無論是轉去到中、南部阿公、阿媽兜，或者是和新竹蹛附近的序大，自細漢就有台語的刺激佮環境，所以逐家攏對台語有真大的情份。 指導老師沈惠珠表示，台語毋是干焦佇課堂內底的科目，嘛毋是比賽爾爾，應該愛行入去生活。伊鼓勵學生對家庭出發，觀察身軀邊的事物用台語講出來，予台語真正活起來。這擺的成果，就是學生長期學習佮實踐的證明。 不而過同學也分享，和其他學生囡仔若講台語，會受著奇怪的眼光對待。若準拄著這款情形，卓祉呈嘛提出三步數來回應：第一步，自信面對，認同家己的語言文化；第二步，用親切的方式解說台語的媠；第三步，提供詞彙、案例，邀請對方做伙學習，予台語的世界更加開闊。這款態度，就會當化解誤解，嘛是推廣母語的重要方法。

全國語文競賽台語讀者劇場特優團隊：金門縣金城國中三年仔學生洪翊愷、許玉媚、蘇詠新、陳希祐組成團隊，用金門在地重要民俗 「迎城隍」 做劇場主題，共金門後浦廟會文化融入劇本內底。透過搭峇的對話，展現金門特殊的腔口佮語感，嘛予逐家看著金門文化。《臺灣夜市 Taiwan Yes!》特別來到金門縣，和這陣少年囡仔做伙學習金門話、認捌金門文化。 特優背後，是一段有笑有目屎的堅持 比賽上好的結果，當然是提著全國特優，毋過這條路並無輕鬆。主持人阿旻邀請四位同學講出比賽準備過程中，上真實的心聲，甚至笑講這是「少年、少女頭家分手大擂台」，予逐家輕鬆講出彼時的煩惱佮情緒。 原來，長時間一直練習，閣有課業壓力，加上團隊合作內有無仝的意見，攏捌予這陣少年囡仔感覺疲勞，甚至想欲放棄。毋過，正是因為有這寡辛苦，才予最後的成果閣較珍貴。 指導老師王主恩也分享，看著學生一路，自校內比賽行到全國舞台，實在無簡單。為著這場比賽，學生逐日早起、中晝、放學，攏留落來練習。用上大的心力，一句仔、一句磨。最後，聽著著獎的消息，老師嘛感動到目屎流落來。 王主恩認為，本土語言教育上重要的，毋但是課堂內的學習，閣較重要的是予學生有機會用語言接近家族、接近土地。尤其金門話若欲延續落去，愛倚靠少年世代共這个語言講轉去家庭，佮阿公阿媽、家己的親人真正開喙講，語言才有機會傳落去。 金門文化，嘛有歷史的重量 除了迎城隍這款熱鬧的民俗文化，節目嘛講著金門戰地歷史的記持。金門今仔日的和平安樂，攏是建立佇過去濟濟人的辛苦佮承擔。對少年學生來講，彼段砲彈轟炸的困苦歷史，透過阿公、阿媽的分享、學校教育佮在地空間的保存，予痛苦的記持，袂去予人放袂記得。 主持人阿旻指出，關心金門本土文化，嘛愛會記得金門戰地歲月內底的危機意識。彼段歷史，展現的是金門人、台灣人的韌性，嘛提醒咱，今仔日會當安心講母語、講文化，攏是足珍貴的代誌。 洪翊愷、許玉媚、蘇詠新、陳希祐，佮指導老師 王主恩，用聲音傳承文化，用表演講出土地的故事，予世界聽見金門的媠，嘛予逐家看見：語言就愛有少年人接手，傳承就有未來。

專訪：金門縣金城國中三年仔學生 洪翊愷 《臺灣夜市 Taiwan Yes!》這擺特別飛到金門錄音，欲走揣一位少年頭家「金門阿愷」洪翊愷。今年十五歲，是金門縣金城國中三年仔學生，毋但對金門話有真深感情，閣用少年的熱情佮創意，予愈來愈濟人，聽見金門，也看見金門。 阿愷自國小開始接觸金門話的競賽，受老師的鼓勵佮培養，參加本土語文相關比賽，已經提著三擺全國語文競賽本土語文特優，無論是演講抑是讀者劇場，攏展現實腹的實力。2025年，伊閣以年歲上細漢的參賽者身分，參加公視台語台《TalkTalk秀台語》練喙花比賽，拚入前十強。對阿愷來講，比賽不只是舞台，更加是推廣語言、傳承文化的機會。 阿愷相信語言愛佇生活當中使用，毋是干焦佇演講比賽，抑是舞台頂講的內容。平常時，伊嘛會主動用金門話佮同學開講，甚至透過短影音佮趣味內容，予少年世代閣較親近這个語言。 講著金門也是重要的僑鄉，過去真濟鄉親「落番」去到南洋拍拚，文化佮語言嘛產生豐富的交流佮變化。阿愷透過田野觀察、訪問序大，記錄金門話的特色，嘛分享金門話佮台語之間的趣味的精差，予語言變閣較有溫度，開始會曉耍語言。 未來，阿愷希望讀師大臺文系，深入研究語言，嘛希望有機會做主持人抑是主播，共金門的故事講予全世界聽。伊相信，只要願意開喙，金門話佮台語就會繼續傳落去。 《臺灣夜市 Taiwan Yes!》透過這擺金門行，予聽眾看著一位少年對故鄉文化的熱情佮堅持。金門阿愷，用行動證明：語言的未來，就佇少年人的手中。

專訪：朱偉誠（大灣高中國中部二年仔學生） 台南少年朱偉誠，予人號做「阿公」，a.k.a「台語老靈魂」，自細漢就佮意本土語言。今仔日《臺灣夜市 Taiwan Yes!》特別落南，來到台南永康廣興宮頭前，採訪朱偉誠。 朱偉誠分享在地文化佮語言傳承的心路歷程，也講：逐年正月二十「擔餅節」，是台南重要無形文化資產；若厝內有添丁，爸母會擔水果餅答謝元帥保庇，祈求囡仔平安大漢。這寡地方傳統，是偉誠佇國小開始，就沓沓仔累積起來的。 除了台語，偉誠嘛參加客家社，學習客語、也熟似客家文化，展現對台灣多元族群的尊重佮熱情。伊積極參與台語的語言社團，鼓勵仝輩做伙講各種台灣的本土語言，認為語言就是臺灣文化的根。 透過少年世代的力量，台語佮客語攏會當繼續傳承，予台灣的文化更加豐富、更加有性命力。偉誠甚至佇國小的時期，就參加大學生組成的「大同仔台語社」，提早接觸台語推廣的環境，展現對台語復振的使命。透過和無仝年齡層的交流，伊沓沓仔建立對語言文化的認同，嘛加強行動力，予台語佇生活中真正落實，顯示少年世代承接文化的重要力量。

專訪：Judy FAPA西雅圖分會會長、囡仔哈熊、芊蓓 《臺灣夜市 Taiwan Yes!》邀請來自美國西雅圖的台美家庭，分享𪜶佇海外推廣台語的經驗佮生活。節目中訪問Judy佮伊兩个囡仔哈熊佮芊蓓，透過輕鬆的對話，呈現台語家庭的傳承佮活力。 哈熊分享伊對未來的夢想，原本想欲開火車，後來轉做對火箭產生興趣，展現無限的想像力。芊蓓愛畫圖，向望未來會當成為設計師。兩个囡仔攏佇家庭的支持下，自然使用台語，閣佮社群活動做伙成長。 Judy表示，海外的台語環境，雖然無像台灣遐爾普遍，毋過透過同鄉會、夏令營佮社群活動參與，會當予囡仔有機會接觸台語，建立認同感。伊強調，予囡仔感覺「講台語是光榮的代誌」，是語言傳承上重要的關鍵。 Judy這陣嘛擔任FAPA西雅圖分會會長，推動台美人參與公共事務，透過草根力量影響政策，並且促進台灣佇國際上的能見度。伊分享，每年透過National Advocacy Conference，予會員前往華府，直接佮國會辦公室接觸，傳達台灣的聲音。 節目最後強調，無論佇台灣抑是海外，家庭佮社群攏是語言傳承的重要基礎。透過一代傳一代的拍拚，台語佇世界各地通繼續發展，展現台灣文化的韌性佮希望。

專訪：布逸凡 國立成功大學臺文系學生 來自美國亞利桑納州的布逸凡，這馬佇國立成功大學臺文系讀冊。伊看著真濟台灣人平常時攏無咧講台語，感覺足可惜，阿旻呵咾伊欲做台語WiFi數據機，行到佗位，攏主動用台語佮人開講，欲予台語閣活起來。 布逸凡講，語言是文化的根，也是情感的所在。伊的女朋友是客家人，女朋友認為平常時，講華語較利便，毋過布逸凡猶原堅持用台語佮伊講，抑是開始學客語。 布逸凡希望透過語言較行倚台灣文化。主持人阿旻笑講，布逸凡親像當代的傳教士，傳的毋是宗教，是對台語的熱情。 除了日常推廣台語，布逸凡嘛計畫創作臺文繪本、小說，閣愛唱台語歌。伊身軀有一个刺青寫「Real Music」，伊講「Real」就是發自內心。對伊來講，台語這个語言佮台語音樂，攏是真誠、感動伊心的寄託。

專訪：高雄市新莊高中學生孫翊倫、翊倫媽媽 有一種人生，是一出世就無公平；有一種聲音，經過真濟疼痛，猶原選擇講予世界聽。 高雄市新莊高中二年仔學生孫翊倫，來到《臺灣夜市Taiwan Yes!》節目中，親身朗讀家己創作的台語文章〈無拚，呔會知影輸贏〉，用清楚堅定的聲音，分享伊一路來，無放棄的人生故事。 翊倫一出世就得著罕見疾病，成骨不全、龍骨彎曲七十度、雙跤變形，身懸干焦一百公分。長期的身體無爽快，對生活、讀冊攏是真大的挑戰。不而過，翊倫無因為身體的限制，放棄對人生的向望，顛倒用文字、用聲音，傳達正向的力量。 「人的一生會拄著足濟無順序的時陣。」翊倫佇文章中提著，讀冊成績、人生方向，攏可能有不如意的時；若是真正感覺無希望，拚落去，才知影輸贏。 翊倫的堅定，來自家庭長期的陪伴。爸爸一人趁食，媽媽全心照顧，三个人互相扶持，一步一跤印行到今仔日。翊倫國小一年仔的時陣，因為面對性命的無確定性，甚至寫過遺書，字字句句攏是感謝醫師、感謝幫助過伊的人。 除了展現性命的韌性，孫翊倫也決心投入台語復振，講出伊台語的使命感。也因為參加台語朗讀比賽，拄著真濟貴人。國小導師志強老師，為著予坐佇輪椅的翊倫有參與感，安排伊加入運動會接力走標賽，同學陪伴伊完成比賽，予翊倫留落真深的溫暖記持。這段經驗，也成為伊繼續向前的重要力量。 孫翊倫過去捌兩擺得著總統教育獎，舊年提著全國語文競賽台語朗讀特優，實力佮精神，攏真受肯定。 目前咧讀高中二年仔，翊倫未來希望進入師大台文系讀冊，嘛和來自全台灣各地頭的青年，共同組織「台語巢」少年台語團體，為台語復振付出心力。 上天雖然無予伊完整的身體，煞予伊更加堅定的意志。伊的故事，毋但是一段性命的奮鬥史，也為台灣社會留落勇敢、感恩佮不放棄的典範。 「無拚，呔會知影輸贏。」翊倫用行動證明，活咧，本身就是勇敢。

《臺灣夜市Taiwan Yes!》繼續邀請 Eastman Sisters Taiwan Times 的妹妹—東方美媚，佮伊的媽媽做伙上節目，分享家庭故事閣較趣味的一面。 東方美媚媽媽過去有佇電台做過DJ，所以對錄音室算是熟悉。東方美媚愛表演，有自信，可能嘛是來自媽媽的基因。 節目中講著，爸爸佮阿姊東方晶晶目前閣蹛佇美國，雖然分隔兩地，感情猶是一點一滴維持。每一擺轉來台灣，東方美媚攏會想欲準備「特別的驚喜」予爸爸佮阿姊，展現伊古錐的情感佮貼心的心思。美媚分享這回伊予爸爸佮阿姊驚喜，特別準備「禮物」，到底是啥物禮物？做伙來聽。

