euroradio.fm

Выправіўшы надакучлівага амерыканскага госця рабіць “хатнюю працу”, Лукашэнка спачатку прачытаў лекцыю па гісторыі генацыду палякамі беларускага народа. Пра тое, як пад палякамі беларусы сваю ідэнтычнасць гублялі, а пад уладай камуністаў — аднаўлялі. А потым вярнуўся да спраў, у якіх насамрэч разбіраецца, — інспекцыі фермаў і палёў. У гэты час вызваленыя і дэпартаваныя з краіны палітвязні спрабуюць пачынаць жыццё ў вымушанай эміграцыі з нуля. А эксперты спрачаюцца пра будучае “перамоўнага трэку Мінска і Вашынгтона”: ён завяз, працягваецца з невялікімі зменамі ці імкнецца да “затухання”? Ці, можа, ўвогуле ўжо скончыўся… Ці можна разлічваць на працяг перамоў і вызваленняў у выніку пагадненняў паміж Мінскам і ЗША? Ці атрымаецца ў Трампа калі не схіліць увесь ЕС да перамоў з рэжымам Лукашэнкі, то ўгаварыць хаця б нейкую з краін Балтыі дазволіць праз яе тэрыторыю транзіт беларускага калію? Якая роля Беларусі і лукашэнкаўскага рэжыму ў накіроўванні расійскіх БПЛА на цэнтральныя і заходнія рэгіёны Украіны і ў правакацыях, якія ладзіць Расія ў дачыненні да краін ЕС? На гэтыя ды іншыя пытанні ў эфіры Еўрарадыё адказвае палітычны аглядальнік Радыё Свабода Валерый Карбалевіч

На тэрыторыі Беларусі ізноў запрацавалі рэтранслятары, якія накіроўваюць расійскія БПЛА на Украіну. На фоне навін пра атакі беспілотнікамі памежных пунктаў пропуску на заходняй украінскай мяжы гэта выклікае шмат пытанняў да лукашэнкаўскага рэжыму з боку Кіева. У той жа час у Літве ўпершыню збілі дрон, які быў нашпігаваны выбухоўкай. Польшча накіравала да мяжы з Украінай вайсковыя сапёрныя падраздзяленні. У якасці тлумачэння — словы пра пагрозу з боку Расіі для ўсёй Еўропы. Эксперты папярэджваюць пра магчымыя атакі расійскіх войскаў цяпер не толькі на краіны Балтыі і Польшчу, але і на Малдову. Тэракты ў краінах ЕС, за якімі стаяць расійскія спецслужбы. Усё гэта становіцца будзённым у нашым рэгіёне. Ці можна з упэўненасцю казаць пра ролю беларускага боку ў накіроўванні расійскіх БПЛА на цэнтральныя і заходнія рэгіёны Украіны? Якая роля Беларусі і лукашэнкаўскага рэжыму ў эскалацыі і правакацыях, якія ладзіць Расія ў дачыненні да краін ЕС? Наколькі верагодныя “выпадковыя” расійскія ракетныя ўдары па Польшчы ці іншых краінах Еўропы? На гэтыя ды іншыя пытанні ў эфіры Еўрарадыё адказвае ваенны эксперт, аглядальнік групы “Інфармацыйны супраціў” Аляксандр Каваленка

Турма за беларускія народныя песні — Еўразум за 18 верасня | Новости Беларуси за 18 сентября by Euroradio

Юбілейны V беларускі фестываль Minsk x Minga пройдзе ў Мюнхене 9–11 кастрычніка. Праграма, як звычайна, насычаная і разнастайная. Прычым разлічана не толькі на беларусаў, але і на нямецкую аўдыторыю. Да прыкладу, дыскусія, якой распачынаецца фестываль, праходзіць на беларускай і нямецкай мовах: пра “Доўгія рукі дыктатуры” будуць казаць нобелеўскі лаўрэат Алесь Бяляцкі, палітвязынка Кацярына Андрэева, а таксама Бэрбель Хайдэ Уль і Сабіна Ляйтхойзэр-Шнарэнбергель. Але ж не толькі лекцыямі адметны фэст: будуць канцэрты Светы Бень і Кацярыны Рыдлеўскай, празентацыі кніг і шмат чаго яшчэ… Чым адметная праграма сёлетняга фестывалю і якімі крытэрыямі кіраваліся, складаючы яе? Ці атрымліваецца прыцягваць увагу жыхароў Мюнхена і агулам Германіі да беларускай культуры? Якія складанасці паўставалі перад арганізатарамі гэтым разам? На гэтыя ды іншыя пытанні ў эфіры Еўрарадыё адказваюць суарганізатаркі фестывалю Minsk x Minga Іна Валіцкая і Хрысціна Дарапей

Вынік апошняй сустрэчы Джона Коўла з Лукашэнкам адны лічаць поспехам амерыканскай дыпламатыі, а іншыя называюць днём няспраўджаных надзей. Сапраўды, чакалі вызвалення некалькіх сотняў, а на волю выйшлі 25 чалавек. Вінавацяць у зрыве перамоў Лукашэнку і яго завышаныя патрабаванні, дэмсілы, журналістаў, Еўропу — за яе прынцыповую пазіцыю. Коўл анансаваў новы візіт і працяг перамоў і вызваленняў праз месяц. А пакуль рэпрэсіі працягваюцца, нападкі лукашэнкаўскай прапаганды на суседнія краіны не сканчаюцца, падтрымка вайны ва Украіне не спыняецца, а колькасць дыверсій у краінах ЕС з кожным днём павялічваецца. Што не спрыяе таму, каб у Еўропе “надзявалі ружовыя акуляры”, гледзячы ў бок Мінска. Хто “падвысіў стаўкі” да непрымальнага ўзроўню і якія перадумовы для гэтага падвышэння былі? Ці пойдзе Вашынгтон на выкананне новых патрабаванняў Лукашэнкі і пры чым тут “фактар вайны”? Ці гатова Еўропа да супрацьдзеяння дыверсіям, колькасць якіх павялічваецца? Пра гэта і шмат што іншае мы і разважаем у штотыднёвым жывым эфіры Еўрарадыё з палітычным аглядальнікам, гісторыкам Аляксандрам Фрыдманам

Пасля Мінска Джон Коўл выправіўся ў Латвію. І размаўляў там пра беларускія калійныя ўгнаенні. Ці не ў гэтым візіце трэба шукаць адказ на пытанне: чаму замест 250 палітвязняў Лукашэнка выпусціў 16-га верасня ўсяго 25? Праўладная прапаганда тым часам разгарнула маштабную кампанію, звязаную з 17-м верасня. А Лукашэнка, чарговы раз "наеўшыся ўлады", едзе ў Магілёўскую вобласць займацца ўлюбёнай справай — на чым свет стаіць распякаць чыноўнікаў. Пра гэта, а таксама пра міфічны беларускі сярэдні заробак, які быццам бы ёсць — але якога амаль ніхто не бачыць (можа, ва ўсёй краіны праблемы са зрокам?) — размаўляем з блогерам Аляксандрам Кныровічам.

КДБ супраць месячных — Еўразум за 17 верасня | Новости Беларуси за 17 сентября by Euroradio

Вызваленне насуперак чаканым некалькім сотням усяго 25 палітвязняў выклікала спрэчкі пра тое, што і хто магло стаць прычынай “правалу” перамоў Джона Коўла з Лукашэнкам. Не, вядома, казаць пра менавіта “правал” не даводзіцца, бо людзі на волі, але насцярожанасць прысутнічае: ці не азначае такі вынік, што перамоўны трэк паўшоў на спад?.. І ці не дэмсілы ў тым вінаватыя, бо не заклікаюць Еўропу памяняць сваю пазіцыю і палітыку адносна рэжыму Лукашэнкі і далучыцца да амерыканскіх высілкаў па вызваленні людзей з турмаў. Як вынік перамоў ацэньваюць у Офісе Ціханоўскай і ці чакалі вызвалення такой колькасці палітвязняў? Ці варта спадзявацца, што гэта сапраўды паўза ў дыялогу паміж ЗША і Лукашэнкам, а не заканчэнне перамоўнага працэсу? Якія чаканні ад Форуму Астрожскіх і чаму ў Кіеў не едзе Ціханоўская? Пра гэта і шмат што іншае мы і разважаем у жывым эфіры Еўрарадыё з першым дарадцам Святланы Ціханоўскай Франакам Вячоркам

Пачаўшы са слоў “а зараз да галоўнай тэмы”, Лукашэнка нечакана не проста вярнуўся да сваёй старой песні пра адсутнасць у Беларусі палітвязняў з прычыны адсутнасці ў Крымінальным кодэксе адпаведных артыкулаў “за палітыку”, але пачаў гэта даводзіць Джону Коўлу на падвышаных тонах. Ледзь не да істэрыкі. З якой прычыны, не зусім зразумела, але прысутнасць побач з Коўлам колішняга супрацоўніка амбасады ЗША ў Мінску Крыстафера Паніка наводзіць на пэўныя думкі. Як і прысутнасць побач з Лукашэнкам прэм’ера Турчына. Чаму спакойная размова на “галоўную тэму” перарасла ў істэрычныя заявы пра адсутнасць палітвязняў? Ці варта спадзявацца, што гэта сапраўды паўза, а не заканчэнне перамоўнага працэсу? Якое значэнне мае прысутнасць у складзе перамоўных груп Крыстафера Паніка і Турчына? На гэтыя ды іншыя пытанні ў эфіры Еўрарадыё адказвае лідар спіса “Каманда Латушкі і рух “За свабоду”, кіраўнік Народнага антыкрызіснага ўпраўлення і намеснік кіраўніцы Аб’яднанага пераходнага кабінета Павел Латушка

Перамовы спецпасланніка прэзідэнта ЗША Джона Коўла з Лукашэнкам скончыліся “прамежкавым” вынікам — вызваленнем (і дэпартацыяй) 25 палітвязняў і зняццем санкцый з лідскай “Лакафарбы” і канцэрна “Беллеспаперпрам”. Па словах Коўла, перамовы працягнуцца, і калі “будуць новыя вызваленне, будзе і зняцце іншых санкцый”. Але калі чакаць гэтага працягу, не паведамляецца. Чаму перамовы забуксавалі і не былі дасягнуты нейкія канчатковыя дамоўленасці? Ці здолеюць амерыканцы ў выніку даць Лукашэнку тое, чаго ён ад іх жадае? Што для рэжыму азначае прыход у “беларускі перамоўны трэк” дыпламата Крыстафера Паніка? На гэтыя ды іншыя пытанні ў эфіры Еўрарадыё адказвае амерыканіст, палітычны аглядальнік Антон Пянькоўскі

25 палітвязняў на волі — Еўразум за 16верасня | Новости Беларуси за 16 сентября by Euroradio

Падчас сённяшняга вызвалення палітвязняў на волю мусілі выйсці мінімум 200 чалавек. Такую інфармацыю маюць у праваабарончым цэнтры "Вясна". 20-25 з іх улады меркавалі вывезці з Беларусі, а астатніх — вызваліць і дазволіць застацца ў краіне. Пра гэта ў эфіры Еўрарадыё расказаў праваабаронца і экс-палітвязень Уладзь Лабковіч. "Але мы бачым на волі толькі першую групу. Тыя людзі, якія павінныя быць вызваленыя ўнутры Беларусі, на волю не выйшлі. Маё меркаванне: перамовы [паміж Коўлам і Лукашэнкам] былі вельмі цяжкія і скончыліся нічым. Бачна, што ўлады рыхтаваліся да значна большага вызвалення, але была дадзеная адмашка вызваліць толькі людзей, якіх выдварылі з Беларусі". Як паведамлялася раней, спецпасланнік прэзідэнта ЗША па Беларусі назваў сённяшнюю дамову прамежкавай і анансаваў працяг перамоваў і далейшае вызваленне палітвязняў.

