ILS DUS DA NUS

In pod en quatter cun Davyd Barandun e Fabian Ritzmann dal SCB. Davart secrets ord la gardaroba, la vita incognito sco profi da hockey, la confruntaziun cun clischés, homosexualitad en il sport, baruffas sin il glatsch, il champiunadi mundial e la causa Fischer.

Ils megliers artitgels da papetaria, la smaladicziun d’intelligenza artifiziala, il nov film da Spider Man e discussiuns che han lieu finalmain puspè en persuna. Marcus ed Elias èn reunids en il Stu-Ra 2 e speranza era en vossas ureglias. Chars, chars salids.

Tranter Ticino e Grischun datti ina discussiun davart rauba ch’uffants fan che persunas creschidas na fan betg (pli), che fissan dentant anc magari rinfrestgantas: Esser pli onest, dumandar dapli, pernottar tar amias ed amis u na betg avair tema da quai ch’auters pensan. In zic inspiraziun?

Pod sin distanza: Marcus è entant a Napoli, nua ch’el sa senta gia meglier co a Milaun, qua haja da far cun sia grondezza??? Elias è a Cuira nua ch’el ha vis il mund ord vista d’uffants e na vuless betg pli bandunar quella vista. E na l’ultim datti intgins pleds da giuvenils (presumads).

Pod sin distanza: Marcus è en l’Italia nua ch’el vul far a chaschun dal program da stad dad RTR «Estate italiana» musica rumantscha cun persunas talianas. Spoiler: Blera musica n’hai anc betg dà. Elias tegna la posiziun en la Svizra nua ch’el resumescha la stad da festivals enfin uss incl. OAL26.

Novas sfidas sportivas mainan ad Elias ad aventuras dischagreablas. Chavazzin fazielet e chauns. Concert mainan ad Elias e Marcus en il paradis. Chavazzin: Moon & Stars. Ed ina nova rubrica procura per fatgs, smirvegl e divertiment. Chavazzin: bomba.

Malgrà circumstanzas da corrupziun e politica inumana en ils stadis unids concedan Marcus ed Elias ch’il champiunadi mundial ha tuttina tratg en la mongia ad els. Il success svizzer fa grond gust, dentant per il imni da gols dess probabel meglras propostas. Ideas concretas datti en il pod!

Sco teenagers han umens (e dunnas segir era) magari sentiments ch’èn grevs da metter a lieu. Tant en il corp sco en il tgau. Cunzunt cura ch’ins cumenza a sviluppar ils emprims sentiments ed avair ils emprims «crushs» datti situaziuns ch’ins n’emblida mai pli. In excurs spontan ma intensiv.

Tgenins sports èn politics? Èni sanesters ubain dretgs? Dastga ins insumma valitar quai? Na ins na dastga betg e tuttina fan I2DN ina emprova. E co pon ins tegnair tar occurrenzas da vaglia ina tscherta qualitad che va forza a perder pervia d’in tschert success? I dat blers pleds e paucas ideas.

Dus mais senza I2DN, dus mais senza l’inscunter en il Stu-Ra 2. Elias è turnà or da vacanzas turbulentas, Marcus è daventà marangun ed ensemen discutan els tranter auter linguatg cumplitgà, ideas per autos futurs, ballape e co ir enturn cun l’atgna energia. Bel che essas puspè cun nus!

Mintg’onn, ils 14.6, ha lieu en Svizra il di da chauma feministic. En vista da quest di survegnan I2DN visitas d’Arina Frölich ed Alina Müller, che n’han betg mo in’expertisa academica ma era ina perspectiva da dunnas sin ils temas egualitad, gender e feminissem.

Marcus, anc adina in «neo-Sursilvan», ha puspè ideas per il traffic. Questa giada per la rundella a Glion - e questa giada era pli realisticas. Elias è puspè stà a currer in mez maraton. Da discutar dattan sper quai trends da sanadad, tuns da scalin nostalgics e podcasts rumantschs.

Kanye West survegn puspè in palc memia grond, era en il podcast. Dispitaivel, èn Marcus ed Elias perina schebain ch’i dat differentas perspectivas. In palc survegnan era skerzs d’avrigl, il traffic da Pasca, visiuns da mobilitad da Marcus e visitas en in curs da rumantsch dad Elias.