《臺灣夜市Taiwan Yes!》節目，邀請人氣社群 Eastman Sisters Taiwan Times 的妹妹東方美媚，閣有伊的媽媽做伙上節目，分享跨國家庭、台語教育佮青春夢想的故事。 東方美媚媽媽是台灣人，爸爸是美國人，伊閣有一个阿姊東方晶晶。兩姐妹仔用輾轉的台語經營 YouTube 佮 Facebook 社群平台，少年囡仔講台語，吸引大量網友關注，成為台語文化傳承的新世代代表人物。 今年拄滿13歲的東方美媚，展現表演天份，對未來充滿演藝箍仔充滿夢想。伊分享，因為受長歲壽戲齣《實習醫生》（Grey’s Anatomy）影集影響，對醫生職業有夢想，希望未來演藝事業做伙嘛通發展，結合醫學佮演藝兩種方向，展現新世代多元價值。 節目內，媽媽分享家己佇美國拍拚的歷程佮充滿驚奇的跨國婚姻故事，美媚頭一擺聽著媽媽的性命經驗，雖然東方美媚有時仔會虧媽媽，但是也展現母仔女不止仔深的情感連結。

畫家：黃怡華 《臺灣夜市Taiwan Yes!》邀請南投中寮創作者黃怡華，分享囡仔時代，對阿公、阿媽的生活記持、農作文化佮在地情感，以及面對921 地動後佮風災經驗的地方韌性佮溫暖。 細漢時，怡華就佮阿公、阿媽蹛佇南投中寮，厝邊頭尾攏是作農的人，種弓蕉、龍眼、柳丁，閣有其他作物。伊用「阿公的衫褲有一點一點」做線索，講出長年做田，沫著弓蕉奶所留落來的痕跡，除了是衫仔褲洗袂清氣的頓點，閣有阿公本身的老人斑，怡華共阿公形容做一隻豹。 另外一本繪本，自風颱天出發，黃怡華畫出阿媽的生活樣貌。平常時，阿媽就準備醫藥箱仔、油燈等物資。伊講，這攏毋是特別的「防災措施」，是阿公阿媽世代，早就流傳落來的生活智慧。繪本包含遊戲，欲予囡仔人輕鬆學著這寡防災撇步。 黃怡華除了是畫家和作家，本身也參與防災協會、投入推廣，除了教細漢囡仔整理避難包、用遊戲的方式學生活常識。伊也強調：避難包毋是大人替囡仔準備就好，囡仔家己嘛愛知影內底有啥物、會曉使用、會曉傳達消息。 除了災害教育，黃怡華也關心南投地方開發佮環境保護的議題。雖然現此時蹛佇咧新北市，猶是四常注意南投地方的發展，期待透過文化創作、防災教育佮在地連結，予家鄉有較穩當、較長久的路通行。

專訪：台北市台灣語協會前理事長 黃振彬 《臺灣夜市Taiwan Yes!》主持人阿旻，曾偉旻，邀請長年佇第一線推動台語的教育工作者黃振彬到節目分享。黃振彬老師過去擔任台北市台灣語協會理事長，嘛是台語教學現場的資深老師，對台語推廣、保育、教學策略佮未來展望，提出真濟寶貴經驗。 黃振彬指出，台語是台灣重要的語言文化，毋過因為社會語言環境變化，囡仔愈來愈少講，語言流失的危機一直存在。這幾年台語佇國中、高中列入必修，予台語教育有較明顯的機會佮希望；但是佇咧現場猶原面對挑戰，親像學生囡仔程度落差真大、學習動機無仝，甚至家長會直接問講：「學台語到底有啥路用？」 面對這款的現實，黃振彬強調：台語課一定愛「生活化、趣味化」，老師毋通完全照課本落去教，嘛毋通予學生感覺，用「國文課」的方式來教，遮無聊。佇教學過程，伊用俗語、故事、台語歌單、臺羅輔助，閣用分組的方式，予程度較好的學生𤆬頭，牽教較生疏的同學做伙學，予班級內底有互相支持的氣氛。 黃振彬也分享，每學期攏會做調查、聽學生回饋，隨時調整課程內容，上重要的一點：毋通予囡仔討厭台語，敢開喙講，就是第一步。 講著未來台語發展。黃老師期待透過多元媒體、影視音內容、校園佮民間團體合作，加上政策做靠山，予台語佇新世代繼續傳承，嘛予閣較濟囡仔佮家庭，重新佇生活內底聽台語、用台語、講台語。

專訪：吳兆峯（Ken Wu） 台灣人公共事務會洛杉磯分會副會長 大洛杉磯台灣會館秘書長 行政院政務顧問 《臺灣夜市Taiwan Yes!》主持人阿旻曾偉旻邀請海外台灣公共事務工作者吳兆峯（Ken Wu）到節目中，分享台灣海外社群的拍拚佮台灣會館的重要性。KEN 以第一線參與者的角度，深入說明洛杉磯台灣會館成立的背景、精神意義，佮目前重建募款所面臨的挑戰。 吳兆峯表示，洛杉磯台灣會館是三十年前由濟濟台灣人，拚出來的所在，是每過西岸台灣人認同自我、凝聚社群的重要精神堡壘。早期佇台灣受限的環境，無法度公開表達台灣人身分，顛倒是佇海外，台灣人得著自由，開始認清「我是台灣人」，台灣會館也因此成做文化、政治佮公共事務的重要基地。 隨時代變化，會館設備漸漸仔較舊，第二代、第三代台灣人對空間有新的期待，基金會開始推動拆除重建計畫。吳兆峯指出，重建經費完全來自民間募款，無政府補助，原本預算因為物價大起大大增加，募款過程算是艱難，但是海外台灣人猶原拚命付出，希望替後一代留一个閣較好的「台灣人海外的厝」。 節目內底，也講著台灣國際處境的轉變。吳兆峯指出，過去海外社群等於是「民間的外交部」，今台灣外交漸漸仔被看著，行向正常化，海外組織角色也轉型，開始更加重視社區經營、政策倡議佮青年培力。尤其愈來愈多少年台灣人投入公共事務，用行動展現對台灣的關心佮責任。 無論是台灣會館的重建，抑是海外青年參與公共事務，攏顯示出台灣人的凝聚力。台灣的未來，正正是佇一代接一代的付出內底拚出來的。

專訪：台語倡議者：賴一心（一郎） 根據《台語憲章》作者賴一心（一郎）統計，全台灣已經賰無1,000戶台語家庭，20歲以下，使用台語做母語的人無到1萬人。甚至佇20冬後，全台差不多有99.5%人口，無閣使用台語做生活語言。 台灣人無講台語，是民族集體創傷。語言就欲滅絕，若準無出來倡議，出來做一寡代誌，可能終生遺憾。一郎講著，台語欲按怎救，才有希望！伊倡議台語，就應該提來做官方語言，而且佇台灣各地頭做語言分區。未來，也會當產生語言分區的經濟效應。 一郎也講著「語言是國安」，台語會當增加敵對勢力，了解台灣的成本。另外，也因為華語、中語的滲透真簡單就入來台灣，所以更加愛發展台語，才有法度有效做區別台灣文化的獨特性。 閣較深層的對話、討論，就好好仔來聽《臺灣夜市Taiwan Yes!》節目。

專訪：導演黃銘正 導演黃銘正出道的頭支短片《野麻雀》，就得著金馬獎的肯定，也成功揣著影視新星莫子儀。佇咧電影市場、通俗和美學之間，黃銘正認為愛揣著平衡。尤其，經過《城市飛行》、《灣生回家》，濟濟電影、紀錄片的試煉，伊親像揣著這支平衡的鎖匙。 舊年，黃銘正和牽手連楨惠共同導演《尋找湯德章》，無過去講二二八事件的悲情，顛倒是用生活感，呈現這齣紀錄片。明年二二八期間，欲佇日本有巡迴。 兩人籌備，也已經開始進行的新作品：台語家庭的紀錄片《大教堂》。這段淵源是《尋找湯德章》佇美國巡迴交流的時，去予西雅圖台語家庭兩位小朋友，全程攏講台語感動著，家己也開始共台語抾倒轉來，並且這座《大教堂》，也自台語家庭，延伸到真濟台美人為台灣外交倡議奮鬥的真實紀錄。

專訪：台語創作女歌手 鍾綺 《臺灣夜市Taiwan Yes!》鍾綺 Bell下集，邀請逐家收聽伊上新的台語單曲〈Coming Home・換我疼恁〉，是伊人生第一首完整的台語歌，彼个起心動念，是想欲佮爸母講一句：我猶一直共恁記牢牢，我嘛會行倒轉去疼恁。 鍾綺表面上看起來真勇敢，其實心內攏有一寡對爸母的歹勢。伊講，厝裡就是小康，但是過去爸母，猶是喙齒根咬咧，送伊去國外讀冊。到今，鍾綺猶會因為一通視訊電話、一對爸爸專工替伊揀的耳鉤仔，感動甲流目屎，三不五時攏會向爸爸媽媽講：我真愛恁，這款真心話。 鍾綺的故事，是寫予所有離開故鄉、猶思念厝內人的人。鍾綺用歌聲唱出「換我疼恁」，彼个音符內底，嘛有咱每一个人，欲行倒轉去，共爸爸媽媽咱予牢的心願。 鍾綺也另外分享伊的男朋友，是音樂上的好同伴，毋但替伊製作歌曲、翕影片，兩个人互相學語言、學文化，嘛共台語，透過音樂創作，𤆬去國際舞台。

專訪：台語創作女歌手 鍾綺 《臺灣夜市Taiwan Yes!》邀請高雄出世的台語創作女歌手鍾綺 Bell，分享伊做音樂，用台語創作的歷程。鍾綺毋但佇網路社群、短影音真衝，甚至衝到國外，收著足濟外國朋友寫訊息講：「妳的台語歌足好聽，旋律嘛真吸引人，有衝動，想欲來臺灣看看咧」。 鍾綺 Bell的音樂底，是按怎養成的咧？其實，是來自「另類的音樂世家」。 鍾綺阿媽是鋼琴老師，教伊彈琴。爸爸看伊遮爾愛音樂，送伊人生頭一支吉他，予伊不斷練習創作。伊的阿公過去是一字、一音，教伊唱台語歌，嘛對伊講：「台語是咱的根，袂使予斷去」。鍾綺堅持阿公的信念一直到今。 雖然看起來，鍾綺的人生順順順。不而過，伊的青少年時期，受著校園霸凌。另外，也因為課業較綴袂著。斯當時，爸母決定送伊去美國讀冊。這个決定，也予伊開啟全世界的新視野，變做日後人生重要的養分。 鍾綺用西洋曲風結合台語，開創屬於少年世代的新台語歌。雖然猶是會受著傳統台語唱片界的質疑，猶有寡聲調、倒音問題。 不而過，鍾綺不斷調整，佇「傳統」和「創新」之間，想欲揣著一个平衡，創作新型T-Pop。

醫師、台文作家：洪明道 《臺灣夜市Taiwan Yes!》繼續訪問台文作家洪明道。伊自魚塭仔的「少爺囡仔」，講到有「一寡代誌」，對阿爸、阿母開喙的為難。最後，選擇用台語，揣著勇氣的過程。 洪明道佇高雄路竹大漢，阿爸是佇魚塭仔做穡。雖然是做粗重的，in阿爸猶是會那做工、那和伊耍，通予伊兼做議量。阿母雖然較嚴格，總是希望家己的囡仔，會當專心讀冊，莫閣行上頂一代，少年時欲讀冊、煞無機會讀彼款艱苦路。 洪明道笑講，因為爸母兩个人，啥物物件都共伊款甲好勢仔、好勢。早前有影啥物代誌攏袂曉，甚至上北、出門在外愛家己生活，連洗衫機，按怎操作都袂曉。 真正咧做「少爺」；這款少爺，是洪明道父母用心、疼出來的。 愈行愈遠，愈感受著階級、生活方式的差別。 做醫師以後搬來台北，明道有一站仔，敲電話予阿爸、阿母，幾若通攏無人接、訊息也無人讀、無人回。家己，煞淡薄仔受氣。 明道這時，才翻頭想著講，阿爸佇魚塭仔做工課，一工貼貼，當然無法度隨時接電話、回訊息。 對序大的理解，這是第一步。 有一改，伊去高雄參加遊行，聽著葉永鋕阿母用全台語，講in後生的故事，講彼款痛。無華語地位懸低的階級，干焦一个老母，用家己的話共世界講：「我的囡仔，是按怎的囡仔。」 洪明道講，當下真正受著感動，感覺這个阿母，佮伊的媽媽足相仝。彼改的台語演說，予伊揣著一種新的可能：有一工，伊嘛會用台語，向阿爸、阿母，講出家己的「心內事」。到底是啥物故事，咱做伙來聽。