У Літве ўпершыню збілі дрон, нашпігаваны выбухоўкай. Польшча накіравала да мяжы з Украінай вайсковыя сапёрныя падраздзяленні. У якасці тлумачэння — словы пра пагрозу з боку Расіі для ўсёй Еўропы. Эксперты папярэджваюць пра магчымыя атакі расійскіх войскаў цяпер не толькі на краіны Балтыі і Польшчу, але і на Малдову. Тэракты ў краінах ЕС, за якімі стаяць расійскія спецслужбы. Усё гэта становіцца будзённым у нашым рэгіёне. А ў гэты час у Мінску прадстаўнік Трампа па Беларусі Джон Коўл вядзе перамовы з Лукашэнкам пра вызваленне палітвязняў. За прэферэнцыі і выгоды — але ж людзі выходзяць. Што праўда, рэпрэсіі не спыняюцца. А! Іх жа і няма, як эмацыйна даводзіць спецпасланніку Трампа (і яшчэ аднаму вельмі цікаваму чалавеку з амерыканскай дэлегацыі) Лукашэнка. Той самы, які ніколі не хлусіць і слова сваё трымае. Нібыта… Чым адметная як апошняя фаза перамоў паміж Мінскам і Вашынгтонам, так і падзеі, на фоне якіх яны адбываліся? Ці варта чакаць працягу “перамоўнага трэка” і ў якім выглядзе? Пра што кажа прысутнасць у складзе дэлегацыі Крыстафера Паніка? Пра гэта і шмат што іншае мы і разважаем у штотыднёвым жывым эфіры Еўрарадыё з дацэнткай, кандыдаткай гістарычных навук, эксперткай па міжнароднай палітыцы Розай Турарбекавай

Сустрэча Джона Коўла з Лукашэнкам доўжылася 3.5 гадзіны. Паводле інфармацыі, якая трапіла ў публічную прастору, гаварылі і пра грошы, і пра палітвязняў, і пра рэпрэсіі, але насамрэч падрабязнасцей было не тое каб шмат. Не было сказана ні пра тое, якія саступкі рэжыму робяць ЗША гэтым разам, апроч “размарожаных” грошай у “Сіцібанку”, ні пра колькасць вызваленых палітвязняў. Тым не менш, шмат што можна было зразумець як па тым, якія сустрэчы Коўл правёў па дарозе ў Мінск, так і па тым, хто быў у складзе перамоўных груп з абодвух бакоў. Што перашкаджае Мінску і Вашынгтону дамовіцца па прынцыпе “ўсе на ўсё”? Чым адметны візіт Анджэя Пачобута ў Беларусь — якія магчымасці стварае і якія пагрозы нараджае? Ці сапраўды Трамп ставіць, сярод іншага, за мэту адцягненне Лукашэнкі ад Пуціна? Пра гэта і шмат што іншае мы і разважаем у жывым эфіры Еўрарадыё з сябрам “Вольнай Беларусі”, кіраўніком варшаўскага Цэнтра палітычнага аналізу і прагнозу Паўлам Усавым

Коўл прыехаў у Мінск: першыя вынікі — Еўразум за 15 верасня | Новости Беларуси за 15 сентября by Euroradio

Адносіны паміж Кіевам і рэжымам Лукашэнкі ізноў сталі даволі моцна напружанымі. Нагода для такой напружанасці не новая — расійскія БПЛА. Кіраўнік Дзяржаўнай памежнай службы Украіны Андрэй Дземчанка кажа, што апошнія дронавыя ўдары Расіі па захадзе Украіны кіраваліся праз рэтранслятары на тэрыторыі Беларусі. Абвінавачванні ў бок Мінска прагучалі напярэдадні прыезду ў Беларусь спецпасланніка Трампа Джона Коўла. На шляху ў Мінск амерыканскі перамоўшчык сустрэўся з міністрам замежных спраў Літвы, які, сярод іншага, таксама казаў пра падтрымку рэжымам Лукашэнкі расійскай вайны ва Украіне. У гэты ж час Беларусь спакойна наведаў былы палітвязень Анджэй Пачобут, а ва Украіне неўзабаве пройдзе чарговы беларуска-ўкраінскі Форум Астрожскіх. Ці здолее Коўл дамовіцца з Лукашэнкам не толькі аб вызваленні новай групы палітвязняў, але і аб зніжэнні ўзроўню рэпрэсій? Чым адметны візіт Анджэя Пачобута ў Беларусь — якія магчымасці стварае і якія пагрозы нараджае? Якія чаканні ад сёлетняга Форуму Астрожскіх і ці будзе на ім прысутнічаць Ціханоўская? На гэтыя ды іншыя пытанні ў эфіры Еўрарадыё адказвае кіраўнік цэнтра “Еўрапейскі дыялог”, дарадца Святланы Ціханоўскай па парламенцкім супрацоўніцтве і канстытуцыйнай рэформе Анатоль Лябедзька

Коўл усё ж прыехаў у Мінск. І хоць пакуль невядома, што Лукашэнка захоча ад ЗША наўзамен палітвязняў, ужо відавочна, што разлічваць на так званую “вялікую здзелку” не даводзіцца. Увогуле застаецца пад пытаннем, ці ўбачыць Мінск Коўла яшчэ раз пасля цяперашняга візіту?.. Паралельна ідуць нейкія працэсы на польскім кірунку. З аднаго боку, Анджэй Пачобут бяспечна наведаў Беларусь, а з іншага — ідуць гульні вакол рэгістрацыі Саюза палякаў Беларусі. Ці варта чакаць вызвалення сапраўды вялікай колькасці палітвязняў і што Лукашэнка захоча наўзамен? Што за гульня ідзе паміж Варшавай і Беларуссю вакол Саюза палякаў Беларусі і Анджэя Пачобута? Якія наступствы можа мець паход Сяргея Ціханоўскага “за справядлівасцю” і супраць “клоўнаў”? На гэтыя ды іншыя пытанні ў эфіры Еўрарадыё адказвае палітычны аналітык інфармацыйнага агенцтва “Позірк” Аляксандр Класкоўскі

Сваё матэрыяльнае становішча ацэньваюць як добрае 82.2% беларусаў. Такія звесткі даюць сацапытанні, праведзеныя ў Беларусі праўладнымі інстытуцыямі. І падставы, здавалася б, для такіх ацэнак у людзей ёсць: заробкі і ЗВР растуць, працы хапае, інфляцыя пад кантролем, дарогі добрыя, а неба — мірнае. Амаль мірнае, але гэта нюансы. Затое з амерыканцамі сяброўства наладжваецца, санкцыі здымаюцца, а калій пачынае адгружацца ў ЗША. Чым адметная сітуацыя з нібыта адгрузкай беларускага калію пакупнікам з ЗША? Ці мусяць у Беларусі насцярожыцца з нагоды ўкраінскіх удараў па Ямале? Што цікавага ў сацапытанні, праведзеным у Беларусі, і ў колькасці задаволеных сваім матэрыяльным становішчам? На гэтыя ды іншыя пытанні ў эфіры Еўрарадыё адказвае аўтар і вядоўца праграмы “Оптымум” на канале “Беларусы і рынак”, эканамічны аглядальнік Андрэй Махоўскі

Спецпасланнік прэзідэнта ЗША Джон Коўл дабраўся да Мінска. І хоць пра сапраўды “вялікую здзелку” паміж Вашынгтонам і Мінскам ужо ніхто не кажа, але і працэс перамоў не спыняецца. А гэта ўжо нямала. Традыцыйна ў Беларусь Коўл ехаў праз Вільню, дзе напярэдадні сустрэчы з Лукашэнкам правёў сустрэчу з міністрам замежных спраў Літвы Кястутысам Будрысам. З якім гаварылі не толькі пра вызваленне палітвязняў, але і пра падтрымку Мінскам расійскай агрэсіі супраць Украіны, пра нелегальную міграцыю і знойдзеныя тунэлі пад літоўска-беларускай мяжой. Што, апроч палітвязняў, стане прадметам гандлю падчас сустрэчы Коўла і Лукашэнкі? Ці гатова Еўропа супрацьстаяць падвышэнню эскалацыі, якую правакуе Расія? Ці стане паездка Пачобута ў Беларусь пачаткам наладжвання дыялогу паміж Мінскам і Варшавай? На гэтыя ды іншыя пытанні ў эфіры Еўрарадыё адказвае дырэктар даследчых праграм па Расіі, Усходняй Еўропе і Еўразіі Фінскага інстытута міжнародных адносін Аркадзь Мошас

Небыліцы пра Еўропу і заробкі мігрантаў — Еўразум за 14 верасня | Новости Беларуси за 14 сентября by Euroradio

Беларускі калій ужо прадаецца ў ЗША. Як мінімум — першая партыя загружаецца ў порце Пецярбурга. Прынамсі, такую заяву днямі зрабіў Лукашэнка. Адзначым, што сказана гэта было напярэдадні прыезда ў Беларусь спецпрадстаўніка Трампа Джона Коўла. На перамовах якога з Лукашэнкам будзе, перакананы эксперты, узнімацца і “калійная тэма”. Пачынаючы ад магчымасці набыцця амерыканскімі інвестарамі аднаго з калійных прадпрыемстваў і да пытання транзіту калію праз краіны Балтыі. І тут, бываюць жа супадзенні, Лукашэнка пачынае выказвацца наконт пагрозы “абвальнай прыватызацыі”, а Латвія падвышае падаткі на транзіт праз сваю тэрыторыю зерня з Расіі і Беларусі. Не калію, але тым не менш… Ці стане першая партыя беларускага калію першай ластаўкай, якая праб’е санкцыйную заслону на Захад? Чаму Лукашэнка менавіта цяпер звярнуўся да тэмы прыватызацыі і хто ў Беларусі галоўны бенефіцыяр гэтых працэсаў? Ці стане паездка Пачобута ў Беларусь пачаткам калі не палітычнай, то гандлёвай адлігі паміж Польшчай і Беларуссю? Гэтыя ды іншыя эканамічныя тэмы абмяркоўваем у жывым эфіры Еўрарадыё з эксперткай у сферы дзяржаўнага кіравання і міжнароднага развіцця, прадстаўніцай па эканоміцы і фінансах Аб’яднанага пераходнага кабінета і дэлегаткай Каардынацыйнай рады ад спіса “Еўрапейскі выбар” Алісай Рыжычэнка.

Па дадзеных галоўнага статыстычнага ўпраўлення, на канец сакавіка ў Польшчы працавалі 1 152 700 замежных грамадзян — на 8% больш, чым год таму. З іх беларусаў — 121 тысяча. У гэты час у Беларусі не хапае работнікаў на большасці прадпрыемстваў. Рашэнне прапануе пенсіянер Мінабароны: стварае фірму-пасярэдніка “па аказанні турыстычных паслуг” і абяцае на заробак у 1500 беларускіх рублёў прывезці рабочых з Пакістана, Непала, Туніса, Марока ды іншых краін. Вяртаць тыя сотні тысяч беларусаў, якія па невядомых прычынах выехалі з краіны, рэжым не імкнецца. Наадварот, у чаканні Коўла і будучага новага вызвалення палітвязняў людзі разважаюць: колькі з вызваленых рэжым выкіне з краіны?.. Што адбываецца на рынку працы і ці сапраўды выключна праз прывабныя заробкі ў Беларусь імкнуцца працоўныя мігранты? Чаму Лукашэнка так баіцца прыватызацыі і чым адметныя яго дамоўленасці з расійскім алігархам Патаніным? Ці верне Трамп Лукашэнку заблакіраваныя ў ЗША 43 мільёны “калійных” долараў? Пра гэта і шмат што іншае мы і разважаем у жывым эфіры Еўрарадыё з рэдактаркай выдання “План Б”, эканамічнай і палітычнай аглядальніцай Вольгай Лойка

Адразу пасля вызвалення ў выніку “шпіёнскага абмену” Анджэй Пачобут распавёў, што атрымаў гарантыі з боку прадстаўнікоў рэжыму Лукашэнкі наконт магчымасці бяспечна наведваць Беларусь. Выехаў у Польшчу Анджэй, маючы на руках дзеючы беларускі пашпарт. Які, у адрозненне ад, напрыклад, Нобелеўскага лаўрэата Алеся Бяляцкага ці журналіста Ігара Карнея, Пачобуту не анулявалі праз пэўны час. Тым не менш, магчмымасць вярнуцца, кажа журналіст Gazeta Wyborcza Барташ Веліньскі, стала своеасаблівай праверкай беларускага боку — ці можа ён трымаць абяцанні. І, адпаведна, ці можна з Мінскам пра нешта далей Варшаве дамаўляцца. Што стаіць за самой сітуацыяй з бяспечнай паездкай Пачобута ў Беларусь — якую гульню вядуць Мінск і Варшава? Чаму Лукашэнка не спыняе антыпольскую і агулам антызаходнюю рыторыку, шукаючы паразумення з Захадам? Ці залежыць пазіцыя Лукашэнкі адносна наладжвання адносін з Польшчай ад стаўлення да Варшавы ў Маскве? На гэтыя ды іншыя пытанні ў эфіры Еўрарадыё адказвае палітолаг, старшы навуковы супрацоўнік Цэнтра ўсходніх даследаванняў у Варшаве Каміль Клысіньскі