Elias ha fatg ina experientscha inquietanta cun «shreddar» la naiv loma, e tuttina è el grat per l’experientscha. Marcus ha scuvert in nov agid en cuschina. Er el è grat per quella nova experientscha. Ensemen èn I2DN grats per sentiments d’esser inamurà sco giuvenil – detagls en il pod.

Sper intginas istorgias lateralas dattan cunzunt dus temas da discutar: La manosfera sco purtretada en il film da Louis Theroux ed il cas Ulmen/Fernandes. Dus temas che mussan puspè quanta lavur ch’umens han anc da far per ch’il mund daventa pli normal per tuttas e tuts, oravant tut per las dunnas.

I dat in update davart vopnas: Elias ha fat retschertgas davart la vopna grischuna e scuvert il potenzial masculin. Marcus romantisescha la lavur da spazzachamins ed in auditur confruntescha vendaders da discs cumpacts sin las vias bernaisas. Ed RTR tschertga in chau - vess insatgi gust?

In di suenter la votaziun davart l’iniziativa SRG SSR na regna betg euforia. Marcus ed Elias discutan tge ch’ils motivs èn ord lur perspectiva. Era il di internaziunal da las dunnas e tge che umens pon far in chaussa vegn discutà. Per ch’i resta tut «on brand» dattan er penis da discurrer.

In podcast auter sco spetgà. Senza ils giasts empermess dentant tuttina plain stgazis auditivs. Elias declera pertge ch’i na dat betg giasts, Marcus dat in update davart sia carriera da passlung e raquinta da la sfida da maschadar amicizias cun lavur. E co as perda insumma aura? I2DN fan exempels!

Quai è para la devisa sch’ins vul avair success cun in podcast. Sche lura: Voting tar premis è cool. Ils Swiss Music Awards èn relevants. Marcus Petendi è quasi profi da curling e passlung. Elias Tsoutsaios cumpra be nova rauba sch’el basegna quella. Hot takes?

Noms da promis per rumantsch, aventuras olimpicas in Italia, musica tudestga penibla, scams musicals da l’Estonia, rinfatschas da sanaziun chauda en Engiadina Bassa: la glista da temas è lunga, il pod e plain – tgi che n’ha betg ina reservaziun na dastga betg entrar – auter ch’il pievel. Bainvegni!

Il schaner 2026 è per emblidar, èn Marcus ed Elias perina. Perinadad chattan els era tar il tema parfums. Ultra da quai raquinta Marcus sco ch’ins po arcunar datotecas sin utschels ed Elias dat tips sco ch’il linguatg da corp gida en in context professiunal.

Per il 2026 datti in midamaint tar ILS DUS DA NUS. Sporadicamain envidan Marcus ed Elias giasts en il Stu-Ra 2. Simon David Steiner, oriundamain da Lavin, musicist e bun ami da M+E, è l’emprim giast. In giast senza filter, senza cumpromiss ed adina plain mirveglias.

Il chalender d’advent en ina giga-episoda: Quadroni, Clopath, Gamboni, Flepp, Albin, Bundi, Jung, Fanzun, Hunziker, Schurter, Collenberg e Bundi. Cun introducziun, discurs tranteren e facit cumpact. Grazia da cor per tadlar <3 e guardai da vus e voss conumans. M+E out.

Cun l’argumentaziun «Per la scienza!» ha Elias resumà il start da si’emna: In start sexual e medicinal, tant pon ins tradir. Era tradir pon ins ch’i dat in grondius artitgel davart il rumantsch en il New Yorker. Sper quels temas vai per sanadad mentala ed in messagi dil pievel. Grazia per tadlar <3!

Marcus ha inscuntrà «King Justice» tar ina vendita via la plattafurma Ricardo. Ina odissea veritabla. Elias cumbatta per renconuschientscha en chasa RTR, concret tar l’informatica. Spoiler: nagin progress. E lura datti anc temas impurtants da discutar. Tut sco adina sin via directa ord il Stu-Ra 2

L’expert da protecziun da consumentas e consuments Elias è stà involvà en gist trais cas ch’i vala da solver. E Marcus è stà a Manchester per vesair sia band preferida. Rapports detagliads udis en l’episoda. Ed i dat anc in zic context tar il chalender d’advent.