醫師、台文作家：洪明道 《臺灣夜市Taiwan Yes!》專訪台大醫學系出身的醫師、兼台文作家洪明道，分享伊的成長背景、語言記持，佮台語創作的心路歷程。 洪明道佇路竹出世，厝裡攏講台語，家庭語言環境真自然。 細漢時，去學校讀冊開始講華語，予同學笑講有「台語腔」。媽媽細漢食過這款苦楚，受過語言歧視。安排洪明道去讀「國語正音班」，時間久來，無效果，做母仔的，甚至閣共𤆬去做「擢舌根tioh-tsi̍h-kin手術」，想欲改善「講國語，無標準」的情形。 這段擢舌根、正音的記持，雖然洪明道講起來，是笑笑矣。但是，總是反映受過國語政策迫害的父母，對華語語言階級高高在上的驚惶，無想欲予囡仔，複製這款「台語低路」的歧視。 洪明道的例，可能佇你我的身軀邊，攏有人按呢被對待過，顯示一、二代台灣人，共同經歷過的悲慘歷史。 台文書寫、台語過生活。做為腰子科醫師，洪明道逐日接觸足濟長輩，嘛和這寡看診、洗腰子的病友，有真深的情感連結。老大人會和伊講心事、講生活，予伊學著較濟來自生命底層的語言佮經驗。 醫療毋是「看病」爾爾：有時陣，是一種陪伴。 洪明道講，和老大人講台語，是真正有性命力的教材。伊按怎共生活的觀察，寫入去創作，做伙來收聽這集的《臺灣夜市Taiwan Yes!》。

台灣夜市Taiwan Yes! 真正是Yes！這回阿旻會當來到英國倫敦，提著這个獎，實在愛感謝足濟人，也感謝央廣𤆬阿旻到世界的舞台，我也真歡喜，會當透過「年度廣播主持人」這个獎，共咱珍惜的台語，𤆬起去國際級的媒體頒獎典禮。 回顧今年台灣夜市Taiwan Yes節目，咱訪談來自厄瓜多、越南、菲律賓、馬來西亞等各地的新移民，訪談全程使用台語（Tâi-gí），看這寡新住民，偌爾拚勢學這个語言。 台語是台灣國家語言之一，但是佇過去威權時期被禁止使用，所以對我來講，每一改訪談，不止仔是語言，也是揣著家己的聲音。今年我阿旻另外關注「台灣亞美混血兒（Taiwan Amerasians）」，共in的經驗佮倚近的亞洲地區進行比較。故事提醒咱，台灣自本就毋是世界的邊緣，是一直佇咧全球交會的十字路口。自歷史到今仔日的國際局勢，台灣攏和世界真搭峇。透過這寡聲音，看台灣按怎繼續講出屬於世界，閣有台灣心的故事。 夢想會成真，我承諾，我會予台語的聲音，繼續響落去，有一工一定會變做T-pop! 這集節目，咱嘛透過精彩片段，閣來回顧亞美混血兒的故事。

故事工廠創辦人：黃致凱 故事工廠創辦人黃致凱分享，後生佇咧幼稚園時，可能出現選擇性緘默症的症頭。醫生建議愛加強陪伴，用遊戲引導、訓練建立自信。雖然有去看醫生，但是無去看報告，最後一步一步用時間和耐心，建立囡仔穩定的安全感。 語言傳承方面，黃致凱堅持「厝內用台語對話」。囡仔若用華語回應，伊就溫柔提醒，台語會使按怎講，袂一下手排斥華語，予囡仔有選擇的能力，面對無仝對象、無仝所在，用適當的語言。為著教囡仔，伊逐日查詞典、補充語彙，予台語落實佇生活，予親子對話成做文化傳承的所在。 「我對囡仔只有兩項期待：身體健康，做對台灣有幫助的代誌。」黃致凱講，導演佇排練場教演員揣感受，爸爸佇厝裡，教囡仔用母語，建立信心；人生兩舞台，目的攏相仝，用家己的語言，活出家己的故事。

故事工廠創辦人：黃致凱 「演戲是一種修行。」這是故事工廠創辦人黃致凱的信念。 《台灣夜市》節目主持人阿旻，邀請黃致凱分享自戲劇創作、教學到台語文化傳承的心路歷程。出身台大戲劇系，早年拜屏風表演班李國修做老師，自劇團內，做雜差仔工（ tsa̍p-tshe-á-kang，打雜）、倒薰觳仔（hun-khok-á，菸灰缸）開始，三冬後才被正式收做徒弟。 李國修老師對伊講：「我毋是教你演戲，我是教你修行。」成做黃致凱，一生戲劇修練的座右銘。 黃致凱指出，戲劇的養成，是觀察人的生活、走揣人心的歷程。演員若欲感動觀眾，先愛理解家己的性命故事。伊笑講，家己是台大戲劇系第一屆學生，轉去母校教冊，看學生排戲，會想起彼當年家己釘排練場地板的青春歲月。 對黃致凱來講，教學是一種整理思考、傳承的實踐，「我教學生的，就是李國修老師教我的：看戲修心，演戲修行。」 2016年，黃致凱受明華園邀請改編洪醒夫老師《散戲》，頭改寫台語歌仔戲劇本。才發覺雖然會曉講台語，但是欲寫劇本有難度。自彼時開始，一字一字查字典，共語言揣轉來。 十二年冬來，故事工廠繼續創作臺灣原創劇本，用戲講台灣人的生活。

六藝樂集 製作人：趙文俊 六藝樂集創立十週年特別音樂計畫，邀請團員用交響樂團的編制，去重新演出經典的台語老歌，是真濟阿公、阿媽輩的青春記持，這回也予伊有新的氣口。 製造人趙文俊做為講冊人，故事音樂會用廣播的方式，共《孤女的願望》，《媽媽請你也保重》這寡歌串起來變成故事。每一條歌曲重新編曲，再現台灣重要的旋律，予人想起少年時的夢、親人的面容，也予觀眾用音樂揣著家己，那聽故事，那用歌去感受人生的路。 音樂會主題出外人，呈現離鄉佮轉去故鄉兩種感受。講的是青春、漂流佮孤單，嘛是思念期待佮勇氣。製造人趙文俊打造音樂會，不止仔是數念過去，也向望共經典歌曲，變成新世代通接受的聲音。

受訪者：屏東縣消防局特種搜救大隊長：陳世鴻 今年花蓮馬太鞍部落發生水崩山災害，屏東縣消防局特種搜救大隊長陳世鴻𤆬隊，第一時間趕赴現場支援。用高度專業佮勇氣，成功救出受困的6歲女查某囡仔小沂，展現台灣特搜隊堅韌的精神。 陳世鴻大隊長表示，彼時水流真猛、地形閣破碎，風險真懸。經過風險評估佮現場勘查後，決定「閣試一改」。伊講：「過去是88風災受難戶，了解家屬的心情，只要閣有希望，就莫當放棄。」終其尾，佇咧同仁的合作佮家屬的指引之下，順利揣著受困的囡仔。雖然厝內序大不幸過身，但是這場救援，也是一件「奇蹟任務」。 陳大隊長也講著，這改行動成功，是平常時嚴格的訓練，佮縣府單位的幫忙佮協調。屏東特搜大隊算是全台第二大的訓練中心，設有立體高空救援設施、模擬崩塌環境佮水域救難場地，是特搜能量的重要基地。最近幾年也積極佮國際交流，派員赴新加坡、日本、美國受訓，強化跨國救災能力。2023年土耳其發生大地動，陳世鴻𤆬隊前往救援。 講著未來防災重點，陳大隊長強調：「危機意識是上重要的防線。」伊指出台灣民眾應該培養自主防災的能力，全民提升警覺、強化演練，社會才通閣較安全。

台文作家：吳品瑜 頂禮拜台灣夜市訪問吳品瑜，收著真濟回饋。這禮拜咱繼續對伊身上挖故事。吳品瑜雖然旅居國外，三个查某囝嘛是台語真輾轉，並且佇法國、美國紐約，為台灣事務投入心力。 吳品瑜認為華語教育長期壓迫母語，造成世代失語，但是佇伊的家庭是彌補過去的失語語境。伊講母語真正意義，毋是予人講萬國語言，是共家己的母語抾轉來，那予傷痕復原，那講故事。 兼具語言復振佮女性主義視野，展現台文的媠美佮社會批判力量。吳品瑜期望台灣社會用母語做根基，繼續培育多元文化，共同建立屬於這片土地的精神故鄉。

受訪者：吳品瑜 出身府城、蹛佇德國海德堡的台語作家吳品瑜，作品〈啞口新娘家己嫁〉得著2025台語文學創作獎散文首獎。評審呵咾伊用台文幼路，描寫女性世代失聲的歷史的痛，用情真深。 吳品瑜表示，母語是療養心靈傷痕的藥方，也是一種kah土地深層對話的力量。共母語抾倒轉來，毋是nostalgia，是nǹg入去臺灣土地的子宮，母語一字一句，就若島嶼的心跳。

《臺灣夜市》上新特輯，𤆬聽眾來到花蓮光復鄉，來看馬太鞍部落的崩山湖大災後，主持人阿旻親身和志工投入清理佮重建。 花蓮馬太鞍頂個月23，因為崩山湖潰堤引發大水，造成光復鄉一半的面積攏被淹淹去、厝宅、農地攏損蕩。 阿旻坐火車前往災區，沿途見證來自全台的志工，展現有錢出錢、有力出力的台灣互助精神。來到現場以後，開始幫忙搬運、清理塗石，用上直接的方式幫忙受災鄉親。阿旻形容，手痠、腰痠背痛雖然難免，煞深深感受台灣社會的團結能量。 逐个人攏用家己的方式參與幫忙。有「黜仔超人」、「義煮廚子師」、「醫療團天使」等等，也有大型機具閣有人力協作；也有國軍、台鐵、公路局、水利署等等，共同恢復花蓮馬太鞍原底的風貌。

專訪：台語新世代演員 林壬聰 《臺灣夜市》推出「台語新世代演員」專訪，系列專訪來到Part 3，邀請新生代台語表演者林壬聰aka阿川，做伙來開講。伊出身法文系，對語言真有興趣。另外，無演戲、等戲的過程，阿川閣橫棍仔兼做趨雪教練。 今年入選公視臺語台表演班，阿川家己講：用生活語言，轉做表演語言，是伊這擺培訓的關鍵里程碑。 阿川分享試鏡的過程，嘛用趨雪教學比並表演工夫：觀察、調整、溝通，逐項攏重要。講著角色方向，伊也引用表演班老師建議講的，適合社會寫實類的影視作品，符合在地故事的溫度。

專訪：台語新世代演員 玨君 《臺灣夜市》推出「台語新世代演員」專訪，系列專訪來到Part 2，邀請來自臺東太麻里的台語女演員玨君。伊分享自細漢就參加台語演講比賽，佇台頂感受表演的快樂；大學讀讀戲劇相關科系，也進入北藝大劇場藝術創作研究所進修，今年入選公視臺語台表演班，開始用母語開展影視表演的路。 節目中，玨君分享語言轉換佮發音意識的訓練過程。日常生活用語自然親切，但是一到鏡頭前佮舞台頂，咬音、咬字、喙形、節奏，攏愛閣較精準。講著劇場出身的伊，踏入影視的精差，玨君分享，劇場強調整體身體能量佮視線擴張；影視鏡頭顛倒是會放大所有表情細節，需要重新調整身體節奏。 對未來戲路，玨君表示希望挑戰「外口媠媠、內底垃圾鬼」的反差角色。聽一句話，就通看著玨君，真無仝款的演出想法，閣有啥物精彩的故事，做伙來聽《臺灣夜市》。