Лукашэнка загаварыў пра мабілізацыю — з чаго б? — Еўразум за 11 верасня | Новости Беларуси за 11 сентября by Euroradio

У той час як Анджэй Пачобут насуперак усім перасцярогам паехаў у Беларусь, менавіта тэма бяспекі — як рэгіянальнай, так і асабістай — актыўна абмяркоўвалася на XXXV Эканамічным форуме ў Карпачы. Агулам форум быў маштабны: больш за 6000 гасцей з 53 краін свету, 500 панэльных дыскусій. Безумоўна, закраналася тэма Беларусі, гаварылі пра беларусаў і ад імя беларусаў. Бо беларуская дэлегацыя была прадстаўлена і палітыкамі, і экспертамі. На якія тэмы і праблемы найперш была скіравана ўвага ўдзельнікаў сёлетняга Форуму? Ці была Беларусь “у павестцы” і ў якім ключы ўзгадвалася? Чым каштоўны ўдзел у такіх сустрэчах і якую карысць беларускаму грамадству яны могуць прынесці? На гэтыя ды іншыя пытанні ў эфіры Еўрарадыё адказвае выканаўчы дырэктар аналітычнага цэнтра International Strategic Action Network for Security Улад Кобец

На выбарах у Германіі партыя “Альтэрнатыва для Германіі” атрымала перамогу. Так, гэта выбары не нацыянальныя, і размова пра адну федэральную зямлю, але гэта можа стаць пачаткам для прыходу правых і прарасійскіх сіл да ўлады. Таго, аб чым, як сцвярджаюць эксперты, мараць і Пуцін, і Лукашэнка. А тут яшчэ і паездка Анджэя Пачобута ў Беларусь, якая стала нагодай для размоў пра існаванне непублічнага перамоўнага трэку паміж Варшавай і Мінскам. І гэта без уліку анансаванага прыезду Коўла і чакання вялікага вызвалення ды магчымай “вялікай здзелкі” ў выніку. Ці варта ўспрымаць паездку Пачобута ў Беларусь як сведчанне таго, што рэжым Лукашэнкі гатовы да пачатку “адлігі”? Як перамога АдГ можа ў далейшым паўплываць на палітыку Германіі і Еўрасаюза агулам? Чым адметны анансаваны візіт Коўла ў Мінск? Пра гэта і шмат што іншае мы і разважаем у штотыднёвым жывым эфіры Еўрарадыё з палітычным аглядальнікам, гісторыкам Аляксандрам Фрыдманам

Галоўны дарадца прэзідэнта Літвы Дэйвідас Матулёніс на пачатку верасня заявіў, што літоўскія службы не маюць інфармацыі пра з’яўленне новых расійскіх ваенных часцей, якія маглі б непасрэдна пагражаць Літве, Латвіі або Польшчы. Адпаведна, Літва цяпер не бачыць росту ваеннай пагрозы з боку Беларусі. Гэта былі словы ў адказ на папярэджанні з боку Ціханоўскай, якая сказала, што “ў Беларусі будуецца новая ваенная інфраструктура, у тым ліку каля меж з ЕС”. А гэта, маўляў, можа сведчыць пра падрыхтоўку да магчымай эскалацыі. Фактычна на наступны дзень пра ваенную пагрозу з боку Беларусі заявіў і прадстаўнік спецслужбаў Украіны. Чаму ў Літве і Украіне не бачаць росту ваеннай пагрозы з боку Беларусі і ці адбываецца гэты рост насамрэч? Адкуль у Ціханоўскай інфармацыя, якую яна агучыла на сустрэчы ў Вільні? Што стаіць за мілітарызацыяй беларускай эканомікі і грамадства? Пра гэта і шмат што іншае мы і разважаем у жывым эфіры Еўрарадыё з прадстаўніком ініцыятывы BELPOL Уладзімірам Жыгарам

На апошняй нарадзе ў Лукашэнкі абмяркоўвалі не толькі ліцэнзаванне прыватнай адукацыі і медыцыны, але ўвогуле ўсё, што заўгодна. Ад дамафонаў да рэкламы казіно. А Лукашэнка, які любіць разважаць пра штучны інтэлект, вырашыў заступіцца за аналагавых чыноўнікаў свайго ўзросту, якія прызвычаіліся перакладаць паперкі... Абмяркоўваем гэта з блогерам Аляксандрам Кныровічам. Таксама зробім высновы з вынікаў "гульні Мацкевіча", пагаворым пра Акадэмію інтэлектуальных тэхналогій (з 2027 года ў Беларусі будзе і такая!) і "монстраў"-суседзяў Беларусі.

Тлумачым арыфметыку Джона Коўла — Еўразум за 10 верасня | Новости Беларуси за 10 сентября by Euroradio

Нягледзячы на саўдзел у расійскай агрэсіі супраць Украіны і татальнае знішчэнне грамадзянскіх свабод унутры краіны, рэжым Лукашэнкі здолеў дамагчыся частковага дыпламатычнага пацяплення ў адносінах з ЗША і зняцця часткі санкцый. У адказ рэжымам былі памілаваны звыш 500 палітвязняў. Аднак шмат хто з вызваленых быў дэпартаваны з краіны, іх пашпарты рэжым ануляваў, рэпрэсіі ў краіне працягваюцца і пераходзяць на транснацыянальны ўзровень. Гэта наводзіць на думку, што для дэмакратычных сіл і краін Захаду гэты гандаль выяўляецца стратэгічным пройгрышам. Чаму ва ўмовах адсутнасці гарантаваных эканамічных выгод і захавання жорсткага еўрапейскага эмбарга рэжым працягвае чапляцца за амерыканскі дыпламатычны трэк? Што на сёння з сябе ўяўляе “прэвентыўны аўтарытарызм” рэжыму Лукашэнкі? У чым галоўныя рызыкі для рэжыму і чаму беларусы імі не могуць скарыстацца? Пра гэта і шмат што іншае мы і разважаем у жывым эфіры Еўрарадыё са стыпендыятам даследчай праграмы імя Віталя Сіліцкага (2026) пры Цэнтры новых ідэй, студэнтам Карлава Універсітэта Глебам Фіцнерам

9 верасня ў эфіры Еўрарадыё — сябра Рады праваабарончага цэнтра “Вясна”, віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч. Дзяржава павінна быць максімальна прыязнай да сваіх грамадзян. Гэта тычыцца і пытання законнасці, калі законы роўныя для ўсіх, і свабоды бізнесу, і правоў чалавека. І свабоды выбару мовы. Безумоўна, мы мусім папулярызаваць і прасоўваць беларускую мову, а ва ўмовах двухмоўя чыноўнік павінен валодаць дзвюма мовамі. Каб у выпадку, калі Лукашэнка на судзе захоча выступаць па-руску, суддзя вёў яго судовае пасяджэнне па-руску, перакананы Валянцін Стэфановіч. Пра тое, чаму тэма правоў чалавека такая важная для пабудовы нацыянальнай дзяржавы, ці магчыма дамагчыся перамогі выключна мірным супрацівам і ці мае народ права на супраціў сілавы, мы і разважаем у праграме “Ідэя Х” з Валянцінам Стэфановічам.

Коўл едзе ў Беларусь — чаго чакаць? — Еўразум за 9 верасня | Новости Беларуси за 9 сентября by Euroradio

Сітуацыя з правамі чалавека ў Беларусі па-ранейшаму ацэньваецца праваабаронцамі як крытычная. Рэпрэсіі даўно сталі сістэмнымі і не слабеюць: на канец жніўня 2026 года ў Беларусі ў месцах пазбаўлення волі знаходзіліся 889 палітычных вязняў, з якіх мінімум 185 — у асабліва ўразлівым становішчы праз свой стан здароўя, узрост або абставіны зняволення. А ёсць яшчэ транснацыянальныя рэпрэсіі, адвольнае прымяненне заканадаўства аб экстрэмізме і тэрарызме, пераслед арганізацый грамадзянскай супольнасці, а таксама наяўнасць рызык безграмадзянства і гэтак далей. У гэты ж час часцяком беларусы, якія былі вымушаны пакінуць краіну праз пераслед, чуюць, што “сітуацыя ў Беларусі палепшылася” і падстаў для надання ім абароны няма… Чаму беларусы апошнім часам усё часцей атрымліваюць адмову ў міжнароднай абароне на падставе “паляпшэння сітуацыі ў Беларусі”? Як пераламаць такія тэндэнцыі і давесці еўрапейскім палітыкам і чыноўнікам пра рэальны стан унутры нашай краіны? Ці могуць недзяржаўныя дабрачынныя ініцыятывы справіцца з тымі выклікамі, што паўстаюць перад беларусамі ў эміграцыі? На гэтыя ды іншыя пытанні ў эфіры Еўрарадыё адказвае паліталагіня, кіраўніца па пытаннях адвакацыі дабрачыннай ініцыятывы “Партызанка”, былая спецдакладчыца ААН па правах чалавека ў Беларусі Анаіс Марэн

“Беларусбанк” прапануе крэдыт на жыллё пад 1% гадавых, а пасля наведвання Качанавай сельскіх крам там цяпер такі выбар прадуктаў, што зайздрасць бярэ. Праўда, чамусьці забудоўшчыкі нечакана падвысілі кошт квадратнага метра, а з вёсак людзі працягваюць з’язджаць, нягледзячы на багаты асартымент у сельскіх крамах. Ізноў жа, з доларам невядома што адбываецца, хоць, кажуць, беларусы фактычна адмовіліся ад яго і ад еўра — няма даверу да гэтых валют. Добра хоць заробкі ў беларускіх рублях стабільна працягваюць расці. Як і інфляцыя… Але гэта іншае. Што адбываецца на рынку жылля і што на гэты рынак найперш уплывае? Якім будзе курс долара бліжэйшым часам? Ці ратуюць пастаўкі паліва ў Расію паказчыкі па знешнім гандлі? На гэтыя ды іншыя пытанні ў эфіры Еўрарадыё адказвае старшая навуковая супрацоўніца BEROC, эканамістка Анастасія Лузгіна

Анджэй Пачобут выканаў сваё абяцанне і 8 верасня прыехаў у Беларусь, у свой родны горад Гродна. Мужнасць гэтага ўчынку, беручы пад увагу небяспеку з боку рэжыму, для якога існаванне ў парадыгме “часам не да законаў” працягваецца з 2020 года, прызнаюць усе. Тым не менш, варта ўлічваць, што паехаў Анджэй на радзіму напярэдадні візіту ў Мінск Джона Коўла. А гэта ўсё ж нейкая гарантыя. Хоць паўтараць учынак Анджэя іншым вымушаным мігрантам Алесь Бяляцкі настойліва не раіць. А вось Валер Кавалеўскі лічыць, што “смелы і патрыятычны крок Анджэя можа дапамагчы пракласці шлях да бяспечнага вяртання ўсім, хто гэтага жадае”. Учынак Пачобута “пракладае шлях да бяспечнага вяртання ўсім, хто гэтага жадае”, альбо стварае дадатковыя пагрозы для беларусаў у выгнанні? Ці варта разлічваць на паспяховасць місіі Уіткафа і Кушнера? Якой “саюзнай інтэграцыі” хоча Лукашэнка і на чым настойвае Расія? Пра гэта і шмат што іншае мы і разважаем у штотыднёвым жывым эфіры Еўрарадыё з дацэнткай, кандыдаткай гістарычных навук, эксперткай па міжнароднай палітыцы Розай Турарбекавай

Навошта да Лукашэнкі ездзяць расійскія алігархі? — Еўразум за 8 верасня | Новости Беларуси за 8 сентября by Euroradio

Адвакатаваць беларускае пытанне з кожным днём становіцца ўсё больш складана. І размова не толькі пра Офіс Ціханоўскай, але і пра намаганні іншых структур і асобных актывістаў. Краіны кіруюцца найперш сваімі нацыянальнымі інтарэсамі і настроямі ўласных выбаршчыкаў, якія ўсё больш негатыўна ставяцца да эмігрантаў. Любых. А тут яшчэ і пастаянныя канфлікты ў беларускай супольнасці, якія не застаюцца па-за ўвагай ні партнёраў, ні палітыкаў іншых краін. З якімі галоўнымі мэсэджамі выходзіць Офіс да заходніх партнёраў і ці сустракаюць яны разуменне ў суразмоўцаў? Як на іміджы Святланы Ціханоўскай і агулам на беларускай супольнасці адбіваецца канфлікт Сяргея Ціханоўскага са СМІ? Ці чакаць новага візіту Ціханоўскай ва Украіну і што яму можа перашкодзіць? На гэтыя ды іншыя пытанні ў эфіры Еўрарадыё адказвае дарадца Святланы Ціханоўскай па палітычных пытаннях Аляксандр Дабравольскі