Quai steva scrit sin l’envid dal «cigarette maestro». Na, betg da Marcus Petendi ma d’in um a New York. Ina istorgia ch’è per ILS DUS DA NUS almain uschè ina gronda inspiraziun sco la lavur cun uffants che n’han nagin filter. Ultra da quai: PP cun raubas che seccan tar auters ma betg tar nus sezs.

Far musica cun uffants è «adina puspè spectacular», constatescha Marcus, na betg senza in pau scuidanza, a Sedrun, nua ch’el è cun il Minisguard sin visita. Elias e collià via lingia directa ord il Stu-Ra 2 a Cuira. I dat bitschs senza consens, istorgias cun happy end ed in barat sin distanza.

Avrir la buttiglia, savurar il cucun, emplenir in sierv en in magiel. Savurar, smanar il magiel, savurar puspè, prender in sierv: «ah gie, quai e segir Château Marcus 1992». Attenziun i dat in nov blagun en il pod! Fertant che Elias ha scuvrì Bordeaux ha Marcus scuvri ina nova amur musicala.

Elias n’ha betg be fatg bunas experientschas en sias vacanzas da stad, quai tradescha gia il titel. Marcus percunter ha cumenzà sias vacanzas cun la registraziun dal pod. Il plan per il rest da quellas: rumir stgatlas e ponderar co duvrar ina porta (???) ch’el ha engulà.

Saja quai affars cun intent oriund da producir dronas civilas che furneschan uss dronas armadas u saja quai in podcast famus, che crititgescha ipocrisia tar auters ma ch’è sez lunsch davent d’esser invulnerabel: sch’ils raps constattan midan bleras persunas a l’autra vart. Forza era I2DN?

La chatscha dat da discutar en il podcast: Marcus ed Elias sa giavischan ina debatta pli onesta ed ina rapportaziun pli critica. Pli lucca è la discussiun davart in format fictiv da «Big Brother» rumantsch. Tgi savess entrar en casa e tgi procurass per discussiuns, scandals e lingias grassas?

Il frar il pli giuven è il frar «benjamin» - per Ladinas e Ladins ed era per Marcus ed Elias in novum. Las frisuras da Marcus ed Elias – era in novum. Il lieu da star da Marcus – dito. Nagin novum percunter: esser croccant en il stu-ra 2 per registrar il pod. Bainvegni enavos, nus avain bler da raqu

Line-Up-Bingo - ediziun Zauberwald Lai? Nus giugain. Revoltas a Lausanne? Nus discutain. Sche vus avessas in podcast? Nus tadlassan. E tadlain! Episoda 109 ILS DUS DA NUS? Vus tadlais (spranza). Grazia per esser da la partida. Nus pigliain cumià enfin ils 16.10. A bun ans udir e chars, chars salids.

Tge è ina salata? Be verdura? U valan era tartuffels e pasta? Vala caprese? Ed in caesar salad? Sto la salata esser fraida u po la tratga era esser tievi? Be cun sosa da salata? Tge è la definiziun d’ina sosa da salata? Ed è in hotdog (chaunet chaud lol) atgnamain in sandwich?

Elias è vegnì dasdà a moda grobulana en il tren. Marcus s’agita da la festa da Cuira. En il Stu-Ra 2 datti sco consequenza bler da debattar e raquintar. Tranter auter tge ch’ins fa uss propi sin il natel e tge sin in computer. Chavazzin cudeschar vacanzas e guardar «rüttlers». Ubain tadlar pod?

Marcus vegn discriminà da la birocrazia da las bancas. Elias ha scuvert il Tessin. Ensemen discutan els ultra da quai chaussas, che fan l’impressiun dad esser illegalas (chaminar or da la butia senza cumprar insatge) e chaussas, che stuessan esser illegalas (reservar in parcadi a pe, senza auto).

Il «Post OAL Blues» è real, ils rintgs sut ils egls anc nairs: Marcus ed Elias èn stads en differentas funcziuns a Degen. Tranter backstage, lavur e concerts datti bler da discutar. Ultra da quai: istorgias da ballape, trafic public ed updates dal «pövel». Chars, chars salids.