專訪：台語新世代演員 周健瑜 《臺灣夜市》推出「台語新世代演員」專訪，系列專訪第一集，訪問來自雲林崙背的海口囡仔的周健瑜，自細漢佮阿媽做伙蹛，伊分享台語是日常的氣口；來到台北讀冊，才發現家己的「國語」有庄跤味，鏡頭前就愛一直調整。不而過，這款氣口，顛倒予伊接著其他的機會。 健瑜笑講大學時老師叫伊「八跤仔」，因為厝裡養蟳仔、飼大閘蟹，有海口味，這款海口的氣口，後來也佇足濟角色內底出現。 伊分享等戲的時，去賣豆花、去士林夜市做散工，去密室逃脫實境劇場做演員，或者是去綜藝節目做幕後，設計遊戲、看群眾反應。健瑜講：逐種散工攏是觀察課。 為著有戲通拍，也就愛一直去試鏡，健瑜分享：雖然毋是你認真就一定有角色；較要緊的是，「機會來的時，你敢準備好矣」？

來賓: 王秀容 中央廣播電臺《臺灣夜市 Taiwan Yes》節目今仔日邀請台語Google 小姐王秀容老師，分享伊新出版的文學創作《阿烏的學游》。這本冊結合詩性語感、音韻教育與生活故事，設計予成人與囡仔攏會得著學語言的趣味，也藏有深刻的女性視角與家庭記憶。 秀容老師講《阿烏的學游》（a-oo-e-o-i-u）是伊十幾冬來臺語書寫、語音教學佮文學創作的綜合實踐。「阿烏」是一隻皮膚烏烏的囡仔，學游泳的過程，親像學臺語音韻標調的比喻，透過生活中具體的畫面，烏鴉、芋仔、鴨仔等意象，傳達臺語複合韻佮聲調教學，予學生、老師佮家長攏通使用。 全冊收錄二十五篇散文故事，每篇配合主題有四幅圖，圖像創作由老師的查某囝來畫，畫風自然樸實、佮文意相對照，藏入秀容老師對性別、教育佮鄉土的幼路觀察。嘛是充滿語言學、文學佮哲學的三重深度，也是秀容老師文學路上追求「真」的精神實踐。伊分享：「寫作愛老實，臺語嘛愛真誠，自由自在，去面對生活佮語言。」

來賓: 國立金門高級農工職業學校蔡天益老師、東山高中國中部李宗琴老師、新北市海山高中廖梅君老師 中央廣播電臺《臺灣夜市 Taiwan Yes》這集節目延續頂禮拜台語老師大集合企劃，這回繼續邀請三位對「台語教育」，懷抱熱情的現任教師，有來國立金門高級農工職業學校漁業科蔡天益老師、東山高中國中部英語教師李宗琴老師、以及服務超過二十冬的廖梅君老師。三人雖出身背景無仝，但這陣攏咧為台語教育鋪路，有堅定的方向。 金門的語言文化場景：本地話、臺語並進的在地實踐 天益老師佇金門服務已經十八冬，講起初初到金門當地，做家庭訪問的時，用「學校」這个詞，一開喙就被家長聽出來是「對台灣來的」，因為當地講的是「學堂」。這款「用詞差異」成做伊重新學習金門話文化的開端。最近，金門縣政府也咧推動金門話教育，出版在地教材，鼓勵本地學校重視金門話。天益老師嘛用伊漁業的專業，用台語講出「魚類」的生態鏈，一定愛聽。 李宗琴老師：自英語教師行入臺語復振的願望 現任東山高中國中部英語教師的宗琴老師，回想過去參加台語演講比賽，意外自台北市代表進入全國賽，嘛是頭改完整受過全國賽訓練，嘛對臺語認同的開始。因為感受台語沓沓仔流失，嘛開始主動請教校內台語老師、借冊自讀，嘛一步一步學習臺語教學按怎進行。 梅君老師：英語教育資深教師 以家庭為根培養台語情感 服務超過二十年的廖梅君老師，伊講，臺語的根是佇家庭環境，伊的兄嫂也特別佇厝佮囡仔講臺語，看臺語báng-gá，創造語言使用環境。伊講伊離開家鄉、讀英語系、去歐洲，愈走愈遠，才愈知影我是台灣人，台語是咱的根。梅君老師希望台語毋但是語文科目，更加是生活內底的文化實踐。

受訪者：歷史老師余青霞 、國文老師蔡季純、國文老師張心蔚 《臺灣夜市 Taiwan Yes》節目，這集邀請三位教學現場的老師——歷史老師余青霞 、國文老師蔡季純、國文老師張心蔚，做伙來分享in佇校園佮家庭中，轉推動台語教育的實際經驗佮人生故事。 頭一位出場的是育成高中的歷史老師余青霞老師，三冬前因為學校開出台語課需求，伊因為有台語認證，閣有台語競賽經驗，主動接這項教學任務。雖然學生大多數攏聽有，欲開喙講猶是困難；不而過透過調查發現，學生厝內八、九成阿公阿媽會講台語，家庭語境猶未完全消失，欲轉做語言輸出，嘛愛人引導。青霞老師強調「浸水式教育」是關鍵，設計活動予學生開喙講、錄音、寫故事，沓沓仔予學生，建立語言自信。 第二位蔡季純老師，是三个囡仔的媽媽，嘛是台北市立大同高中國文老師。伊分享家己如何打造台語家庭：「欲傳承語言，一定愛自細漢開始。」透過講故事、唱歌謠、繪本共學的方式，欲予囡仔的台語，佇家庭生活中自然存活落去。伊也講著做序大的「斡頭症」，阿公、阿媽明明就會講台語，對孫仔煞轉做華語，伊講：這是過去語言政策下的心理創傷，需要咱的世代共修復好勢。 第三位是來自丹鳳高中的張心蔚老師，佇教會成長的伊，自細漢透過台語禱告、讀經、唱詩歌，建立深厚的語言感情。原本教國文的伊，最近轉教台語，主張台語課愛認真教「聽、講、讀、寫」，尤其是文字佮正字、正音。佇語文競賽中，張心蔚老師也積極參與，拚字音字形，欲予學生建立規律學習佮自信心，並且鼓勵用生活化、系統化的方式面對台語的學習挑戰。 三位老師的對談，毋但是教學現場的分享，猶閣是對「台語作為教育語言」的行動實踐。無論是以文學探討主體，抑是以家庭生活引領語言使用，in攏證明台語是有未來的希望。《臺灣夜市 Taiwan Yes》透過這場語言的夜市，欲予聽眾朋友看見教育工作者的用心，予台語重新佇學校、家庭、社會釘根，歡迎準時收聽。

來賓：台語喜劇演員 艾董 中央廣播電臺《台灣夜市 Taiwan Yes》節目，繼續邀請台語喜劇演員「艾董 Eric」，佇第二集節目當中，分享伊的生活觀察、家庭教育、語言學習、佮工課場的溝通哲學，展現一位 stand-up comedy 演員迒過喜劇舞台、教育現場佮工課場講師的多重身分，笑詼中攏是人生智慧。 節目主持人曾偉旻佮來賓 Eric 開場模仿「中央廣播電台的標準開場音」來拍招呼，討論語言模仿佮語感的生活訓練方式。節目進一步深入探討家庭中的語言實踐。 艾董分享查某囝五歲開始學語言，學英文、也接觸日語，台語是自幼稚園的唸歌開始接觸。艾董講著，查某囝會主動觀察、模仿，甚至參與爸爸的表演，佇現場用伊的方式弄觀眾笑，有一回艾董講笑話，台跤無人笑，伊的查某囝就講，「這真好笑耶，恁愛笑啦！」 除了家庭教育，艾董也分享家己另外一个講師的身份，自藥廠行銷到 stand-up 演出，才閣到企業講報，主題涵蓋「工課場幽默」、「會議主持」、「報告技巧」等等。伊講：「工課場幽默，毋是家己感覺好笑，是會當予八成人感覺好笑，這才是真正有智慧的表現。」 閣有啥物精彩內容，趕緊收聽《台灣夜市 Taiwan Yes》，做伙感受「笑神降臨」的日常智慧。

來賓：台語喜劇演員 艾董 中央廣播電臺《台灣夜市 Taiwan Yes》邀請台語喜劇演員「艾董 Eric」，來節目分享伊如何自外商藥廠行銷，轉身踏入來台灣的 stand-up comedy 世界，用笑詼來療癒家己。 艾董本業是出身藥廠，過去因為做學員行銷訓練，愛共較困難、較深的藥理、病症，講課學員聽，愛有莫予人睏去的才調。 開始看人按怎講話，艾董發現國外的 stand-up comedy「講笑詼」，會當提升觀眾專注度，順紲練英語聽力。正式的表演之路，是伊2012年參加卡米地俱樂部喜劇演員甄選。艾董分享練習台語的撇步，包含佇中南部行銷醫療產品時，為著配合醫師語境，用台語來溝通；另外，也會透過搭坐計程車的時，觀察司機用語、模仿腔口，沓沓仔打造屬於家己在地化的台語風格。伊認為，台語講起來較有「氣口」，更加適合展現生活中的情緒。 節目中，主持人曾偉旻佮艾董，也講著台灣喜劇箍仔的變化，自地下室表演場到電視節目《Talk Show台語》的推出，台語喜劇表演者有閣較濟舞台。艾董強調：「台語stand-up comedy 毋是翻譯華語段，是用生活故事分享咱的態度佮觀點。」 節目最後艾董也介紹八月、九月，上新作品：《笑神降臨》台語喜劇演出活動，邀請跨領域台語創作者登場，包括寶島神很大主持人柯大堡、雙語網紅Peggy、喜劇團體「妹迪IN TAIWAN 」等，攏欲用無仝的笑詼風格，講出台語的現代性佮性命力。

受訪者：陳豐惠 李江却台語文教基金會執行長 中央廣播電臺節目《臺灣夜市》邀請語言復振推廣者陳豐惠老師，自台語最近復振的階段，和「語言轉型正義未完成的路」做主題，自具體的成果出發，深入解破語言壓迫的歷史根源，呼籲政府看重過去「加害結構佮責任歸屬」，啟動真正的語言轉型正義。 最近近年，臺語文復振出現有真濟成果，包括：教育部《臺灣台語常用詞辭典》的制定佮推廣、臺語拼音、書寫系統的標準化、公視臺語台的設立佮節目播出、以及傳播內容語言的「言文一致」等等，這寡作法，予少年世代的學習者，通有制度資源，也重新建構語言佇台灣全公共領域的見光度。 不而過，陳豐惠也明白指出，這寡制度建構，若無回頭去看過去歷史的傷痕、釐予清壓迫機制佮相關責任，語言轉型正義攏永遠只是空話。「是啥人下令禁止母語？是啥款體制之下公告羅馬字是禁字？這寡檔案攏揣會著，加害者毋是抽象概念，是具體的國家體制佮政策設計者。」 伊主張，語言轉型正義毋但是語言補償或者是教育資源的分配，顛倒是愛親像政治轉型正義仝款，公開檔案、回頭看歷史、揭示壓迫背景，看重語言消失的系統性壓迫。 阿旻也補充，臺語復振之路，無應該限致佇咧復振語言箍仔內，「按怎予無語言意識的大眾參與？按怎突破原有群體的仝溫層？」是這陣上大的關鍵。阿旻指出：「當臺語有制度、有教材、有標準，就閣較需要社會集體來承擔這个語言的未來。」閣較濟精彩內容，歡迎收聽這集《臺灣夜市》。