Прэзідэнт Украіны паабяцаў, што неба над Расіяй для авіяпералётаў будзе “закрыта”. Як мінімум яно стане вельмі небяспечным для палётаў. Практычна для ўсіх авіяперавозчыкаў, якія расійскай паветранай прасторай карысталіся, гэта стане непрыемным, але вырашальным пытаннем. Хоць і фінансава стратным. Для ўсіх, апроч “Белавія”… Чым для “Белавія” стане закрыццё расійскага неба і чым пагражае банкруцтва нацыянальнага авіяперавозчыка? Як доўга і як шмат беларускія прадпрыемствы будуць зарабляць на вайне ва Украіне? Ці магчымая “калійная здзелка” з удзелам Украіны, а “зерневая” — Беларусі? На гэтыя ды іншыя пытанні ў эфіры Еўрарадыё адказвае эканаміст Яраслаў Раманчук

Гісторыя з так званым “крыжам Дагмар” і спрэчкі вакол яго месца ў беларускай гісторыі падзялілі прафесійных гісторыкаў і “папулярызатараў гісторыі”. У тым ліку па пытанні гістарычнай міфалогіі, яе значнасці, шляхах і падмурках для будавання міфаў. Але ж гісторыя з міфабудаўніцтвам вакол “крыжа Дагмар” — гэта, як высвятляецца, толькі вяршаліна айсберга. Бо ёсць яшчэ тэма міфаў у вайсковай спадчыне і тэма міфаў вакол палітычнага лідарства. Як ствараецца гістарычная міфалогія і ў чым яе важнасць альбо небяспека? Ці ёсць сярод беларускіх міфаў тыя, што тычацца нашай “вайсковай маралі”? Чаго больш у палітычным лідарстве палітыкаў сучаснасці — міфічнага ці рэальнага? Пра гэта і шмат што іншае мы і разважаем у жывым эфіры Еўрарадыё з кандыдатам гістарычных навук Яўгенам Красуліным

У Беларусі яны жывуць амаль на 10 гадоў менш за жанчын, а кароткі бацькоўскі адпачынак бярэ толькі каля 10 % мужчын. Але ва ўяўленні большасці мужчына павінен быць моцным, абараняць, цярпець і, калі трэба, працаваць за дваіх і за траіх. У новым “Гендар_гэпе” пагаворым пра білборды Міністэрства абароны “Будзь абаронцам. Мужчынам будзь”, парады прапагандыста Тура мужчынам больш працаваць замест догляду за дзіцём і палкоўніка-дэпутата Шкодзіна, які з пазіцыі “сапраўднага мужыка” здзекуецца з “яжмаці” і “яжнараджала”. І пра іншы бок той жа маскуліннасці: чаму Следчы камітэт можа выкарыстоўваць пагрозу сексуальнага гвалту над мужчынам як “жарт” і сродак запалохвання? На гэтыя ды іншыя пытанні ў эфіры Еўрарадыё адказвае доктарка навук у галіне камунікацыі, даследчыца медыя, улады і гендару, заснавальніца аналітычнай платформы “Кантрапункт” Ірына Сідорская

Што будзе, калі ў Беларусі застануцца адны пенсіянеры? — Еўразум за 7 верасня | Новости Беларуси за 7 сентября by Euroradio

За чатыры месяцы, якія прайшлі пасля інтрыгоўнай “гульні Мацкевіча”, пра яе практычна ўсё паспелі забыцца. Час ад часу толькі ў “глыбінях інтэрнэту” ці экспертнай супольнасці ўзнікала пытанне наконт вынікаў той гульні, якая сабрала 50 удзельнікаў на пяць дзён для абмеркавання стану беларускага грамадства і дэмсіл. Тады, збіраючы ўдзельнікаў, Мацкевіч папярэджваў асноўных актараў палітычнага, экспертнага і медыйнага поля: “Гуляй — інакш прайграеш”. І вось нарэшце Мацкевіч выклаў свой разбор вынікаў гульні. На 35 старонках. Чым была адметная гульня для самога Мацкевіча? Ці сапраўды асноўная песімістычная выснова ў тым, што ў нас “няма палітычнага суб’екта, здольнага распрацаваць і рэалізаваць стратэгію трансфармацыі Беларусі”? Ці, магчыма, гэтага асноўныя гульцы і не хочуць? Ці сапраўды тыя, хто ў гульні ўдзелу не ўзяў, у выніку прайгралі? На гэтыя ды іншыя пытанні ў эфіры Еўрарадыё адказвае былы палітвязень, філосаф і метадолаг Уладзімір Мацкевіч

Колькасць людзей, якім больш за 50, упершыню перавысіла колькасць дзяцей ва ўзросце да пяці гадоў. Здавалася б, нічога новага — пра “дэмаграфічны крызіс” і “старэнне нацыі” ў краінах Еўропы кажуць даўно. У Беларусі ў тым ліку. То-бок пытанне выплаты пенсій набывае ўсё большую актуальнасць. А працяглая міграцыя вырашэнню гэтага пытання не спрыяе. Як і актыўная праца беларускіх прадпрыемстваў на расійскую ваенку не асабліва ратуе бюджэт. І тую яго частку, з якой фінансуюцца сацыяльныя і пенсійныя праграмы. Як агульнае старэнне нацыі і дэмаграфічны крызіс уплываюць на Беларусь і ці ўратуе сітуацыю пенсійная рэформа? Наколькі моцна беларускія прадпрыемствы завязаны на супрацу з Расіяй? Як доўга будуць расці заробкі і курс долара? На гэтыя ды іншыя пытанні ў эфіры Еўрарадыё адказвае акадэмічны дырэктар даследчага цэнтра BEROC, доктар эканамічных навук Леў Львоўскі

Прызідэнт ЗША Дональд Трамп заявіў, што ў яго ёсць новая ідэя (як звычайна, “выдатная” і “прыгожая”) адносна магчымага мірнага пагаднення паміж Расіяй і Украінай. І адправіў сваіх спецпасланнікаў Стыва Уіткафа і Джарэда Кушнера гэтую ідэю данесці да Пуціна і Зяленскага. Уіткаф, як звычайна, сіяў у прысутнасці Пуціна і казаў, што на пенсіі будзе сустрэчы з ім прыгадваць як лепшае, што ў яго жыцці здарылася. Але што датычна вынікаў трохгадзінных перамоў з уладаром Крамля, — тут усё складана. Праўда, не менш складана ўсё ў сэнсе станоўчых вынікаў перамоў трампаўскіх пасланнікаў з Зяленскім. Ці рэальна сёння дзякуючы пасярэдніцтву Трампа выйсці на хоць нейкія мірныя пагадненні паміж Расіяй і Украінай? Як на пазіцыю Пуціна ўплывае пазіцыя краін — удзельнікаў саміту ШАС адносна вайны ва Украіне, і асабліва кіраўнікоў Індыі і Кітая? Як змянілася за апошні час стаўленне ўкраінскага грамадства і кіраўніцтва краіны да супрацы з беларускімі дэмсіламі, дачыненняў з рэжымам Лукашэнкі і агулам успрыманне беларусаў? На гэтыя ды іншыя пытанні ў эфіры Еўрарадыё адказвае палітолаг, дырэктар украінскага Інстытута сусветнай палітыкі, эксперт iSANS Яўген Магда

Калі ў Беларусі будзе нармальная іпатэка? — Еўразум за 4 верасня | Новости Беларуси за 4 сентября by Euroradio

Апошнім часам усё часцей з розных гарадоў у розных краінах ЕС прыходзяць навіны пра дыверсіі і тэракты. Краіны розныя, але аб’ядноўвае ўсе гэтыя ўдалыя і няўдалыя дыверсіі адно — яны накіраваны на аб’екты і прадпрыемствы, звязаныя з ваеннай прамысловасцю ці лагістыкай паставак ваеннай дапамогі Украіне. У шэрагу выпадкаў датычнасць да інцыдэнтаў Расіі даказана. Эксперты і ваенныя заклікаюць рыхтавацца да павелічэння колькасці тэрактаў. І гэта ў тым ліку тыя выклікі бяспецы, пра якія так шмат казалі падчас апошняга саміту ШАС. Ці гатова Еўропа да тых выклікаў, якія ёй рыхтуе Расія? Якое месца ў планах Масквы на ўзмацненне эскалацыі з ЕС адведзена рэжыму Лукашэнкі? Ці могуць краіны — члены ШАС паўплываць на сітуацыю з бяспекай у нашым рэгіёне? Ці не стане запланаваны на сярэдзіну верасня візіт Коўла ў Мінск кропкай у перамовах Вашынгтона з Мінскам? На гэтыя ды іншыя пытанні ў эфіры Еўрарадыё адказвае палітычны аналітык Віталь Цыганкоў

Пайшоў трэці месяц працы Каардынацыйнай рады, а пахваліцца дэлегатам гэтага нібыта протапарламента асабліва няма чым. Не, канешне, можна казаць пра фарміраванне розных камісій і кааліцый ды спрачацца пра бюджэт медыягрупы КР, можна нават пару рэзалюцый у падтрымку нечага ці некага прыняць, але для людзей па-за межамі КР, а тым больш — дэмсіл, гэта ні пра што. Кіраўніка сакратарыята нават ніяк не могуць прызначыць! Чаму Каардынацыйная рада да гэта часу не пачала дзейнічаць у працоўным фармаце, трэці месяц займаючыся вырашэннем арганізацыйных пытанняў? Калі чакаць рэформы КР і з чаго яна павінна пачацца? Як КР можа дапамагчы вырашэнню праблем беларускай дыяспары? На гэтыя ды іншыя пытанні ў эфіры Еўрарадыё адказваюць кіраўніца Міжнароднай камісіі Каардынацыйнай Рады Маргарыта Ворыхава і лідарка фракцыі “Наступ”Лізавета Пракопчык

Аляксандр Кныровіч. Калі кошты на нерухомасць у Мінску пойдуць уніз? І чаму яны звар'яцелі by Euroradio

“Белавія” паляціць у Варшаву — serio? — Еўразум за 3 верасня | Новости Беларуси за 3 сентября by Euroradio

Беларускі калій і амерыканскі Коўл — Еўразум за 2 верасня | Новости Беларуси за 2 сентября by Euroradio

Размовы пра непазбежнасць сутыкнення краін ЕС і НАТА з імперскімі амбіцыямі Расіі — у выглядзе альбо тэрарыстычных атак, альбо наўпроставага ваеннага ўварвання на тэрыторыю адной (ці некалькіх) краін — не сціхаюць апошнія колькі гадоў. Але ў апошнія месяцы яны набылі асабліва пагрозлівыя інтанацыі: чакаюць атак БПЛА альбо тэрарыстаў на аб’екты ваеннай і крытычнай інфраструктуры краін ЕС, нападу на адну з краін Балтыі, адкрыцця другога фронту з Украінай і гэтак далей. Варыянтаў шмат. А пакуль гэтага не здарылася, суседзям Беларусі даводзіцца супрацьстаяць нелегальнай міграцыі, кантрабандзе, агентам спецслужбаў і рэагаваць на затрыманне ў Беларусі сваіх грамадзян. Так, у канцы жніўня ў Беларусі быў затрыманы і асуджаны за “спрыянне экстрэмісцкай дзейнасці” 27-гадовы грамадзянін Літвы Дэйвідас Станулявічус (Deividas Stanulevičius). Ці толькі нелегальным мігрантам даюць дарогу на тэрыторыю Літвы праз падземныя тунэлі з Беларусі? Ці пойдзе Лукашэнка на саўдзел у расійскіх правакацыях у дачыненні да краін ЕС? Што можа прымусціь Літву змяніць сваю пазіцыю адносна санкцый на транзіт беларускага калію? На гэтыя ды іншыя пытанні ў жывым эфіры Еўрарадыё адказвае літоўскі палітычны філосаф, прафесар кафедры філасофіі Універсітэта Вітаўта Вялікага Гінтаўтас Мажэйкіс (Gintautas Mažeikis)