Sch’ins ha pliras rollas, sco en il cas da Marcus ed Elias, datti magari in mulin da zvic. Tgenin mulin concret che quai è, pertge ch’i dat a Bhutan penis religius sin edifizis e pertge che Elias pensava che la pli auta vischnanca politica en l’Europa è en il Grischun – udis vus en il «pod».

Proverbis rumantschs datti blers (forsa sa regurdais da l’episoda #22 cun il tema proverbis), ma anc betg avunda. Ura e temp per crear novs proverbis rumantschs. Directamain or da la penna da Marcus ed Elias arrivan intginas propostas per variar voss proxims discurs u far impressiun a voss visavi.

Elias è sta cun 33 ons per l’emprima giada a Paris per vesair Robbie Williams. Marcus percunter è sfundrà en infurmaziuns impurtantas davart plazzas da terapia, grazia ad in’auditura fidaivla. Elias e Marcus han era persequità l’EURO. Invistas en quels trais temas datti sin vossas ureglias.

Glindesdi la damaun en il Stu-Ra 2. La vusch è anc fina, il tscharvè plaun. Suenter intginas minutas survegn il discurs dentant schlantsch e sa mova da tricots da segund maun, via chautschas sut spizzalentas enfin a violenza encunter dunnas. In artg magari dramatic dentant sco adina fitg onest.

Tgi avess pensà? 100 episodas I2DN! Cura duai ins chalar? Tgi vul anc tadlar? Dumondas existenzialas e dubis che vegnan spert liquidadas per far lieu al tschantscherlim. Naginas fanfaras, nagina celebraziun. I2DN van enavos a «malochar», enavos en il Stu-Ra 2. Grazia da cor per vossa fiduzia <3

Cun gist duas istorgias dal pievel datti quest’emna in vair artg tematic: Istorgias sturnas e propostas linguisticas vegnan cumplettadas cun trends che fan quitads e tals che fan plaschair, da Marcus che guntgescha a martels e dad Elias che savura da stalla. Ina finiziun degna da l’emprim bloc.

«Sali scheffa! Hoi Boss!». Pertge betg cumenzar in dialog uschia? E pertge betg gist avair in dialog transparent sco ina box da squash? Nua ch’ins na po betg zuppar insatge? Cun quella tenuta discutan I2DN quest’emna raubas che mintga um fa, ma na vul betg conceder. Giu cun las chautschas!

La vita è magari sco in maraton. Per Elias en il vair senn dal pled, dentant be in mez maraton. Marcus percunter cumbatta en il senn figurativ cun ses agen maraton, sias depressiuns. I2DN discutan da parallelas e strategias da cumbat e cumpletteschan il podcast cun la blaga obligatorica.

I2DN van quest’emna tras ils temas sco tras lur «feed» da medias socialas: svelt e senza pausa. Elias è stà en il guaud a ramassar agl d’urs cun la «Chrütergisi». Marcus percunter ha persequità peschs en in livestream. Istorgias analogas e digitalas, messas ensemen sco in matg da fluras primavaunas.

Tge capita sche acts musicals scuflan si shows pli grondas sco ch’i fissan? Pon ins sco DJ far «Shazam» tar auters DJs? Pertge sa numna ozendi mintga segunda chanzun insatge cun «Caroline»? E pon ins manifestar che la primavaira vegn pli sperta? Tut be ina tenuta ed in «mindset», schi va tenor I2DN.

En sasez vulevan Marcus ed Elias far quest’emna in’episoda betg memia lunga. Recapitular las vacanzas, celebrar la primavaira, raquintar istorgias empermessas, il barat usità dal «pod», vus enconuschais u betg? Ma lura è cumparì in SRF «rec.», ch'ha dà da discutar.

Program OAL, istorgias persunalas, in plazzal da fabrica astronomic ed il «Kings Music Room»: ils temas empermettan silmain sin palpiri bler. Causa vacanzas dad Elias betg actuala dentant tant pli persunala ed uss pronta per vus, l’episoda 93.

Tgeninas èn las minutas, che passan sco ina frizza e tgeninas paran da durar eternitads? I2DN discutan. Betg be davart minutas ma era stanzas – quellas da consum, che na vulan para simplamain betg vegnir acceptadas a Cuira. Emplenida vegn l’episoda cun il baterliez usità.