專訪：翻譯家 張君德中央廣播電臺《臺灣夜市 Taiwan Yes》這禮拜邀請來自德國、佇台灣生活超過二十冬的翻譯家：張君德 Günter Whittome，今年提著臺灣身分證，成做新台灣人。分享伊生活經驗，嘛講起台語學習的過程、臺灣的民主發展佮轉型正義的思考。 張君德分享40冬前到這陣，親身見證台灣自戒嚴行向民主的歷史變遷，並且用行動投入台語學習，碩士論文閣是研究二二八歷史，閣有伊做翻譯，成做臺、德之間，真重要的文化中介人的實踐。 1985年頭一擺來台，張君德表示，「彼時台灣猶是戒嚴時期，外國學生入境，若留長頭鬃，會被要求鉸掉，講是會教歹台灣少年，嘛會去予警方注意。」伊也強調：「彼陣台灣保守、威權，言論自由有限。這40冬來看著台灣慢慢民主化，真令人感動。」 張君德指出，語言毋但是工具，更加是行向一个社會、理解土地的重要門路。伊分享學台語的起點，是因為太太（輔仁大學博物館學研究所所長張省卿）來自台南，家族用台語交談，促使伊產生興趣、開始學講。這陣雖然蹛佇「天龍國的天龍國」天母，台語使用機會有限，但伊透過收聽台語廣播、收看台語電視節目強化台語能力，也觀察最近幾仔冬，台語節目大發展，閣有《國家語言發展法》政策上的進步。 節目主持人曾偉旻做對聯送予君德兄，「君子遷臺傳千里，德才釘根無比得」，感謝這位台灣囝婿，用翻譯之力、文化之筆，嘛學習台語，成做台灣佮世界非常重要的一座橋。閣較濟精彩內容，一定愛收聽《臺灣夜市》，做伙見證張君德的台語、台語意識，是毋是拍敗99%臺灣人的思考。

專訪：福建話運動協會秘書 啟灝 來自馬來西亞、這陣蹛佇咧韓國的啟灝，擔任福建話運動協會的秘書，透過中央廣播電臺《台灣夜市》節目，分享伊長年推動福建話復振的過程。 「我是佇馬來西亞北部大漢的，雖然我是海南人，但是佇檳城這个所在，福建話就是生活的母語。」啟灝表示，早佇咧2014年，因為看著少年一代對語言沓沓仔流失，佇朋友的支持下，決定成立福建話運動協會，透過正式組織來推動語言保存。 「語言的斷層毋是馬來西亞獨有。」啟灝指出，佇海外，欲維持母語，無法度干焦靠政府，也無法度靠官方教育體制，攏是靠民間社群的自發。「我無法度期待馬來西亞政府來保存福建話，咱愛靠自己。」 啟灝感性表示，台灣的台語運動予伊有真大的鼓舞。「台灣有國家語言發展法，嘛有台語專屬的公視台語台，這攏是全世界福建話社群看著的希望。」佇伊看來，台灣的成功經驗，已經變做全球語言運動的一个真好的例，尤其透過戲劇、綜藝、音樂，語言得以重新流行，變成一種時行的文化。 啟灝也堅定表示，過去佇劇場工作時，面對有人要求將福建話變成低路、粗俗的語言時，伊選擇堅決拒絕。「語言無需要變成別人恥笑的對象。」

專訪：農訓協會發言人 奚安鴻 「咱台灣的農、漁會，早就毋是過去人想的彼款『老老舊舊』的形象。」擔任中華民國農民團體幹部聯合訓練協會（簡稱農訓協會）發言人的奚安鴻，透過《台灣夜市》節目分享，今仔日的農漁會，佇咧轉型的路上，無論是數位力、電商，抑是社會照顧，攏沓沓仔綴時代咧行。 奚安鴻表示，農、漁會，其實早就發展出家己的電商平台，除了賣產品，農漁會的功能也咧擴展。因應台灣人口老化，真濟農會已經開始投入長期照護服務，農會的樓頂改建做日照中心，提供在地的老人關懷佮照顧。伊講：「這就是農漁會陪伴在地一世人的證明。」 面對AI時代，農訓協會也開始引進AI工具，輔助農漁會提升行政效率。「AI毋是欲取代人，是來做咱的好幫手。」奚安鴻認為，透過工具，農漁民會當閣較有效率拚生產。

專訪：農訓協會發言人 奚安鴻 過去是電視台新聞主播的奚安鴻，這陣轉換人生的跑道，佇咧中華民國農民團體幹部聯合訓練協會（簡稱農訓協會）的發言人。自媒體人到農、漁民的代言人，伊用另外一種方式，繼續為台灣這塊土地來講故事。 奚安鴻接受中央廣播電臺《台灣夜市》節目專訪，伊講「以前做新聞，感覺家己看著真濟代誌；不而過，入來農訓協會以後，才發覺，原來咱台灣土地上的故事，真正是濟甲，而且過去無了解過的。」 農訓協會主要的任務，就是替全台灣302間農會，40間漁會來辦訓練，輔導農漁民，推動產業升級、行銷，嘛協助佇數位時代轉型。伊分享，過去兩年伊開「數位力短影音」的課程，教農漁會的朋友拍影片、做社群行銷。這款訓練，已經成功培養出真濟有名的農村自媒體，推銷台灣的好物件，予閣較濟人看著。 「台灣生產的物件，有夠讚，只是較無人知影。」伊舉例，屏東九如鄉農會開發的「王梨纖維」，透過科技，共王梨葉提煉做布料、做鞋，嘛是一種環保，共廢物變做寶貝，開創農業永續的新出路。 講到語言，安鴻嘛笑講，伊雖然自細漢，轉去到台中大里，猶有和阿公、阿媽講台語，這陣這个語言，無拍算去。伊會曉用台語和農民講話。伊講：「面試農訓協會的時，第一句就問我：『台語聽有無？會曉講無？』」語言毋但是工具，更加是和人、和土地，建立感情的橋。

專訪：台灣網球國手 莊吉生 《臺灣夜市 Taiwan Yes》節目，今仔日邀請網球選手莊吉生Jason 做伙來分享伊自美國成長、轉來到台灣發展的故事。自2017年世大運單打金牌、2023亞運雙打金牌，嘛佇國際上為台灣發聲，Jason 用性命行動展現運動、家庭、認同佮文化之間的貼峇關係。 莊吉生講，伊是佇美國出世，佇Twinglish的語言環境大漢，因為阿爸、阿母攏會講台語，所以自細漢開始，就一直浸佇台語環境內底。雖然是佇美國成長，伊對台灣一直有真深的感情，2017年世大運，為台灣提著一塊寶貴的金牌，嘛佇彼時用台語受訪問，予閣較濟人熟似伊。Jason強調，希望共台語繼續傳予後一代，也感謝阿爸、阿母佮兄哥，對伊人生佮運動路上的支持。 不而過因為運動受傷愛開刀，伊也坦白講著運動選手佇傷後復健、心情調整的困難。2024年開刀後經歷低潮，最近才沓沓仔恢復訓練。伊講：「身體調整重要，心理調整也是關鍵。欲共信心佮比賽節奏揣轉來，誠困難。」 講著家庭，Jason這陣有一个半歲外的囡仔，做新手阿爸已經漸漸慣勢。伊講：「我希望伊未來會講台語，但是莫行我這條真艱苦的網球路，無得確會使拍籃球、高爾夫球。」 Jason嘛分享伊少年時，佇美國參加FAPA（台美人公共事務會）的經驗，透過政治學的學習養成，產生對社會議題的敏感度。伊表示，無論是體育界、公共事務，攏希望為台灣貢獻心力，也鼓勵少年人積極參與。閣較濟精彩內容，請鎖定《臺灣夜市 Taiwan Yes》。

受訪者：中央研究院歷史所 研究員 都留俊太郎 《臺灣夜市 Taiwan Yes》邀請臺語輾轉、田野經驗真豐富、對臺灣歷史有真深感情的日本學者：都留俊太郎，來和逐家分享伊佇台灣生活，尤其是彰化二林的故事。 都留俊太郎這陣是中央研究院歷史所的研究員，過去捌有幾若擺機會，來台灣做交換生、做調查。伊臺語講甲真滑溜，阿旻呵咾伊的臺語，「比九成以上的台灣人猶閣較標準！」 都留老師分享，一開始是對中國歷史有興趣才學華語，毋過佇大學時代發現，雖然臺灣以前是日本的殖民地，但逐家對彼段歷史知影真少。因為彼款「毋知影」引起伊的好奇心，決定親身來到台灣深入了解。伊選擇彰化二林做研究基地，就是欲對1925年二林蔗農事件好好仔研究。 佇做田野調查的過程當中，伊發現在地的序大對這件代誌已經無啥會記得。加上經過日本殖民佮國民政府的雙重壓迫，這段左派背景的農民運動，漸漸無人敢講。但都留老師透過和阿公、阿媽長期交陪，一步一步鬥出事件的面貌，伊的研究視野，嘛因為這款交流，擴展到農村婦女生活經驗佮農業技術引進的研究。 都留老師講起，伊這陣去到二林，攏蹛佇一位差不多欲百歲的阿公厝內，阿公有影共伊當做孫仔咧惜。阿公對伊講「面模仔足成伊少年時，佇日本時代做兵頂司，所以想欲照顧我。」這款超越國族佮世代的情誼，真正是研究過程內，另外一段特別溫暖的感受。 都留先生最近共研究寫做冊《劉崧甫鐵窗日記》，收錄二林蔗農事件的領導者佇監獄內所寫的手記，經過整理、拍字、註解出版，予這段歷史重見天日。伊強調：「農民運動毋但是菁英的抗爭，更加是複雜社會佮經濟交織的結果。」閣較濟精彩內容，請收聽《臺灣夜市 Taiwan Yes》。

專訪：臺文系學生團 中央廣播電臺《臺灣夜市 Taiwan Yes》節目，最近邀請國立臺灣師範大學臺灣語文學系的學生，來到節目現場分享in對台語、台灣文學以及文化的熱情佮想法。透過這陣學生囡仔的故事，看著台灣語言教育佮文化推廣的新機會。這擺訪問內底，有台灣語文學系的主修生，嘛有國文系兼修台文的學生，甚至有特殊教育系的學生，攏是因為對台語佮台灣文化真有興趣，才會無相招、無相約來讀台文。 國文系四年級的沂蓁，選擇雙主修台文系。伊感覺，學台灣歷史文化，會予人視野更加開闊。伊坦白講，拄開始上全台語的課，真袂慣勢，甚至感覺「頭眩眩」，毋過經過沓沓仔適應，才發見家己對推廣台語，猶有真深的熱誠。來自特殊教育系的冠蓁表示：「欲和世界交流頭前，愛先了解自己的文化」，講出伊選台文系課程的初心，也表現出伊對多元文化融合的體認。 青春佮文化的撞擊 台文系學生像是黃海納佮郭惠茹，也透過課內、外活動，展現對台語佮台灣文學的意愛。海納捌參加師大開辦予日本人做伙學台語的課程，感受非母語者佮台灣人學台語的差別，嘛希望未來有機會佇博物館或文化機構推廣台語。惠茹家己參加歌仔戲社團，共台語創作佮傳統戲曲結合，甚至寫劇本，展現台文系學生對語言藝術的創造力，「文言文的優美，嘛會佇台語戲劇內底展現出來」。 另外，仝款是央廣主持人，台語、客語攏真好的彭桓恩，這陣雖然干焦只是大學部一年仔學生，不而過已經通過台語專業級C2認證。伊深深感受教育現場台語老師人數不足，希望未來發揮教育專長。若有機會嘛會是繼續發揮媒體專長。閣較濟精彩內容，請收聽這集的《台灣夜市》。