На юбілейным саміце ШАС, прысвечаным 25-годдзю гэтай арагнізацыі, шмат казалі пра пытанні і выклікі рэгіянальнай бяспекі. Але калі прэм’ер Індыі Модзі наўпрост заклікаў Пуціна спыніць вайну ва Украіне, то Лукашэнка казаў пра нейкія агульныя пагрозы, нейкія вялікія ваенныя канфлікты, развязаныя неназванымі гульцамі, і гэтак далей — у сваім звыклым стылі. А ў гэты час суседзі Беларусі разважаюць пра тое, як будуць супрацьстаяць расійскім правакацыям і агрэсіі з тэрыторыі Беларусі. Дзе чакаюць неўзабаве візіту спецпрадстаўніка прэзідэнта ЗША Джона Коўла. Ці здольная ШАС стаць гарантам рэгіянальнай бяспекі, у тым ліку і для нашага рэгіёна, і спыніць агрэсію Расіі супраць Украіны? Ці дапаможа Кітай Лукашэнку ўхіліцца ад саўдзелу ў расійскіх правакацыях у дачыненні да краін ЕС? Чаму Коўл так нервова рэагуе на допісы пра няспыннасць рэпрэсій у Беларусі? Пра гэта і шмат што іншае мы і разважаем у штотыднёвым жывым эфіры Еўрарадыё з дацэнткай, кандыдаткай гістарычных навук, эксперткай па міжнароднай палітыцы Розай Турарбекавай

Прэм’ер-міністр Польшчы Дональд Туск падчас сустрэчы ў “Кампусе Польшчы будучага” заявіў, што Расія рыхтуецца да эскалацыі ў рэгіёне. Па яго словах, “наступныя сем-восем месяцаў, безумоўна, будуць вырашальнымі — украінска-расійская вайна знаходзіцца на пераломным этапе”. Адначасова ваенныя і эксперты абмяркоўваюць пагрозу розных фарматаў тэрарыстычных атак на краіны Еўрасаюза з боку Расіі. У тым ліку — з выкарыстаннем тэрыторыі Беларусі. Ці сапраўды магчымасць тэрарыстычных атак альбо неканвенцыйных прагроз з тэрыторыі Беларусі павялічылася ў апошні час? Як краіны ЕС, і найперш Польшча ды Літва, рыхтуюцца да супрацьдзеяння пагрозам? Што атрымае ў выніку такога саўдзелу ў павышэнні ўзроўню экслацыі Расіі з Захадам рэжым Лукашэнкі? Пра гэта і шмат што іншае мы і разважаем з сябрам “Вольнай Беларусі”, кіраўніком варшаўскага Цэнтра палітычнага аналізу і прагнозу, доктарам палітычных навук Паўлам Усавым

Якая мяжа магчымасцяў у беларускіх НПЗ — Еўразум за 1 верасня | Новости Беларуси за 1 сентября by Euroradio

Пакуль адны кажуць пра неабходнасць размаўляць з рэжымам і як мінімум паспрабаваць знайсці кропкі ўзаемаразумення, гэты самы рэжым працягвае рэпрэсіі. І размова не толькі пра затрыманні, прысуды, дэпартацыю ды транснацыянальныя рэпрэсіі ў дачыненні да тых, хто пакінуў краіну, але і пра пазбаўленне на падставе “рашэння суда” маёмасці асуджаных. У тым ліку і святароў. Так, днямі на аўкцыён была выстаўлена машына, якая належала ксяндзу Акалатовічу. Ці з’яўляюцца рэпрэсіі супраць святароў і вернікаў працягам агульных рэпрэсій па краіне? Чым рэжыму не дагадзілі лютэране? Як звязаны рашэнні аб адмове на служэнне ў Беларусі ксяндзам і нібыта жаданне наладзіць добрыя стасункі Мінска з Варшавай? Што мяняецца ў стаўленні краін ЕС да Беларусі? Пра гэта і шмат што іншае мы і разважаем у жывым эфіры Еўрарадыё з тэалагіняй, эксперткай у галіне рэлігіі, палітыкі і абароны правоў Наталляй Васілевіч

Здавалася б, зусім нядаўна Лукашэнка, выступаючы на этнафестывалі “Покліч Палесся”, распавядаў пра Беларусь як мірную краіну, пра жаданне сябраваць з Украінай і ўкраінцамі. А праз колькі тыдняў, сустракаючыся ў Маскве з Пуціным, ізноў паўтарае мантры пра “адзін акоп”, абяцае забяспечыць расійскія ракеты і БПЛА неабходнай мікраэлектронікай і выказвае поўную падтрымку агрэсіўнай палітыцы Масквы. У тым ліку і адносна краін Еўрасаюза. Колькасць спроб нелегальнага пераходу мяжы ў краіны ЕС з тэрыторыі Беларусі таму сведчанне. І менавіта таму нашы суседзі даўно ўспрымаюць Беларусь не як “выспу стабільнасці”, а як “донара рэгіянальнай небяспекі”. Ці сапраўды Беларусь заходнімі краінамі сёння ўспрымаецца выключна як “донар небяспекі” і што найперш спрыяе замацаванню такога іміджу? Як гэта ўплывае на фарміраванне заходняй палітыкі адносна Мінска і ці не нараджае гэта жаданне залагодзіць Лукашэнку? Што рэальна можа зрабіць Лукашэнка, каб не быць уцягнутым канчаткова ў расійскую вайну ва Украіне і ў маскоўскую авантуру адносна краін ЕС і НАТА? На гэтыя ды іншыя пытанні ў эфіры Еўрарадыё адказвае палітычны аналітык, кіраўнік Інстытута даследаванняў бяспекі імя Касцюшкі Вадзім Мажэйка

Канец жніўня выдаўся багатым на розныя падзеі, здавалася б, паміж сабой не звязаныя. Так, 25 жніўня ў Маскву прылятаў дырэктар ЦРУ Рэткліф. Якія тэмы і з кім канкрэтна ён абмяркоўваў, дакладна не вядома, хоць інсайдаў хапае. А 27 жніўня з маскоўскага следчага ізалятара “Лефортава” “па стане здароўя” вызвалілі мільярдэра Ілью Трабера, у якога бізнес “ва ўсіх партах на паўночным захадзе Расіі”. А далей з’явілася інтэрв’ю Джона Коўла, у якім ён анансаваў візіт у Мінск у сярэдзіне верасня. Калі прыгадаць, што крыху раней за апісаныя падзеі Трамп распачаў чарговую гандлёвую вайну з Канадай, а кіраўніцтвы Літвы і Эстоніі ўпэўнілі, што ніякіх санкцыйных паслабленняў (у тым ліку на транзіт) рэжыму Лукашэнкі не будзе, то ўзнікае пытанне: ці не звязаны ўсе падзеі, сярод іншага, і “калійнай ніткай”?.. Ці сапраўды ЗША так зацікаўлены ў з’яўленні на заходнім рынку беларускага калію, што гатовы дзеля гэтага дамаўляцца з Расіяй? Калі на адным толькі МТЗ не хапае амаль 1500 працоўных — пра што гэта сведчыць? Што адбываецца з інфляцыяй і курсам долара ў Беларусі? На гэтыя ды іншыя пытанні ў эфіры Еўрарадыё адказвае аўтар і вядоўца праграмы "Оптымум" на канале “Беларусы і рынак”, эканамічны аглядальнік Андрэй Махоўскі

Пакуль рыхтуецца чарговае мірнае пагадненне з Іранам, увага Трампа вяртаецца да пытання замірэння Расіі і Украіны. Як высвятляецца, дырэктар ЦРУ Джон Рэткліф падчас свайго візіту ў Маскву прапанаваў правесці трохбаковую сустрэчу прэзідэнтаў ЗША, Украіны і Расіі, каб “пакласці канец вайне”. І ўсё гэта адбываецца на фоне пагроз з Масквы краінам ЕС і НАТА. СМІ нават апублікавалі так званы “план Пуціна з шасці пунктаў”. Месца ў якім Беларусі і Лукашэнкі застаецца пад пытаннем. Таго Лукашэнкі, у госці да якога спецпрадстаўнік Трампа Джон Коўл абяцае прыехаць у сярэдзіне верасня. Ці пагодзіцца аматар гісторый пра печанегаў ды белых мядзведзяў з касаткамі на спыненне сваёй “СВА”? Ці сведчаць словы Коўла пра прыезд у Беларусь у верасні, што перамовы з Лукашэнкам зрушыліся з мёртвай кропкі? Як ЕС рыхтуецца супрацьстаяць “шасці пунктам плана Пуціна”? Гэтыя ды іншыя тэмы абмяркоўваем у штотыднёвым жывым эфіры Еўрарадыё з палітычным аглядальнікам, гісторыкам Аляксандрам Фрыдманам

Лукашэнка наведаў Пуціна — Еўразум за 31 жніўня | Новости Беларуси за 31 августа by Euroradio

Дыскусіі пра стратэгію дзеянняў дэмсіл па змене сітуацыі ў Беларусі і вызваленні палітвязняў ідуць не першы год. І калі яшчэ два-тры гады таму прапановы пачаць дыялог з рэжымам і за нейкія палёгкі кшталту вяртання еўрапейскіх амбасадараў у Мінск патрабаваць вызвалення вязняў з-за кратаў выклікалі агульнае непрыняцце, то пасля пачатку перамоў Вашынгтона з Мінскам і выхаду на волю больш за 500 палітвязняў настроі змяніліся. Але нямоцна. Дагэтуль шмат хто перакананы, што нечага дамагчыся ад рэжыму можна толькі ціскам і прымусам. А нацыянальны дыялог ці нейкі Круглы стол калі і магчымыя, то ніяк не зараз, а пасля сыходу Лукашэнкі. Ці сапраўды для дэмсіл сёння ёсць толькі дзве стратэгіі: альбо ціснуць на рэжым, альбо заклікаць, каб заходнія партнёры ішлі на перамовы і дамоўленасці з рэжымам? Дзе гарантыі, што спрацуе ціск, і ці можна давяраць Лукашэнку ў выпадку нейкіх дамоўленасцей з ім? Навошта Лукашэнку пагаджацца на спыненне рэпрэсій і ці магчымы нацыянальны дыялог ужо бліжэйшым часам? Пра гэта і шмат што іншае ў жывым эфіры Еўрарадыё дэбатуюць прадстаўніца Кааліцыі за вызваленне палітвязняў у Беларусі Настасся Касцюгова і спікер Каардынацыйнай рады, намеснік кіраўніка Народнага антыкрызіснага ўпраўлення Арцём Брухан

На сустрэчы з Пуціным у суботу, 29 жніўня, Лукашэнка хваліўся не толькі ростам гандлю з Расіяй, але і асобна (і асабліва) тым, што беларускія вытворцы гатовы выканаць усе запыты расійскіх пакупнікоў адносна беларускай мікраэлектронікі. “І прыемна, што ў гэтым тавараабароце вялікае месца займае электроніка сучасная”, — сказаў Лукашэнка. Аб тым, што найперш гэтая мікраэлектроніка выкарыстоўваецца ў расійскіх ракетах і дронах, якія тэрарызуюць Украіну, ён сціпла прамаўчаў. Затое неаднаразова намякаў на нейкія праблемы “на поўдні Беларусі і захадзе Расіі”, якія неяк трэба вырашаць. Ці сапраўды так усё аптымістычна ў супрацы і гандлі з Расіяй і чаму Лукашэнка так хваліцца айчыннай мікраэлектронікай? Ці сапраўды расійская эканоміка ўваходзіць у “перыяд турбулентнасці” і што за рэбус умяшаўся ў беларуска-расійскія адносіны? Ці сапраўды беларускім крамам пагражаюць пустыя паліцы і што за гандаль “фамільным срэбрам” ён распачаў у Віцебскай вобласці? Пра гэта і шмат што іншае мы і разважаем у жывым эфіры Еўрарадыё з рэдактаркай выдання “План Б”, эканамічнай і палітычнай аглядальніцай Вольгай Лойка

Ці паедуць беларусы ў Паўночную Карэю — Еўразум за 28 жніўня | Новости Беларуси за 28 августа by Euroradio

Візіт дырэктара ЦРУ спачатку ў Маскву, а потым у Рыгу сведчыць на карысць тых экспертаў, якія кажуць, што галоўнай мэтай візіту было папярэдзіць Маскву аб недапушчальнасці агрэсіі ў дачыненні да Латвіі. А пра планы Пуціна нанесці ўдар па краінах Балтыі казалі неаднаразова і раней. Але ёсць інфармацыя, што пад удары “невядомых” тэрарыстаў бліжэйшым часам трапяць авія- і марскія парты краін ЕС. А Польшчу чакаюць масавыя залёты “выпадковых” дронаў. Прычым усё гэта будзе рабіцца ў тым ліку і з выкарыстаннем тэрыторыі Беларусі… Ці спрацуе план Зяленскага і ЕС па спыненні вайны і што паказаў візіт дырэктара ЦРУ ў Маскву? Ці гатовы краіны ЕС супрацьстаяць тэрарыстычным атакам Крамля і да чаго прывядзе адстаўка Мерца ў Германіі? Ці здолее Лукашэнка адмовіць Пуціну ў выкарыстанні беларускай тэрыторыі для атак і правакацый супраць краін ЕС альбо Украіны? Пра гэта і шмат што іншае мы і разважаем у штотыднёвым жывым эфіры Еўрарадыё з палітычным аглядальнікам, гісторыкам Аляксандрам Фрыдманам