Magari po il podcast esser sco in pingpong tranter Marcus ed Elias. Ping: In tema vegn tractà. Pong: In auter tema vegn tractà. Ping: proxim tema. Pong: gea, precis. Dilemmas filosifics, istorgias da la clinica e politica, che fa mal il chau. Ping Pong Ping Pong Ping Pong.

Suenter be 3 mais èn ils podcasters da passiun Marcus ed Elias da return en il Stu-Ra 2. Marcus dat invistas onestas en il mintgadi da clinica. Elias raquinta da «Karbunkels», da detta tagliada giu e – co ch’el schess – d'in «trashy start en l’onn». Resta be in avertiment da trigger e bun tadlar!

Durant ch'il mund para dad ir davant ils chauns èn I2DN puspè enavos en il Stu-Ra 2. Là nua ch'il mund è anc en urden tegnan ils dus podcasters puspè si la bindera da divertiment per la Rumantschia. LFG

Tgi che taidla l'entira episoda è crazy!

Il podcast da scienza furnescha puspè istorgias or dal mund scientific. Saja quai experiments psicologics u la vesida d’utschels. Era in auditur vegn quest’emna a pled e na l’ultim raquinta Marcus pertge che I2DN chalan quest’onn anticipadamain il podcast. Char pievel, da cor grazia fitg per tadlar!

Elias è stà a Berlin sin tura culinarica e per guardar in concert. Il facit da quel viadi è magari modest, tranter oter pervia da la tenuta speziala da la citad e sias abitantas ed abitants. En il fratemp è Marcus restà a Cuira, la «citad da l’um pitschen». Era da quel temp datti in facit maschadà.

Igl èn temps che fan mal il chau a Marcus ed Elias. Temps nua che umens vegls vegnan puspè al timun da pussanza – u emprovan quai a moda desperada. Saja quai a chaschun da las elecziuns en ils Stadis Unids, sin il palc da televisiun tudestga u per survegnir puspè quella attenziun talmain bramada.

Quant grond è l'univers e quant pitschen ed irrelevant èn I2DN en quel? Ed a propos irrelevant: Marcus ed Elias van a la tschertga dal vegl profil da Twitter/X da Marcus e discutan finanzas. I dat pia in'episoda sco adina: filosofic, actual, autentic e divertent (?). Chars, chars salids.

Co salidassas ti l'emprim marus/l'emprima marusa da tia figlia? Pertge han russas e russ pli baud tadlà vinil sin radiografias? E pertge na datti en «mundart» nagin term adattà per chepi? I2DN, autoproclamads furniturs da respostas, debatteschan puspè davart las grondas dumondas da lumanitad.

«Crash landing» è in term, che descriva il sentiment da depressiun suenter in eveniment u temp bel ed intensiv. In sentiment che Marcus ed Elias partan suenter in settember plain aventuras. Tge che gida dentant adina è in discurs – u in podcast. E quai il meglier cas en il Stu-Ra 2.

Marcus è en Valisa per registrar nova musica ed ha passantà gia sin il viadi aventuras selvadias. Elias ha in «classic pod day». Tge che quai vul dir sa be el, tuna dentant da pauc enfin nagut (el fa tut la lavur). Nus n'essan dentant betg qua per giuditgar, ma per tadlar, u betg char pievel?

Per l'episoda speziala dal podcast è era la redactura Anna Selina Quinter da la partida. Ella è s'occupada dal tema per il radio. A pled vegnan l'expert da schlagher Roger de Win, l'experta da rap Mira Weingart e differentas musicistas e musicists rumantschs.

Questemna datti temas intims. Chavazzin: «OnlyFans». Elias sesa sin la sutga da confessiun e raquinta da pornografia e Marcus ha las istorgias adattadas e picantas ord la vita sco electronist da multimedia. Co e tge ed insumma, sco adina en il pod!

Cüsi e Tsutsi on the pod è la devisa quest'emna, sco sche quai na fiss betg adina la devisa. I va per bitschs en la plievgia, audiofils conspirativs, dates cun interrupziun, duschas tar il binari e betg il davos per la translaziun da «Bierdose». Chars salids a l'UDG.