專訪：《失落在膚色底下的歷史》作者陳中勳 佇台灣，有一段歷史長期予冷戰的陰影崁咧。一寡有臺、美血統的半仿仔，出世佇台灣這塊土地，毋但無得著完整的承認，in的故事嘛罕罕會予主流社會聽著。《Taiwan Yes》透過調查報導，去看「亞美混血兒」的真實處境，特別共焦點囥佇咧咱過去訪問過的邱漢忠的性命歷程，以及今仔日的來賓研究者陳中勳，所扮演的重要角色。 邱漢忠是一位出身苗栗卓蘭囡仔。阿母是泰雅族原住民，但伊對生父的背景，攏毋交待。伊大漢的時陣問阿母：「你白皮膚，阿爸嘛是白皮膚，我按怎是烏皮膚咧？」阿母只是回講：「恁爸，是客家人啦。」對一个囡仔來講，嘛只好相信。 實際上，邱漢忠是由台灣的養父扶養大漢，彼時伊叫是彼就是親生阿爸。愈來大漢，才愈來愈來感受著家己膚色佮家族的差異。隨年齡長，成做心內的大縫，也變做伊追尋家己身世真相的動力。 邱漢忠毋是單一的案例，伊是冷戰時期台灣歷史的縮影。彼陣美軍駐台，佮台灣女性生落來的囡仔，絕多數無婚姻保障，美國大兵撤軍轉去美國以後，這寡囡仔佮in的出身嘛予人放捒，根據統計，台灣有超過一千人。佇這段差不多，予國族記持排除的歷史內底。陳中勳過去寫碩士論文的時，就踏入去這條例使道路。伊用歷史、文獻、田野調查佮訪談的方式，透露冷戰佮性別政治之下的混血兒現象。 佇《Taiwan Yes》調查報導中，陳中勳講起，1950年代韓戰爆發、美國第七艦隊入台海的背景，嘛講著越戰高峰期，1965年到1972年間，台灣變成美軍R&R（休假）重點站。根據伊的統計，有超過二十一萬人次的美軍士兵經過越南來到台灣，佮台灣美軍營區附近，女性產生短短仔，煞深刻的交會。 戰爭結束以後，就是遺憾的起點。1979年1月1日，美國佇外交上選擇與中華人民共和國建交，宣佈與中華民國斷交，並且全面撤軍。這項政治決策，表面上是戰略轉向，實際上嘛是濟濟半仿仔囡仔佮in的媽媽，開始予人放捒的命運。 「冷戰毋干焦發生佇國際談判桌頂，嘛寫入去台灣人的日常生活。」雖然美軍離台已經超過半世紀，台灣社會對這段歷史的記持，煞攏袂記得。

專訪：臺語專家：王秀容 《臺灣夜市 Taiwan Yes》邀請「臺語界的Google語音小姐」，王秀容老師來做客。王老師是臺語教學的專家、作家、台語節目顧問，最近嘛拍算欲投入Podcast創作，用各種媒介推廣臺語，用伊的聲音、文字、行動，寫出屬於臺灣的語言故事。 王秀容老師分享伊自英語老師，兼做臺語推廣者的心路過程。彼當初，參與教育部語音詞典的錄音計畫，自錄音室內孤單一人起步，予臺語語音文字有標準化的基礎，伊坦白講「艱苦嘛快樂」，但這份堅持，也予初學者透過語音詞典，學臺語閣較順序。 毋但語音錄音的工程，王秀容所粒積的文學創作成果也真豐富，出版有《我咧唱歌》、《咱來讀讀》，最近真緊就會有新作品和逐家見面。毋但按呢，王老師也宣佈Podcast《王桑一工（Awesome Today）》，透過臺語講故事、分享人生，繼續用聲音，為臺語的沃肥。敬請逐家準時收聽《臺灣夜市 Taiwan Yes！》。

專訪：楊肅浩 臺灣夜市節目訪問宜蘭教師歌手楊肅浩，阿旻發見音樂對伊來講，毋但是興趣，更加是對社會的回應。 楊肅浩三擺入圍金曲獎，最新專輯〈像我這款人〉入圍最佳台語專輯、最佳台語男歌手。 楊肅浩平常佇咧學校教冊，攏利用課外的時間寫歌、錄音、演出，想欲透過音樂，替彼寡家境較無完整的囡仔講出心內話，伊用〈毋成囝〉共教學第一現場的觀察寫落來。〈像我這款人〉是楊肅浩失戀以後寫的反省情歌。 製作人陳建瑋形容楊肅浩聲音就親像地圖，過去佇咧民謠風領域走踅，不而過這陣地圖已經較大張，楊肅浩的聲音表現會當有林強、李英宏，甚至伍佰的個性，嘛予民謠唱法，跳出閣較濟無仝款風貌的呈現。

今年《台灣夜市》節目，主持人阿旻特別親身參加白沙屯媽祖進香，用雙跤踏出一段充滿感動的朝聖之路。自苗栗白沙屯出發，經過台中、彰化、雲林，回程200年來頭一改，來到南投名間鄉，沿路體會信仰的力量，也感受著人情味的溫暖。 5/1起駕的暗時，總統賴清德親身到場，獻予拱天宮「拱昭天佑」的匾仔，象徵用正念佮善行來照映社會。總統也強調，媽祖信仰毋但是宗教活動，更加是台灣土地文化的根佮靈魂。 阿旻佇節目中分享，這改進香的路雖然艱苦，毋過沿路攏有熱心的信眾相扶持。有的香燈跤主動載路人、有的分茶水、便當，這寡沓沓滴滴，攏是正港的台灣人情味。雖然跤疼、身體疲勞，毋過心內滿滿是感動。 特別是，今年媽祖第一改歷史性踏入南投名間鄉，成做全國的大新聞。真濟鄉親歡喜迎接媽祖，嘛有人提出疑慮講：名間是好山好水的茶鄉，若欲起焚化爐，會影響咱的水質佮空氣，甚至連茶米品質嘛會受害。這款議題，也透過媽祖的跤步，引起逐家關心。

專訪：王水源 「毋是咧賣古錐，是咧探索語言和身分的組合。」饒唱歌手王水源講著伊和桃子A1J合組的「水蜜桃偵探社」，合作歌曲尋人 Belongingness ，源自比賽作品，歌名趣味閣有意思。桃子有越南台灣的雙種血統，王水源來自大甲溪，兩人攏有一寡語言認同的走揣。水源就講：「阮攏揣家己的位，嘛想欲共這份走揣寫做歌」in的音樂融合台語、華語佮越南語，佇旋律佮歌詞之間，唱出跨文化的溫柔。 王水源另外一个身份是和阿跨面的製作人，有時陣，阿母閣會食醋講：「加做寡家己的經營，莫干焦幫人做音樂」。緊來聽臺灣夜市精彩的訪問。

跨界與共振 宜蘭腔月琴的拼貼 專訪饒舌創作者：STACO STACO毋但做喋舌音樂，嘛自學攝影到MV剪輯，沓沓仔發展出屬於家己的一條龍創作系統，予伊成做會當共影像語言佮喋舌歌詞，並存的音樂人。 歌曲《晃》：「親像大神尪咧晃，東部的水分一直綴我到大漢，這馬請在地的鼓陣來徛台，愛膨風的廟公我根本無熟似，牲禮佮禮數就交乎咱傳」，共廟會的遶境的神像，描寫甲真傳神。 講著喋舌，嘛會當號做西洋唸歌，STACO佮台灣月琴音樂傳人張雅淳聯手，融合月琴旋律。「我一開始就咧想，既然西洋有吉他，咱台灣也有家己的弦仔聲。月琴就是台灣的吉他。」透過現場演奏、取樣，閣剪接鬥出旋律段落，創造出新型態的傳統佮街仔頭融合。

一恩，南美洲厄瓜多出世的台灣囡仔，阿爸是台灣人，阿母是厄瓜多人。雖然面容仔親像外國人，但一開喙講台語，已經拍敗這陣99％的少年台灣囡仔，阿旻《臺灣夜市》邀請伊來分享伊的故事。 厄瓜多佇咧南美洲西北邊，國土面積是台灣七倍大，人口差不多欲兩千萬。佇世界地圖頂，佇赤道線（equator）旁邊，所以厄瓜多（Ecuador）嘛予人叫做赤道國。 一恩的阿媽佇1960、70年代，隨著台灣漁業佮養殖產業出外發展的時勢，規家搬去厄瓜多，聽人講佇彼爿蝦仔飼甲真好，機會嘛真濟就決定去到異鄉。 一恩笑講：「阮佇厄瓜多厝裡，攏是講台語啦！」佇伊的記憶裡，教伊台語的人就是阿媽。雖然伊是佇厄瓜多大漢，厝內的語言是摻來摻去：老爸、老母講西班牙語，阿媽堅持講台語，所以從細漢就慣勢，語言轉化的生活方式。 不而過，17歲轉來台灣讀大學，一開始台語講甲猶真順。但伊的室友來自馬來西亞，自然就講華語，台語才開始變生疏。兩三冬前，伊決定開 YouTube 頻道，用台語拍片，行入街仔頭佮市仔，用台語佮人開講。 一恩佇台灣生活一段時間後，上著驚的是：「這陣台灣的少年人，攏袂曉、猶是無愛講台語？」 伊原本以為台語是逐家的母語，台灣到底為啥物的變按呢？主持人阿旻聽著那講：「這毋是逐家的毋著，這是政策的毋著。」阿旻解釋過去國語政策，強迫逐家講華語，台語、客語、原住民語攏變做禁忌，講會罰錢。這段歷史，予台灣幾仔代的人語言開始斷根。 這陣，一恩是幼兒美語老師，嘛是一位影像創作者。伊用台語、英語、西班牙語、華語四語咧拍影片，分享生活佮文化。伊的頻道內底，一支真感動人的影片《8000公里予阿母的Surprise》，翕的是伊飛去嫁去夏威夷姊姊in兜探望阿母，自頭到尾攏偷偷仔計畫、紀錄，最後母仔囝總算閣再重逢。 另外真濟影片，是伊佮仝款是臺厄混血的好朋友Tommy 的故事。兩人攏是台語囡仔，嘛做伙回想厄瓜多的囡仔時記持，佮這陣佇台灣生活的趣味代。 節目尾聲，阿旻送伊對聯詩：「一心一意愛台灣，恩情四海慶團圓。」這毋但是真情的祝福，嘛是為一恩迒過兩萬公里的認同之旅，上界溫暖的註解。

專訪：成功大學台文系學生/ 臺越新二代 林俊義 「俊才志氣台越行，義理走揣一定贏」。《台灣夜市》訪問臺灣、越南新二代林俊義，伊用台語佮越南話，講出家己的認同之路。 彰化埔心出世，林俊義是台越新二代的代表性青年。老爸做室內裝潢，阿母來自北越人。伊細漢的生活場所，就是工地，佇工地學會曉台語。 雖然老爸、老母平常是用台語講話，但對伊講話的時，煞改做華語。雖然參加過台語演講、朗讀比賽，嘛得過獎，但台語予伊的感覺，是「比賽語言」，毋是「生活語言」。 2019年，林俊義得著「總統教育獎」，彼年，伊代表得獎的國中生發表感言，用台語、越南話、客語、華語等語言講出多元認同，但這个光榮，毋干焦是掌聲，對伊來講，嘛是「沉重的重擔」。 「彼是祝福，也是一種責任。」當當社會期待伊代表台越新二代、代表台語學生、代表新住民家庭的聲音時，伊開始問家己：「我是啥物人？我為啥人講話？」這寡問題，變做伊人生的重要課題。 伊開始回想阿母台語講甲遮好，是一款用台語建立越南新移民佇台灣「有身分地位」的方式，只是往過無認真去想這款問題。 「我發現我對阿母的語言、文化，真生疏。」林俊義講。伊開始主動學越南話，問阿母彼陣「按怎適應」的生活，閣家己𤆬弟弟轉去越南探親。過去親像觀光客，這陣，伊會曉用越南話講話，感覺完全無仝。 重新走揣語言的過程，也予伊發現臺灣社會內面有真濟新住民、移工的聲音攏被看清。「講著新住民、移工，多數時攏是別人代言，真正家己聲音予人聽著的機會真少。」 這馬佇成功大學台灣語文學系的伊，共語言當做一種參與社會的工具。伊毋但欲用語言證明啥物，顛倒是欲用語言理解世界。未來，伊想欲做中學老師，陪伴對語言、文化佮認同感到迷惘的囡仔。 伊知影，這條路無簡單，毋過就是因為困難，才更加值得行落去。 林俊義的故事，是台灣濟濟移民新二代中成功的代表。伊行過工地，嘛起去咧舞台；伊對模糊內底走揣認同。雖然捌是「總統教育獎」的典範，嘛勇敢承擔「新二代身分」的重量。