Лукашэнкаўскі рэжым настойліва чапляецца за перамоўны трэк з Вашынгтонам. І хоць спецпрадстаўнік Трампа па Беларусі Джон Коўл ад вясны не наведваў Мінск і не было новых вызваленняў палітвязняў, і Лукашэнка, і сам Коўл працягваюць казаць, што нічога не скончана і новая сустрэча ды вызваленні “будуць хутка”. І ўсё гэта адбываецца на фоне новай гандлёвай вайны Трампа з Канадай, ад якой, не выключана, можа выйграць Лукашэнка. З іншага боку, Пуцін працягвае “прамацваць” Еўропу рознымі дыверсіямі. І тут можа моцна прайграць Беларусь, калі Масква да гэтых сваіх дзеянняў захоча далучыць Мінск. Дырэктар ЦРУ не дасць схлусіць… Чаму Трамп ізноўку пайшоў эканамічнай вайной на Канаду і пры чым тут беларуская калійка? Што насамрэч адбываецца з перамоўным трэкам паміж Вашынгтонам і Мінскам і пры чым тут візіт дырэктара ЦРУ ў Маскву і Рыгу? Чаму Латвія стала мішэнню для Расіі і ці атрымаецца ў Пуціна ўцягнуць Беларусь у сваю тэрарыстычную вайну супраць ЕС? Пра гэта і шмат што іншае мы і разважаем у жывым эфіры Еўрарадыё з палітычным аналітыкам, экспертам міжнароднай аналітычнай сеткі Research Solutions Ігарам Тышкевічам

Выдавецтва “Янушкевіч” вырашыла паэксперыментаваць з новымі формамі кніжнай прамоцыі, каб прадставіць чытачам новы раман Альгерда Бахарэвіча “Падземныя пераходы”. Першыя сустрэчы гэтага эксперыментальнага Кніжнага клуба адбудуцца 27 і 28 жніўня ў варшаўскай кнігарні “Букіністка”. Самае цікавае, што на сустрэчы будзе прысутнічаць сам аўтар, які “нароўні з клубаўцамі будзе весці дыскусію”, і што гэтыя шчасліўцы атрымалі кнігу за два тыдні да афіцыйнага пачатку яе продажу. Мы вырашылі правесці свой кніжны клуб у эфіры, хоць “Падземныя пераходы” загадзя прачытаць і не мелі магчымасці. Да ўсяго, маем яшчэ адну нагоду павіншаваць спадара аўтара — яго культавыя “Сабакі Еўропы” выходзяць у польскім перакладзе. Пра што новая кніга Бахарэвіча і якую галоўную думку ён хоча данесці праз “Падземныя пераходы” да чытачоў? Ці ладзіў ён ужо сустрэчы ў такім фармаце, які прапанавала выдавецтва “Янушкевіч”, і што найчасцей цікавіць людзей падчас сустрэчы з аўтарам? Чым адметныя польскі пераклад і польскае выданне “Сабак Еўропы” і чаму ён лічыць, што дачакаецца стварэння ў сацсетках хутчэй антыфанацкага клуба, чым клуба прыхільнікаў Бахарэвіча? На гэтыя ды іншыя пытанні ў эфіры Еўрарадыё адказвае пісьменнік Альгерд Бахарэвіч

Не паспеў з'ехаць з Масквы дырэктар ЦРУ Джон Рэткліф — як туды прыляцеў Лукашэнка. Якія каштоўныя інструкцыі ён спадзяецца атрымаць у Крамлі? Тым часам Сяргей Ціханоўскі знайшоў вінаватых ва ўсіх бедах. Гэта... незалежныя журналісты! Палітык пайшоў вайной на беларускія медыі за мяжой — хаця, здавалася, мусіў бы працаваць разам з імі для дасягнення агульных мэтаў — вызвалення ўсіх палітвязняў, спынення рэпрэсій і здзяйснення дэмакратычных пераменаў у Беларусі... Пра гэта, а таксама пра партнёрства рэжыма Лукашэнкі з талібамі і м'янмарскай хунтай, размаўляем з блогерам Аляксандрам Кныровічам

Чаму мядсёстрам і настаўнікам мала плацяць — Еўразум за 27 жніўня | Новости Беларуси за 27 августа by Euroradio

27 жніўня ў эфіры Еўрарадыё — падарожнік, ютуб-блогер Яўген Гуцалаў. 2020 год выразна прадэмастраваў разуменне нацыяй сваёй ідэнтычнасці і прыняццё гэтай ідэнтычнасці. У той жа самы час беларусы прадэманстравалі і працягваюць дэманстраваць гатоўнасць узяць на сябе адказнасць і за свае дзеянні, і за свой дом, і за сваю краіну. І гэта разуменне дапаможа нам у будучым не толькі аб’яднаць разкіданую нацыю, але і адбудаваць сваю краіну, перакананы Яўген Гуцалаў. Пра тое, чаму, паважаючы чужое, нельга забывацца пра сваё, як знайсці сваю беларускасць і ці сапраўды беларуская ідэнтычнасць у “знятым абутку і мірным пратэсце”, мы і разважаем у праграме “Ідэя Х” з Яўгенам Гуцалавым.

27 жніўня ў эфіры Еўрарадыё — падарожнік, ютуб-блогер Яўген Гуцалаў. 2020 год выразна прадэмастраваў разуменне нацыяй сваёй ідэнтычнасці і прыняццё гэтай ідэнтычнасці. У той жа самы час беларусы прадэманстравалі і працягваюць дэманстраваць гатоўнасць узяць на сябе адказнасць і за свае дзеянні, і за свой дом, і за сваю краіну. І гэта разуменне дапаможа нам у будучым не толькі аб’яднаць разкіданую нацыю, але і адбудаваць сваю краіну, перакананы Яўген Гуцалаў. Пра тое, чаму, паважаючы чужое, нельга забывацца пра сваё, як знайсці сваю беларускасць і ці сапраўды беларуская ідэнтычнасць у “знятым абутку і мірным пратэсце”, мы і разважаем у праграме “Ідэя Х” з Яўгенам Гуцалавым.

Паводле звестак, рэальныя заробкі беларусаў у студзені-ліпені выраслі на 7,7 % . Прычым гэты паказчык павялічваецца ўжо трэці месяц запар. І праўда, сярэдні налічаны заробак у ліпені ў Беларусі павялічыўся да 3172 рублёў. Але гэта так званыя “брудныя” грошы — да сплаты падаткаў і збораў. У любым выпадку выглядае на тое, што гэты рост — сезонны, звязаны з добрымі заробкамі падчас уборачнай. А яшчэ — з няспыннымі ўдарамі УСУ па расійскіх НПЗ… Якія чыннікі спрыяюць росту заробкаў і як доўга гэта працягнецца? Як вайна ўплывае на заробкі работнікаў беларускіх НПЗ і ці сапраўды расійская эканоміка ўваходзіць у “перыяд турбулентнасці”? Ці ўратуюць беларускі рынак працы рабочыя з КНДР і чым замяніць плацежную сістэму Payoneer? Гэтыя ды іншыя эканамічныя тэмы абмяркоўваем у жывым эфіры Еўрарадыё з эксперткай у сферы дзяржаўнага кіравання і міжнароднага развіцця, прадстаўніцай па эканоміцы і фінансах Аб’яднанага пераходнага кабінета, дэлегаткай Каардынацыйнай рады ад спіса “Еўрапейскі выбар” Алісай Рыжычэнка

Занепакоеныя зніжэннем узроўню нараджальнасці і дэмаграфічным крызісам у краіне, лукашэнкаўскія чыноўскі ўпадаюць у крайнасць — ад абавязковай праверкі на бясплоддзе да жадання завезці ў Беларусь працоўных з КНДР. А яшчэ чыноўкі посцяць фота з крамаў, дзе набываюць сваім дзецям усё неабходнае для школы пад лозунгам “Таннае і беларускае!”. А на розных дазволеных фэстах галоўнымі, а часам і адзінымі ўдзельнікамі з’яўляюцца Z-артысты з Расіі. У дэмсілах свае крайнасці: адны крытыкуюць фонды за “недастатковую” дапамогу палітвязням, Офіс — за ўсё, Бабарыку — за пазіцыю і выказванні, іншыя ж бароняць ад “нападнікаў” Бабарыку і бачаць у гэтых нападах “руку Вячоркі”… Ці дапамогуць беларускія жанчыны рэжыму выратаваць дэмаграфічную сітуацыю і ці пасадзейнічаюць гэтаму змены ў аплаце дэкрэтнага адпачынку? На што разлічваюць чыноўнікі, запрашаючы рабочых з КНДР, а арганізатары фестываляў, робячы стаўку на расійскіх артыстаў? Каго і як можна крытыкаваць у дэмасяроддзі, чаму так шмат увагі надаецца асобнымі персонамі пытанню грантаў і грошай і хто пакрыўдзіў Сяргея Ціханоўскага? На гэтыя ды іншыя пытанні ў эфіры Еўрарадыё адказвае блогерка і былая палітзняволеная Вольга Такарчук

Беларускі камбайнер працаваў 40 дзён без выхадных і зарабіў 13 тысяч рублёў. Кажа, што гэта было складана, і часта пасля працы ён вяртаўся дадому зусім без сіл. 4 300 долараў за 40 дзён цяжкай працы без выхадных у любое надвор’е — гэта добры заробак? Меркаванне чытачоў Еўрарадыё падзялілася. Адны лічаць, што атрымліваць столькі грошай — гэта нахабства. Іншыя, раздзяліўшы суму на час, прыйшлі да высновы, што 8 долараў за гадзіну — гэта мала. А што думаюць эканамісты? Як увогуле выглядае сітуацыя з заробкамі ў краіне? Што з'яўляецца драйверам іх росту, і што можна сказаць пра цяперашні рынак працы?

Яшчэ адно сведчанне злачынстваў лукашэнкаўскага рэжыму выйшла ў публічную прастору — кніга былога палітвязня Ігара Карнея “Інкамунікада. Катаванне адзінотай”. Як зазначае аўтар, “твор з акцэнтацыяй на вычварэнскай методыцы пенітэнцыярнай сістэмы Беларусі — практыцы дадатковага пакарання ўнутры пакарання асноўнага. Катаваннях адзінотай”. Але, безумоўна, не толькі пра гэта. Чаму абавязковы прагон праз “сінгл-румы” штрафных ізалятараў трэба лічыць здзекам, і ніяк інакш? На што разлічваюць ініцыятары падобнай экзекуцыі і ад каго атрыманы карт-бланш на беззаконне? Як творчасць дазваляе справіцца з траўмамі, атрыманымі ў лукашэнкаўскіх катавальнях, і які шлях чакае кнігі беларускіх аўтараў, выдадзеныя за мяжой? На гэтыя ды іншыя пытанні ў жывым эфіры Еўрарадыё адказваюць былы палітвязень, пачынаючы літаратар Ігар Карней і старшыня Беларускага ПЭНа Таццяна Нядбай

Лекарка Лукашэнкі і яе раскошнае жыццё — Еўразум за 26 жніўня | Новости Беларуси за 26 августа by Euroradio

Дэпартаваць з краіны, а потым ануляваць беларускія пашпарты вызваленым у выніку перамоў з ЗША палітвязням Лукашэнку, відаць, падалося мала. Нечакана для сябе асобныя з былых вязняў пабачылі свае прозвішчы ў расійскай базе вышуку. Гэта азначае, што іх аб’явілі ў міждзяржаўны вышук. Іншым дэпартаваным вязням сваякі перадалі, што іх “шукае” беларуская міліцыя. І гэта яшчэ справа не дайшла да Інтэрпала! Усё гэта ўскладняе як працэсы легалізацыі, так і проста жыццё людзям. А ў гэты час правакатары кшталту Канапацкай спакойна катаюцца па Еўропе. Які сэнс аб’яўляць у расійскі вышук людзей, якіх вы самі вывезлі ў Еўропу, і чым гэта пагражае таму, хто ў той базе вышуку знаходзіцца’? Калі міліцыянеры прыходзяць да сваякоў дэпартаваных палітвязняў, ці насамрэч іх мэта — “пошук” канкрэтных людзей, ці гэта цынічны здзек са сваякоў палітвязня і з яго самога? Ці будзе рэжым спрабаваць аб’явіць у міждзяржаўны вышук праз Інтэрпал нобелеўскага лаўрэата Бяляцкага і як супрацьстаяць правакацыям і спробам вярбоўкі з боку спецслужб? На гэтыя ды іншыя пытанні ў эфіры Еўрарадыё адказвае адвакат, спецыяліст у галіне міжнародна-прававога супрацоўніцтва па крымінальных справах, доктар сацыяльных навук, кіраўнік адвакацкага бюро "Legal status" Алесь Міхалевіч