來賓：來者何人 Whoou!樂團 / 音樂家 臺灣夜市專訪《來者何人 Whoou!》自2023年成團，就用特殊的搖滾嘻哈風格，佇咧各大音樂比賽受著肯定。這支融合嘻哈、舞曲、雷鬼等流行元素的少年樂團，堅持用上生猛的方式，唱出屬於台灣囡仔的態度佮精神。《來者何人 Whoou!》主張：「Hip-hop毋免穿垮褲，弄舌嘛毋免假影Cool。」節奏是對態度來，氣氛是對心肝底發出來。邀請逐家做伙來感受台味搖滾嘻哈的新世代能量！

來賓： Hî-á Lîm /《拷秋勤》主唱 《臺灣夜市》這集邀請臺灣本土弄舌唸歌樂團「拷秋勤」的主唱——Fish Lin（Hî-á Lîm），引領咱行入去弄舌音樂佮母語創作的世界。 拷秋勤2003年創立，用台語、客語、華語等語言，結合同南管、北管、民謠、勸世歌等等臺灣傳統元素，創作出屬於咱臺灣味的Hip-hop音樂。Hî-á Lîm 過去佇咧國立臺北藝術大學建築與文化資產研究所出業，對臺灣文化有深厚的理解。伊毋但是台語主唱佮詞曲創作者，閣是長期參與社會運動的行動者，用音樂記錄，嘛用身體實踐。拷秋勤其中一條歌曲《官逼民反》，甚至嘛是社會運動抗議的國歌。 雖然拷秋勤經歷過休團佮重組，這陣猶原堅持用本土語言、用弄舌來寫臺灣當代的社會，連結人佮這片土地。這陣Hî-á Lîm在額的工課，是佇十三行博物館做研究員，伊嘛分享伊按怎透過博物館辦台語活動，注入閣較濟本土意識、台語意識。欲延續過去音樂創作的能量，予身軀邊的每一項代誌，有閣較濟推動語言復振的動力。 做伙透過《臺灣夜市》節目，來聽Hî-á Lîm的故事，了解台語的未來按怎行落去。

來賓: Smalling / 極限破台語YouTuber 來自馬來西亞的 Smalling，來台灣定居已經倚近20冬。因為工課，需要用台語和人接接，雖然台語無講真輾轉，但是敢開喙講、認真生活，開 YouTube 頻道叫做《極限破台語》，翁婿「板橋李準基」是藏鏡人，幫忙翕影片、講生活，有影心適！ 這回《臺灣夜市》邀請 Smalling 來分享伊做 YouTube 影片的心情，嘛講著夫妻感情的甜蜜，講笑話、翕影片，攏是生活的一部分。雖然最近較少經營社群媒體，毋過伊講，未來會繼續記錄生活。 歡迎收聽中央廣播電台《臺灣夜市》Taiwan Yes 節目，來聽聽看大馬新婦佇台灣如何生活、如何學台語，感受咱台灣文化的溫度佮趣味！

來賓: 克寧（khu-lì-mù）/《寧可當吃貨》Podcast 節目主持人 《臺灣夜市》邀請《寧可當吃貨》Podcast 節目主持人——克寧，分享伊按怎透過「食」來講故事，講文化，講人情味。「真愛食，嘛真佮意講故事。」就是因為這个簡單的想法，克寧當初開始做節目，想欲陪伴像伊仝款的上班族，佇咧中晝食便當的時，通聽輕鬆的聲，轉換一下仔心情。對克寧來講，「食」是引路的窗仔門，欲用這條路，行入去別人文化的內底，學習同理、學習包容。面對Podcast創作的艱苦歲月，嘛來聽佇咧廣告產業的上班族，按怎利用生活的閬縫，用聲音記錄台灣的人情味，用故事感動每一位聽眾。

來賓：邱漢忠 / 臺美血統混血兒 台灣出世的邱漢忠，自細漢就知影家己佮一般的臺灣囡仔無仝款。烏色的皮膚，自細漢就予人叫做「烏人」、「雜種仔」。伊對伊家己的身世嘛真好奇。泰雅族的阿母，一直攏講家己的親身老爸是蹛佇苗栗卓蘭的客家人，但是看皮膚的色水就知影，按怎看嘛無可能。 自七歲開始，伊干焦知影親生爸爸，過去是蹛踮臺灣的美國軍人。無留任何的批信佮相片。40冬來走過美國在台協會AIT、過去所有美軍的基地，或者是美國賽珍珠基金會，總是攏揣無任何線索。 因為美軍撤離台灣，佇美國的爸爸嘛毋知影家己佇臺灣有囡仔。 六冬前，邱漢忠透過DNA家族樹檢測，寄出一份喙瀾樣本，希望會當揣著佮家己有血源關係的親人。幾禮拜後，伊收著DNA直接比對著一位來自美國肯塔基州的查埔人，是一位號做Paul的70歲男性，正正就是伊的阿爸。 伊嘛飛去美國，開始伊的揣親之路。踏起去揣親之路，是按怎行過來？ 比起見過兩改面的美國，邱漢忠閣較尊敬完全無血緣關係的爸爸，這段故事，閣是啥物款的坎坎坷坷，《臺灣夜市》這集節目，專訪台美血統邱漢忠，歡迎做伙收聽。

來賓: Mond / Let's go Manila影音創作者 中央廣播電臺《臺灣夜市》節目，專訪出世佇菲律賓、九歲的時，搬來到臺灣的臺菲新二代Mond，「Let’s Go Manila」的創辦人。伊用家己豐富的文化背景，佮多才多藝的影音設計、講故事的能力，決心欲予臺灣人更加了解菲律賓。 Mond來臺灣的時，因為無學過華語，已經愛讀四年仔矣，煞因為語言袂通，愛降轉去讀二年仔。同學看著這位「大學長」，攏對伊充滿好奇。 Mond的阿母來臺灣，雖然有讀過華語語言學校，不而過堅持講和囡仔講菲律賓語，予Mond保持輾轉的菲律賓話能力。不而過，「因為媽媽做家己」，無想欲繼續學華語，自細漢Mond就做阿母的翻譯，譬如講，陪媽媽去移民署辦證件，彼陣猶少年細，就愛一直轉換華語、菲律賓話。Mond認為對伊來講，毋是單純是翻譯爾爾，顛倒是愛幫助母親佇臺灣的生活建立信心，一世人攏欲守護、保護媽媽。 為啥物是「馬尼拉」？ 濟濟臺灣人對菲律賓的印象，大部分是長灘島、宿霧，彼款島嶼度假風情，對馬尼拉其實無啥興趣，嘛無足熟似。Mond講：佇臺灣生活的菲律賓人，大多數是因為工課、家庭來臺灣異鄉討生活的人，所以佇咧臺灣所接觸著的菲律賓人，並無代表菲律賓的全部。菲律賓整體社會，因為貧富差距、教育水準、社會經濟狀況的落差，咱佇臺灣看著的，只是其中一部份而已。 毋過，對Mond來講，馬尼拉做為首都，結合這个國家過去歷史的一切，從殖民者留落來的文化遺跡，到今菲律賓人上真實的生活百態，欲熟似菲律賓，馬尼拉是上好入門的所在。 《臺灣夜市》這集節目，毋但精彩閣趣味，做伙透過Mond 的角度來熟似菲律賓，真有可能予你聽完以後，隨欲買機票，直接來去馬尼拉一逝。

來賓：弄舌歌手路易士 《台灣夜市》邀請南非弄舌歌手路易士（Louis），伊毋但是音樂創作人，閣是一位橫棍仔藝術家。路易士分享伊的音樂風格、創作歷程，閣有佇台灣成長的經驗，嘛分享伊上新專輯《地球儀》的創作靈感。 路易士的故事充滿傳奇性，伊佇南非出世，老爸是奧地利人，阿母是南非人。8歲彼年，伊隨老爸來台灣，閣佇佛光山長大。這款成長背景予伊對文化有足無仝款的接觸，伊的音樂創作融合英語、華語，希望未來挑戰台語以外，嘛欲挑戰泰語，展現多元文化交融的特色。 路易士講著伊上新專輯《地球儀》的創作理念，伊講：這張專輯毋但是伊音樂成長的記錄，也是對人生經歷的回顧。伊的歌內底充滿自我探索的情感，對過去身分認同的痛苦，到今仔日揣著定位。伊認為音樂是表達情感上好的方式，透過旋律佮歌詞，傳達內心上真的感受。 路易士講著老爸對伊人生的影響，老爸選擇出家，這个經歷予伊對人生價值有進一步的思考。伊坦白講，這陣上大的牽掛，就是老爸的身體。路易士嘛講佛教對伊影響真大，伊捌創作《做伙來學佛》，希望透過音樂來傳遞正向能量。伊認為，音樂毋單單是娛樂，也是精神的寄託。

來賓: 德狗(陳德民) / 藝術家 文化認同的走揣佮堅持 佇台灣的多元文化當中，新住民佮第二代的文化適應佮認同，真值得來討論。這擺咱邀請著台越混血的臺語歌手、YouTuber佮詩人——德狗，陳德民，來佮咱分享伊的成長經歷、音樂創作，佮伊對文化認同的想法。 陳德民的阿母是越南順化人，以前做老師，阿爸是台灣人。自細漢就予人用無仝的眼光看待，自細漢就予人問到大，人攏對伊的外表充滿好奇，甚至有一些刻板印象。伊回憶講：「以前閣無咧講文化尊重的觀念，大家攏共予小名，閣有人問我敢是原住民？甚至是阿勞仔、外勞仔，開始予伊思考：「我到底是啥物人？」 對創作到文化的使命感 音樂對陳德民來講，毋但是情感的消敨，嘛是文化傳承。伊的創作靈感，對伊本身的生性命經驗，閣對媽媽的家鄉越南、身份認同的思考。「我的音樂作品，無論是臺語抑是越南語，攏有過去刻板印象的表態佮成長的痕跡。」 比論伊創作的歌〈Khi Một Mình Du Lịch ở Việt Nam 當一个人佇越南旅行的時〉，歌詞內有一句：描寫伊佇越南時，會想念台灣；佇台灣時，閣會懷念阿母的家鄉——順化，擴大對新移民、移民工的心境。 對逃避到行動的轉變 「24歲才開始真正面對家己。」伊坦白講，佇阿爸破病的時，伊逃避，無願意面對未來的選擇。毋過佇阿爸過往後，伊決心袂閣躊躇，開始積極投入創作。伊參加文學獎，開始寫詩、創作音樂，佮影像製作。「過去我總是感覺家己無夠好、無夠資格，毋過我知影，這攏是藉口。」伊的詩作〈野草的志氣〉，寫著伊對人生的體悟，這首詩閣得著高雄文學獎，予伊更加確定伊愛用創作來表達家己的想法。 阿旻寫一个對聯欲送予德狗，「德狗才情迵台越，民間野草拚志氣。」鼓勵這位台越新住民二代，用伊的志氣，為臺越議題，透過文字書寫、音樂，繼續發聲。

來賓: 陳業芳 / 2024移民工文學獎頭獎得主 《臺灣夜市》邀請2024年移工文學獎頭獎得主陳業芳，分享伊的作品，佮過去佇臺灣生活的點點滴滴。伊自清潔工開始做起，佇工地熟似伊先生，後來嫁入臺灣家庭，愛著較慘死的趣味故事。 陳業芳過去咧做移工通譯，拄著雇主佮移工雙方文化的衝突。過去移工捌因為予雇主嫌傷貧惰，想欲做較積極咧，就幫神明洗身軀，這聲代誌大條囉，予雇主誤會，叫是伊對神明無禮貌。最後用臺灣傳統方式來解決——向神明跋桮（pua̍h-pue）請示，最後三个象桮（siūnn-pue，擲筊時擲出一反一正的筊杯，表示神明應允），成功化解誤會。陳業芳的作品予咱看著移工佇臺灣生活，因為誤會加深無理解，愛雙方攏換一款思考方式。 陳業芳的先生一開始，無贊成伊學台語，感覺學華語較有路用，不而過伊堅持一定愛學台語，最後因為伊台語的語言能力，予伊佇咧移工仲介工課場做通議，發展誠順利，成做新住民佮臺灣社會溝通的一座橋。尾手伊也開始替移工發聲，這陣佇政府單位內底，幫助解決移工的法律問題。 陳業芳認為，臺灣對移工佮新住民雖然沓沓仔較友善，毋過閣有真濟需要改進的所在，尤其是雇主對移工工作條件、薪資保障佮權益，應該有較公平的保障。伊希望用家己的經歷，透過書寫來予閣較濟人知影移工生活的困境，推動較友善的勞動環境佮社會制度。

來賓: 戴凱文 / 演員、模特兒 《台灣夜市》訪問臺巴濫血青年戴凱文，外表看起來是外國人，實際上算是正港的臺灣囡仔，雖然自細漢就蹛佇巴西，但佇遐和阿公、阿媽學唱臺語歌，接觸臺灣文化、食臺灣米；總算佇咧5冬外前，為著追求家己的夢想，對巴西搬轉來臺灣，一路做兵提著臺灣身份證，佇臺灣做演員、模特兒，嘛擔任總統府典禮的司儀。 2023年代表臺灣參加「全球先生」比賽，捌予人質疑代表性，毋過伊用正港的實力，和輾轉的臺語，證明伊愛臺灣的心袂比別人較少。

來賓: MOMO許慧盈 / 臺語復振者 「慧眼看重臺語路，盈滿復振有進度」，這是阿旻欲送予咱來賓MOMO許慧盈的對聯。咱看著MOMO推廣台語有功勞，無論是臺語公共傳播的建制化，或者是促進台語推廣的政策推捒，攏下真濟工夫。《台灣夜市》MOMO下集專訪，閣一改邀請聽眾朋友來感受臺語箍仔推動語言權益的拍拚。 MOMO許慧盈特別講起，目前台語佇咧少年人之間，使用交流的機會猶算較少，強調若欲予台語真正變成生活的語言，少年世代的參與是真關鍵。創造多元的台語使用環境嘛是真必要的，予台語自然流動，恢復伊早前臺灣共同語的榮光，邀請逐家做伙來拍拚。

來賓: MOMO許慧盈 / 臺語復振者 祝福聽眾朋友新年快樂！《台灣夜市》特別邀請MOMO許慧盈，分享新推出的《看圖學講台灣話》，透過創意設計為囡仔連起去「臺語WIFI」。 許慧盈表示，看著其他國家攏有幼兒語言圖冊，獨獨欠臺語版本，所以伊下願，欲用插圖佮點讀筆，予臺語囡仔透過聲音和圖像自然學台語。為著這本冊伊家己閣創作三條囡仔歌，她特別講，台語歌謠是學習語言的上好的工具之一。 MOMO嘛向望閣較濟人重視台語學習，並且做伙推動國家語言的復振。新的一年，《台灣夜市》邀請逐家共「臺語WIFI」連起來，共同傳承語言的媠佮文化的驕傲！

來賓: 秀峰高中女壘隊 《臺灣夜市》專訪秀峰高中女子壘球隊下集，總教練闕明慧講出過去是國樂二胡手，現場舒菮教練、斯涵教練佮兩位球員學生，攏展現不可思議的表情。闕明惠教練緊做補充，國校仔時期會佇國樂團挨弦仔（e hiân-á），因為過去身體較差，才沓沓仔開始運動、接觸棒球、壘球踏入體育界，甚至代表臺灣參加奧運比賽，自壘球選手一直做到這陣總教練的過程。 舒菮教練、斯涵教練，兩位也分享過去年少輕狂，到回歸母校的用心良苦，期勉學生球員愛行正途，莫行過去教練行過錯誤的路，展現對學生球員的目標佮期待。 高三學生何恩祈勉勵家己，已經有U18女子壘球國手經驗，高中出業到大學，向望加入U23國家代表隊，用這款目標，拍拚提升家己的實力。高一生陳嘉穎嘛分享心聲：「我知影家己猶無真濟機會上場，但希望透過拍拚，予教練看著我的成長佮進步。」有歡笑、有對未來有期待，秀峰高中女壘隊精彩訪談內容，趕緊來收聽。

來賓: 新北市秀峰高中女子壘球隊 《臺灣夜市》專訪新北市秀峰高中女子壘球隊，總教練闕明慧𤆬領教練團舒菮·林桑卡丁、楊斯涵，閣有兩位學生選手何恩祈、陳嘉穎，分享佇壘球、棒球球場頂的拍拚佮辛苦的練習、比賽過程。 闕明慧總教練特別講規个球隊，對運動的熱愛佮對學生的影響力，尤其舊年參加烏豹旗棒球比賽，自壘球到棒球的調整，佮重新建立信心的重要性，另外，就是出手點對訓練的影響。伊嘛講著烏豹旗比賽中，愛趕緊適應佮轉變策略。 選手方面，U18國手何恩祈佮陳嘉穎分享兩人對壘球的熱愛佮夢想。恩祈講，從細漢佮阿兄做伙練球的經驗，予伊對棒球佮壘球都無生疏，未來目標是欲挑戰U23國際賽。 陳嘉穎回想伊自國小，因為看查埔囡仔掔球，非常有興趣，開始接觸運動。到國中加入校隊到高中堅持的過程，但是一開始拄著厝內序大煩惱身才會「走精」，嘉穎講「運動予我有自信，我真媠」做信念，堅定對壘球的夢想繼續行進前。 教練嘛分享佮學生之間的溝通佮互動，舒菮教練用「保母角色」來描述伊家己，一點仔一滴幫助學生度過難關、陪伴、成長。思涵教練分享自入秀峰高中入校隊，接著第一粒的球，闕明慧總教練投出來的球，速度緊閣雄，完全無咧客氣，予伊目屎直接碾落來，印象一世人都會記得。嘛透露大學畢業以後，閣轉來母校做教練的心路過程，嘛佇教練角色內底揣著成就感。

來賓: 流氓阿德 / 歌手、主持人 《台灣夜市》台語歌王流氓阿德專訪下集，分享伊聲帶重生的感動故事，這是伊聲帶手術後的回歸之作。阿德坦白講，因為聲帶手術，予伊煩惱無法度閣再唱歌。重新轉去錄音室唱出第一句歌詞 ，聲音狀態竟然遮爾媠，有影有一種「頭過身就過」的狀態，順利完成專輯製作。 節目焦點嘛囥佇阿旻邀請德哥製作食食音樂《台灣第一味》，因為點蚵仔麵線欲摻芫荽（香菜）無，所製作的歌曲，嘛用布袋戲「蘆洲大滷俠」、「苦海女神湯」，這兩个角色呈現歌曲，最後唱出愛是正港台灣第一味。阿德嘛講過去的流氓氣已經較溫柔，笑講：鱸鰻這陣已經變彌勒佛矣啦！

來賓: 流氓阿德 / 歌手、主持人 金曲歌王、金鐘獎雙料主持人流氓阿德新專輯《某乜人》轉來央廣Rti，參加曾偉旻 主持的《臺灣夜市》。節目滿滿的音樂佮記持，閣有滿滿笑聲，流氓阿德一時興，趣味做「主持人」，閣半滾耍笑講「歡迎收聽『全世界最亮的光』，「阿旻仔你好，欲來訪問阿旻」。 流氓阿德轉來央廣錄阿旻的節目，收著真濟工作人員的熱情歡迎佮禮物，一直喝「感動佮歡喜」。阿旻𤆬流氓阿德去看伊人生內第一座金鐘獎座，這陣展示佇咧玻璃櫃仔內，感覺有影充滿記持佮光榮。伊講：「央廣是我的後頭厝，遮有我真濟重要的回憶，也見證我的成長。」 流氓阿德佇《臺灣夜市》節目內透露，伊的新專輯親像一幅性命的鬥圖，每一條歌攏是伊人生內的一塊。伊講：「人生行到上尾一步，攏咧走揣。得著的是禮物，失去的是緣分」，每一步攏咧走揣人生的「意義」。透過音樂，阿德希望傳達伊的30冬來，音樂哲學佮性命故事，嘛用德式情歌予人閣較濟感動。阿德嘛感性呼籲逐家支持，支持伊對音樂夢想的堅持。「人生的彎彎斡斡，攏咧鬥出性命的意義」，請逐家做伙收聽《臺灣夜市》，陪阿旻和流氓阿德做伙走揣。

來賓: 潘信維 / 音樂家 「信仰音樂輕輕說，維持能量幕前做」，這是阿旻送予音樂人潘信維 (Lil Pan)的對聯。阿旻充分感受伊對音樂的堅持，自幕後行向幕前，彼款能量有偌強。央廣《臺灣夜市》潘信維專訪節目下集，伊繼續分享臺南囡仔的音樂創作歷程，對故鄉佮城市生活的特別的觀察，用《出外人》的拍拚過程，共生活觀察、哲學觀和音樂靈魂攏總結合起來。 《查埔人一首歌》這張專輯嘛和真濟「大跤」合作，除了Matzka，閣有icyball 冰球樂團等等。潘信維講親像專輯內的《失戀歐兜邁》，就是icyball 冰球樂團特別共上好的臺語創作「割愛」留予潘信維。閣有啥物精彩內容做伙來聽。

專訪：潘信維 / 音樂製作人 《臺灣夜市》邀請音樂界全能製作人，嘛是天王天后幕後的推手——潘信維。除了製作Energy合體專輯，共經典歌曲《放手》有新性命、嘛閣製作《現在是星期五》這條衝甲掠袂牢的歌，最近嘛出版家己的新專輯《查埔人一首歌》受著注目！ 天王天后指名的音樂製作人潘信維，最近幾仔冬，受著五月天阿信的啟發，自幕後行到幕前來，用歌手的身分推出頭張台語創作專輯《查埔人一首歌》，唱出家己的人生故事佮製作歌曲的情感。 這位來自台南的音樂人，自細漢就愛音樂，自「紙上彈鋼琴」，這陣家己徛起去歌唱舞台，用溫醇的聲嗽唱出迷人的音樂。節目內，潘信維分享伊的音樂路，自臺南樸實的家庭出世，為啥物細漢時，連琴都無法度摸著，靠母仔畫的琴鍵A4紙來學琴，尾仔是因為真正有興趣，和弦無法度彈囉，母仔才去買鋼琴。閣有啥物趣味的音樂故事，歡迎逐家收聽，感受潘信維的音樂故事，透過《臺灣夜市》做伙探索！

受訪者：圓仔姊姊/葉又菁 《臺灣夜市》繼續深入了改台語配音員「圓仔姊姊」葉又菁，分享伊按怎自科技新貴的工程師，轉型做專業配音員，為台語配音界注入新活水。 葉又菁過去是臺灣大學機械工程研究所的高材生，畢業以後佇咧廣達電腦做工程師。原底有表演的夢，不而過因為身懸超過百八，「妳遮躼，揣無和你配戲的男主角！」予媽媽苦勸以後，進入穩定的科技業。 不而過，結婚以後，伊對聲音的熱情無消退過，開始上配音課。自興趣開始，沓沓仔用聲音展現表演實力，全心投入配音事業。但是，初初面對技術挑戰的失敗，一句簡單的臺詞，攏講袂好，一步一步模擬角色的肢體動作，增加聲音表演的真實感，有影無簡單。若是你對配音有興趣，想欲透過聲音創造無仝的性命體驗，一定愛聽《臺灣夜市》，感謝聲音的熱情。

受訪者：圓仔姊姊/葉又菁 《臺灣夜市》「夜市來讀冊」，邀請你做伙探索臺語學習的新可能，這集咱特別邀請童話透中島的圓仔姊姊：葉又菁，介紹伊的全新創作：《古早古早，有一隻燈猴：圓仔姊姊臺語故事集》。這毋但是一本予囡仔的圖文書，更加是一本臺語引𤆬冊，連結臺灣文化佮世界經典故事，包括臺灣的〈燈猴的傳說〉和世界童話〈不來梅的樂隊〉。 圓仔姊姊分享伊為啥物選擇這寡故事做主題，以及伊咧改編過程中，按怎保留故事的文化精神，咧用臺語愛用閣較活跳的氣味來做表達。這本冊毋但是進入臺語的開端，創作一个親子共讀的文本，透過圓仔姊姊的改編、佮有聲的配音，予囡仔會當用臺語體會故事內底的智慧佮笑詼點，佇過程中閣較愛臺語。請鎖定12月初二《臺灣夜市》來探索，自配音員人生，踏入寫冊的點點滴滴，起造臺語故事的新世代。