Ніякіх сігналаў, што лукашэнкаўскі рэжым плануе зніжаць узровень рэпрэсій, з Беларусі не прылятае. Наадварот, да рэпрэсій унутраных дадаюцца ўсё новыя рэпрэсіі трансмежныя. Калі супраць тых, хто з’ехаў з краіны, не толькі распачынаюць крымінальныя справы і ладзяць завочныя суды, але і падаюць у міждзяржаўны ды міжнародны вышукі, анулююць пашпарты, пазбаўляюць маёмасці. І ў гэты час беларусы (найперш дыяспары) разважаюць пра нацыянальны дыялог з рэжымам і распрацоўваюць канцэпцыю люстрацыі. Ці час сёння разважаць над прынцыпамі будучай люстрацыі, калі магчымасць яе правядзення далёка не відавочная, і ці сапраўды ў распрацаванай канцэпцыі дамінуе прынцып “усіх на слупы”, як падае гэта прапаганда? Ці не час прапісаць нормы вяртання канфіскаванай рэжымам маёмасці ў палітычных апанентаў і як гэты працэс можа выглядаць у ідэале ў беларускіх рэаліях? Як беларусы могуць супрацьстаяць трансмежным рэпрэсіям з боку рэжыму і што дэмсілы рэальна робяць проста цяпер для вырашэння надзённых праблем суайчыннікаў у выгнанні? На гэтыя ды іншыя пытанні ў эфіры Еўрарадыё адказвае адвакат Дзмітрый Лепрэтар

У беларусак правераць якасць яйцаклетак — Еўразум за 25 жніўня | Новости Беларуси за 25 августа by Euroradio

Удары па Wildberries і Ozon: што гэта азначае для беларускага бізнесу? Пасля атак на расійскія склады праблемы адчулі і беларускія прадпрымальнікі: у кагосьці згарэў тавар на дзясяткі тысяч рублёў, у кагосьці парушыліся пастаўкі і завіслі заказы. Наколькі небяспечнай аказалася залежнасць беларускага бізнесу ад расійскай лагістыкі і маркетплейсаў? Пра гэта і пра стан беларускай эканомікі пагаворым з эканамісткай Анастасіяй Лузгіной. Абмяркуем вынікі працы эканомікі за студзень–ліпень, крыніцы росту, інвестыцыі і новыя ўмовы крэдытавання, планы ўрада на 2027 год, супрацоўніцтва з М'янмай і, вядома, валютны курс. Асобна разбярэм узмацненне кантролю за наяўнасцю айчыннай прадукцыі на прылаўках

Свой працоўны тыдзень Лукашэнка пачаў з сустрэчы з чарговым расійскім губернатарам. Такое ўражанне, што ўсе гэтыя кіраўнікі расійскіх рэгіёнаў ездзяць да яго ў Мінск як да свайго “калегі”. “Сваёй”, ледзь не своеасаблівым расійскім рэгіёнам, лічыць Беларусь і пераважная большасць расіян. І таму сёння, калі ўкраінскія БПЛА наведваюцца ў Расію ўсё часцей і на ўсё большую адлегласць, гавораць пра пераезд у Беларусь. Дзе практычна ўсе гавораць, хай і з нейкім смешным акцэнтам, але па-руску, і частка “трыадзінага”, і чысценька ды бяспечна… Пра што сведчаць прыезды расійскіх губернатараў да Лукашэнкі і пры чым тут традыцыі татара-мангольскага іга? Як звязаны пытанні мовы і павагі да чужога суверэнітэту? Беларуская мова — гэта толькі пра Беларусь, пра “паноў сахі ды касы”, ці беларускасць можа тычыцца ўсяго свету? Пра гэта і шмат што іншае мы і разважаем з кандыдатам гістарычных навук, аглядальнікам Яўгенам Красуліным

Саламяная прыгажуня з касой і чырвона-зялёнымі стужкамі да “Дажынак”, асабістая доктарка Лукашэнкі з Hermès і Cartier на Лазурным Беразе, маладыя ўдзельніцы конкурсаў прыгажосці ў атачэнні кіраўніка дзяржавы, “будучыя мамы”, якіх дзяржава хоча спачатку абавязкова правяраць на рэпрадуктыўныя рызыкі, а пасля нараджэння дзіцяці — “хутчэй вяртаць у эканоміку”, і беларускі, якіх пасля допытаў на мяжы прымушаюць распранацца. На першы погляд — зусім розныя гісторыі. Але разам яны складаюцца ў красамоўны партрэт Года беларускай жанчыны. Якую жанчыну насамрэч хоча бачыць беларуская дзяржава і што праз гэта яна расказвае пра сябе? Як маладосць, прыгажосць і блізкасць да Лукашэнкі могуць канвертавацца ў статус і доступ да рэсурсаў, і чаму пасля допытаў і праверкі тэлефонаў на мяжы жанчын прымушаюць распранацца? Ці не становіцца цела яшчэ адной тэрыторыяй, на якой улада паказвае: межы тут вызначаеш не ты? Пра гэта і шмат што іншае мы і разважаем у новым выпуску “Гендар_гэпа” з даследчыцай медыя, улады і гендару Ірынай Сідорскай

Качанава, Турчын ці Віктар — хто пераемнік Лукашэнкі? — Еўразум за 24 жніўня | Новости Беларуси за 24 августа by Euroradio

Коўл усё ніяк не едзе, і гэта выклікае занепакоенасць. Маўляў, няўжо “перамоўны трэк” паміж Вашынгтонам і Мінскам скончыўся, ніякай “біг дзіл” не будзе — і вызваленняў таксама?! У гэты нявызначаны час адны кажуць пра неабходнасць далучаць да перамоў і гандлю з рэжымам еўрапейцаў, іншыя разважаюць пра магчымасць Круглага стала і нацыянальнага дыялогу, нехта аднекуль пабачыў змяншэнне рэпрэсій… А хтосьці лічыць грошы і кажа пра недастатковую падтрымку палітвязняў з боку фондаў (чытай — Офіса). Ці маюць пад сабой падставы абвінавачванні ў недастатковай ці няпоўнай падтрымцы палітвязняў і як на велічыню дапамогі ўплывае медыйнасць? Ці залежыць велічыня дапамогі ад “лаяльнасці да Офіса” і ці з’явіліся прыкметы гатоўнасці рэжыму да лібералізацыі? Ці не прыйшоў час адмовіцца ад санкцыйнага ціску і пачаць размаўляць і дамаўляцца з рэжымам? На гэтыя ды іншыя пытанні ў эфіры Еўрарадыё адказвае былы палітвязень, грамадскі актывіст Павел Вінаградаў

Даўно не сакрэт, што спецслужбы вельмі любяць дзейнічаць на тэрыторыі іншых краін пад дыпламатычным прыкрыццём — уладкоўваючы сваіх агентаў у амбасады ды консульствы пад выглядам дыпламатаў і супрацоўнікаў дыпмісій. Тут табе і легальнае знаходжанне ў краіне, і дыпламатычная недатыкальнасць. А з улікам таго, што на сёння спецслужбы Лукашэнкі і Пуціна ўяўляюць сабой фактычна дзве часткі аднаго цэлага, то на каго працуюць ”чырвона-зялёныя шпікі”, відавочна. Гэтак жа як ужо фактычна відавочна, што беларускія прадпрыемствы — частка расійскага ваенна-прамысловага комплексу. Што дакументальна даказвае расследаванне BELPOL. Як стала вядома пра шпіёнаў рэжыму Лукашэнкі, якія працуюць пад дыпламатычным прыкрыццём, і пры чым тут спецслужбы Расіі? Ці можна казаць, што Беларусь ператварылася ў “зборачны цэх расійскай вайны” і ці па прымусе Масквы гэта адбылося? Чым Мінску так цікавая супраца з хунтай М’янмы і што талібаў звязвае з Лукашэнкам? Пра гэта і шмат што іншае мы і разважаем у жывым эфіры Еўрарадыё з прадстаўніком ініцыятывы BELPOL Уладзімірам Жыгарам

Лукашэнка пашырае кантакты з талібамі, дэлегацыя якіх днямі наведвала Беларусь, і ўзмацняе супрацу з хунтай М’янмы. Калі ў выпадку з Афганістанам яшчэ можна казаць пра найперш гандаль “таварамі народнага спажывання”, то адносна М’янмы пра карысць супрацы “на падвышэнне дабрабыту простага народа гэтай краіны” казаць наўрад ці (калі верыць Justice For Myanmar) даводзіцца. Размова, хутчэй, ідзе пра гандаль зброяй. У той час як вайна ўсё часцей прыходзіць і ў Беларусь. У выглядзе “бандэролі” ад Пуціна... Чаму Мінск так ухапіўся за супрацу з беднай, адсталай М’янмай, дзе пануе хунта, і што талібаў звязвае з Лукашэнкам? Чаму, гаворачы пра жаданне наладзіць адносіны з ЕС, рэжым не спыняе міграцыйны шантаж краін-суседзяў і пра што сведчаць залёты ў нашу краіну расійскіх беспілотнікаў? Што адбываецца на перамоўным трэку з Вашынгтонам і ці “адваюе” сабе месца на палітычным полі Бабарыка? На гэтыя ды іншыя пытанні ў эфіры Еўрарадыё адказвае палітычны аналітык інфармацыйнага агенцтва “Позірк” Аляксандр Класкоўскі

Прэзідэнтскія амбіцыі Бабарыкі — Еўразум за 21 жніўня | Новости Беларуси за 21 августа by Euroradio

У суботу, 5 верасня, у варшаўскім клубе Niebo адбудзецца пяты фестываль беларускай музыкі Graj. Гасцей чакаюць выступленні артыстаў Volski, J:МОРС, Дай Дарогу!, Dzieciuki, “Разбітае сэрца пацана” і не толькі. Ну а мы таксама падрыхтавалі вам сюрпрыз — разыграем два квіткі на фэст! Невялічкі конкурс з цікавымі пытаннечкамі зладзім проста ў жывым эфіры разам з Лявонам Вольскім, Паўлам Градніцкім і суарганізатаркай Graj Інэс Сянкевіч. Далучайцеся! Як змяняўся фармат і настрой фэсту і з якімі праблемамі найперш давялося (а магчыма, і сёння даводзіцца) сутыкнуцца арганізатарам? Ці застаецца ў беларусаў за мяжой цікавасць да свайго і ці завітваюць на імпрэзу палякі? Як на арганізатарах беларускіх фэстаў і беларускіх музыках адбіваецца тое, што Варшаву апошнім часам апанавалі фэсты і канцэрты “харошых рускіх”, і ці варта нам з імі дзяліцца на сваіх і чужых? На гэтыя ды іншыя пытанні ў жывым эфіры Еўрарадыё адказваюць суарганізатарка фэсту “Грай” Інэс Сянкевіч і фронтмены гуртоў Volski і “Разбітае сэрца пацана” Лявон Вольскі і Павел Гарадніцкі

Нягледзячы на тое, што лукашэнкаўская прапаганда не спыняе сваіх нападак на Польшчу, паводзіны самога рэжыму ў адносінах да гэтай суседняй краіны змяніліся. І размова не толькі пра вызваленне ў выніку “абмена шпіёнамі” аднаго з лідараў польскай меншасці ў Беларусі Анджэя Пачобута. Атакі нелегальнымі мігрантамі ўжо колькі месяцаў як перанакіраваны з польскай мяжы на межы латвійскую і літоўскую. Тым не менш, казаць пра размарозку адносін паміж Мінскам і Варшавай не даводзіцца. Хоць у Польшчы асобныя палітыкі і чыноўнікі пачалі казаць пра “паляпшэнне палітычнай сітуацыі ў Беларусі”, беларусам сталі часцей адмаўляць у наданні міжнароднай абароны, а пэўныя палітычныя сілы кажуць пра неабходнасць зрабіць яшчэ больш жорсткай міграцыйную палітыку краіны. Чаму польскія палітыкі ўсё часцей кажуць пра неабходнасць зрабіць больш жорсткай міграцыйную палітыку ў Польшчы і як гэта закране беларусаў? Што прымушае чыноўнікаў і палітыкаў казаць пра паляпшэнне палітычнай сітуацыі ў Беларусі і ці азначае гэта гатоўнасць дамаўляцца з Лукашэнкам? Як у Польшчы ставяцца да пагрозы магчымага нападу з боку Расіі і ці гатовы грамадзяне Польшчы бараніць сваю краіну? На гэтыя ды іншыя пытанні ў эфіры Еўрарадыё адказвае палітычны аглядальнік выдання Dziennik Gazeta Prawna Міхал Патоцкі

Галоўным героем сыходзячага тыдня стаў міністр адукацыі Андрэй Іванец, які заявіў, што не ўспрымае рэпетытараў. Маўляў, калі ў школе класны настаўнік, то ніякі рэпетытар не патрэбны. “Класныя настаўнікі даўно ў рэпетытарах”, — пішуць у сацсетках бацькі дзяцей. А настаўнікі расказваюць пра новыя выпрабаванні: нібыта ў некаторых мінскіх школах скарацілі прыбіральшчыц, і прыборка легла на іх плечы. Чаму дзяржаве не даюць спакою рэпетытары і ці ёсць шанец вярнуць у школу моцных настаўнікаў? Гэта, а таксама эканамічныя стасункі Беларусі з рэжымамі з сумнеўнай рэпутацыяй і пошукі беларусамі ў выгнанні новых лідараў абмяркоўваем з блогерам Аляксандрам Кныровічам.

Cтрашны трэск і грукат у Гомелі і талібы ў Мінску — Еўразум за 20 жніўня | Новости Беларуси за 20 августа by Euroradio

Следам за талібамі, дэлегацыя якіх проста цяпер знаходзіцца ў Беларусі, у Мінск плануе завітаць прэзідэнт М’янмы Мін Аун Хлайн. Нагадаем, што ў 2021 годзе ў М’янме да ўлады прыйшла хунта, што прывяло да пратэстаў і грамадзянскай вайны, у выніку якой загінула як найменей 90 тысяч чалавек. Але што казаць, калі прэзідэнт ЗША Дональд Трамп анансуе хуткую сустрэчу “са сваім сябрам Кім Чэн Ынам”. І па-ранейшаму захоўвае невытлумачальную сімпатыю да Пуціна. Нягледзячы на тое, што ад “духа Анкорыджа” нават духу не засталося… Чаму ў Мінск пацягнуліся прадстаўнікі і лідары дыктатарскіх рэжымаў і што іх звязвае з Лукашэнкам? Ці сапраўды ў Трампа існуе сімпатыя да дыктатара Паўночнай Карэі і ці змянілася яго стаўленне да Пуціна? Што адбываецца з “духам Анкорыджа” і як шматлікія перамогі Трампа ў розных войнах уплываюць на будучыя выбары ў Кангрэс? На гэтыя ды іншыя пытанні ў эфіры Еўрарадыё адказвае амерыканіст, палітычны аглядальнік Антон Пянькоўскі

У Польшчы зноў плануюць змяніць правілы працаўладкавання замежнікаў. Сярод прапанаваных змен — адмена патрабавання ўказваць нумар пашпарта ў дазволе на працу. Што для беларусаў, якія трапляюць у “пашпартную пастку”, вельмі важна. Асабліва ва ўмовах, калі застаюцца цяжкасці як з заменай пашпартоў, так і з атрыманнем легалізацыйнага статусу. На гэтым фоне складанасці выбару паміж падачай на пастаянны від на жыхарства і статус доўгачасовага рэзідэнта выглядаюць несур’ёзнымі. Але толькі на першы погляд… Чым адметны праект закона з прапановамі змен у правілах працаўладкавання замежнікаў у Польшчы і як гэта закране беларусаў? Што змяняецца ў сістэме замены пашпартоў і ці змянілася стаўленне супрацоўнікаў міграцыйнай службы да аналізу сітуацыі ў Беларусі? Як дамагчыся выплаты беларускай пенсіі ў Польшчы і як правільна выбраць паміж падачай на пастаянны від на жыхарства і статус доўгачасовага рэзідэнта? На гэтыя ды іншыя пытанні ў эфіры Еўрарадыё адказвае магістр права, юрыстка ў галіне легалізацыі знаходжання і працаўладкавання замежнікаў у Польшчы Вольга Дабравольская

Наезд міністра адукацыі на рэпетытараў — Еўразум за 19 жніўня | Новости Беларуси за 19 августа by Euroradio

Словы Паўла Севярынца пра тое, што Еўрапейскі гуманітарны ўніверсітэт ужо даўно на самай справе ні беларускім, ні тым больш нацыянальным універсітэтам не з’яўляецца, выклікалі вялікую дыскусію. Тым больш што Севярынца падтрымаў дарадца Святланы Ціханоўскай па навуцы і адукацыі Павел Церашковіч. Па яго словах, у ЕГУ практычна няма праграм, скіраваных на беларускую навукова-адукацыйную павестку, і нам неабходна думаць пра заснаванне сваёй нацыянальнай ВНУ. Ну і ўзнікае пытанне грошай на фінансаванне ЕГУ, якія ідуць з тых сродкаў, што выдаткоўваюцца на беларускую супольнасць. Чаму ўзнікла пытанне “беларускасці” ЕГУ і ці адпавядае рэчаіснасці адмаўленне ў гэтым універсітэту ў Вільні? Ці мае значэнне тое, на якой мове функцыянуе ВНУ, і ці рэальна сёння за мяжой стварыць менавіта нацыянальную беларускую ВНУ? Што беларускага ёсць сёння ва ўніверсітэцкай праграме ЕГУ і як на яго працы адбіваецца “экстрэмісцкі статус”? На гэтыя ды іншыя пытанні ў эфіры Еўрарадыё адказвае эксперт па культурнай спадчыне, дацэнт ЕГУ Сцяпан Стурэйка

Украінскія дроны ўсё часцей турбуюць Маскву і далятаюць да аб’ектаў за некалькі тысяч кіламетраў ад мяжы. У адказ у Расіі ўсё гучней кажуць пра мабілізацыю. І хоць афіцыйна гэта не пацвярджаецца, Лукашэнка на ўсялякі выпадак загаварыў пра нежаданне беларусаў ні з кім ваяваць. Што, праўда, не замінае беларускім прадпрыемствам пашыраць супрацу з расійскім ваенна-прамысловым комплексам і працаваць на вайну. Да вайны ці, як мінімум, да правакацый з боку Расіі (не выключана, што і з тэрыторыі Беларусі) рыхтуецца і Еўропа. Такое адчуванне, што да вялікай вайны застаецца зусім няшмат. Чым адметныя апошнія атакі Украіны па аб’ектах у Расіі і што мае на мэце Расія, наносячы свае ракетныя ўдары па Украіне? Ці можна верыць у міралюбства Лукашэнкі і што стаіць за яго словамі? Ці сапраўды новыя палігоны для БПЛА, якія будуе Расія ля сваіх заходніх меж, нясуць пагрозу краінам ЕС і ці насамрэч пагроза Украіне з поўначы на сёння невідавочная? На гэтыя ды іншыя пытанні ў эфіры Еўрарадыё адказвае ваенны эксперт, аглядальнік групы “Інфармацыйны супраціў” Аляксандр Каваленка

З Кабула ў Беларусь прыбыла ўрадавая дэлегацыя талібаў. Па запрашэнні афіцыйнага Мінска яны будуць удзельнічаць у другім пасяджэнні Сумеснай камісіі па эканамічным і гандлёвым супрацоўніцтве паміж Афганістанам і Беларуссю. Дэлегацыю ўзначальвае міністр сельскай гаспадаркі, ірыгацыі і жывёлагадоўлі Маўлаві Атаўла Амары. У гэты ж час Лукашэнка наведвае завод па вырабе зброі і кажа пра жаданне міру ды добрасуседства… Чым адметны візіт дэлегацыі талібаў і на якое супрацоўніцтва з Кабулам Мінск разлічвае? Ці ёсць сувязь паміж выказваннем Лукашэнкі пра імкненне да міру і нежаданне ваяваць ні з расіянамі, ні з украінцамі і словамі пасла Чарнагора пра магчымасць сустрэчы і перамоў з Лукашэнкам прадстаўнікоў кіраўніцтва Украіны? Што адбываецца з “саюзным будаўніцтвам” сёння і ці атрымліваецца ў Вашынгтона “хоць крыху адцягнуць Лукашэнку ад Масквы”? Пра гэта і шмат што іншае мы і разважаем у штотыднёвым жывым эфіры Еўрарадыё з дацэнткай, кандыдаткай гістарычных навук, эксперткай па міжнароднай палітыцы Розай Турарбекавай

На фоне таго, што зноў з розных сталіц, з розных бакоў гучаць словы пра магчымыя перамовы, Лукашэнка таксама пачаў гаварыць пра сваю прыхільнасць да міру. Верагодна, разумее: калі пачнецца рэальны працэс заканчэння вайны, Беларусь не павінна апынуцца за бортам. Але па-ранейшаму называе Расію саюзнікам і не ставіць пад сумнеў яе інтэрпрэтацыю вайны. Тым не менш відавочна, што наўкол “працэсы ідуць”, і, каб імі скарыстацца, трэба, калі казаць пра беларускія дэмсілы, мець адзінства. А з ім чым далей, тым больш праблемна… Чаму Лукашэнка пачаў гаварыць пра мір і на што ён такім чынам рэагуе? Ці можна словамі пра мірнае неба заваяваць прыхільнасць беларусаў, і што з тым мірным небам адбываецца? Чаму не ўсе ў дэмсупольнасці засталіся задаволеныя тым, як Бабарыка вярнуўся на палітычнае поле, і ці сапраўды Сабаленка нікому нічым не абавязана? На гэтыя ды іншыя пытанні ў эфіры Еўрарадыё адказвае палітычны аглядальнік Віталь Цыганкоў

Долар па 3 рублі і секты, у якія клічуць беларусаў — Еўразум за 18 жніўня | Новости Беларуси за 18 августа by Euroradio

У Расіі працягваюць гарэць не толькі лагістычныя хабы Wildberries, але і НПЗ. Адпаведна, патрэба як цывільных спажыўцоў, так і (што нават больш важна) расійскага войска ў беларускім паліве застаецца нязменна павышанай. Але што дзіўна — апошнім часам пастаўкі гэтага паліва ў Расію значна зменшыліся. Затое вырас курс долара, і трымаецца вышэй за 3 рублі. Чаму пастаўкі беларускага паліва ў Расію зменшыліся і як гэта ўплывае на папаўненне беларускага бюджэту? Што адбываецца з курсам долара ў Беларусі і як гэта звязана з сітуацыяй у расійскай эканоміцы? Чаму зняцце амерыканскіх санкцый не дапамагло беларускай “калійцы” і хто выйграе ў бітве за ўраджай? На гэтыя ды іншыя пытанні ў эфіры Еўрарадыё адказвае аўтар і вядоўца праграмы "Оптымум" на канале “Беларусы і рынак”, эканамічны аглядальнік Андрэй Махоўскі

Дзе руская мова — там і “рускі свет”. Прасоўваць ідэалогію якога Расія імкнецца найперш з дапамогай мяккай сілы. І для гэтага ў яе ёсць шэраг адпаведных структур. Да прыкладу, Фонд Гарчакова альбо Маскоўскі Дом суайчынніка. У апошняга шмат філіялаў па ўсім свеце. У Беларусі МДС працуе праз так званы Дом Масквы ў Мінску. І калі вы бачыце, як у беларускіх гарадах хтосьці раздае “георгіеўскія стужкі”, збірае “гуманітарку для байцоў СВА” і ладзіць іншыя прарасійскія шабашы, будзьце ўпэўнены — без агентуры з Дома Масквы не абышлося. Доказы таму сабралі нашы калегі з “Бюро Медыя”. Чаму Дому Масквы так утульна ў Мінску і агулам у Беларусі і што ставяць сабе мэтай яго супрацоўнікі? Што з сябе ўяўляюць мерапрыемствы, якія арганізоўвае ці курыруе Дом Масквы ў Мінску, і колькі гэта каштуе? Якія беларускія арганізацыі супрацоўнічаюць з ДМ, якую небяспеку нясе дзейнасць гэтай расійскай структуры для Беларусі і пры чым тут ФСБ? На гэтыя ды іншыя пытанні ў эфіры Еўрарадыё адказваюць журналісты-расследавальнікі “Бюро Медыя” Ксенія Вязнікоўцава і Аляксандр Ярашэвіч