Marcus ha emprais a moda dramatica: Adina metter davent chaussas, ch'ins na dovra betg pli, cunzunt sch'i va per pertgas. Pertge dramatic? Quai udis en il podcast, nua ch'Elias raquinta pertge ch'el n'è era betg in bun pestgader, almain en in senn figurativ. En quel senn: «Smoocha» la ritscha!

Tge professiuns pudess'ins empruvar per in mais? Pertge èn a Copenhagen tuttas e tuts uschè bels ed han talmain bler stil? E tge èn las experientschas da shopping-profi Petendi sin la plattafurma Temu? I2DN èn sco adina al puls dals temas da vaglia, per che vus na stuais betg sa profundar sez.

La grondepisoda suenter l'Openair Lumnezia. Elias è stà al lieu per lavurar, Marcus ha persequità sin distanza. Ils temas tranter auter: il line up, il consum d'alcohol e las sfidas da lavurar entamez in public ch'è «tilt». Co che quai stat en connex cun come backs e glow ups udis en lepisoda!

Enavos d'in pèr dis liber ha Elias purtà ina nova identitad ch'el preschenta a Marcus. Quel è pauc persvadì e discuta pli gugent prognosas da memes e la vita en sia WG. In barat pli viv sa sviluppa dentant cun discutar differenzas tranter omens e dunnas ed ils pli novs terms per il «dating».

Ils eveniments da l'emna passada paran surreals e s'integreschan en ina retscha d'eveniments sco or d'in siemi da fevra. Er il barat tranter Marcus ed Elias en il Stu-Ra2 sa preschenta sco in siemi stran. Tge è anc real, tge betg e tge èn las consequenzas? E tgi sveglia nus da quest sien massa lung?

«Nap» (nomen, il) in sien curt, cunzunt durant il di. La varianta ultimativa per rechargiar las battarias a moda curta. Quai è dentant dependent dal context: nua, quant lung, tge uras e cun tge sentiment sa cumenz'ins il cupid? Tge èn insumma ils megliers cupids? I2DN han l'expertisa.

Co din ins en autras linguas sch'insatge n'interessescha betg? Nus avain traducziuns e tant pudain nus tradir ordavant: pli pitschen l'interess, pli vulgar il proverbi. Ultra da quai datti puspè discussiuns davart prognosas politicas, generaziuns digitalas e dolurs corporalas. En sasez sco adina.

La reuniun en il StuRa 2 è caracterisada da bleras anecdotas persunalas or da la pausa. Cas genetics spezials ed alternativas per il program da TV da ballape datti gratuit latiers. Tut sco ch'i avess dad esser.

Ils 27.6 vai liber cun il «pod». Schubregiai las ureglias e sajas prontas e pronts per episoda 73!

En l'ultima episoda da quest bloc vai per far radio en il vast segn dal pled: A Bever a chaschun da «RTR sin visita», a Cuira a chaschun dad I2DN ma era a Turitg nua che «Steccamuglio Schawinski» sesa cun sias ideas grischas. Sche live u betg, broadcast u podcast – nus essan qua per vus. xoxo M+E

Udis sco i sufla? Udis il nov schlantsch? U tuna tut sco adina? Speranza betg, Marcus ed Elias han empermess numnadamain da prender il det or dal tgil. Era sche quel det savura anc in zic intensiv, el mussa amunt ed uschè en la dretga direcziun. «Thumbs up» - ILS DUS DA NUS preschentan episoda 71!

Il mix selvadi d'istorgias en quest'episoda fa fadia a Marcus ed Elias. Dad in tema a tschel balbegian ils uschiglio (betg) uschè suverans retorichers senza propi dir insatge cun valur. I dat para da discutar, dentant suenter l'episoda. Ma tgi sa, forza è il verm be tar nus en il chau?

Sco teenager giz na deva nagina via memia cumplitgada per vegnir tar pornografia. Saja quai cun trametter via telefonin, cumprar magazins u perfin cun stampar las ovras per la collecziun privata. Ed uschè ha il podcast cumenzà sco sch'ns avess planisà, i sa tracta tuttina da l'episoda 69 (nice).

Marcus cumenza flaivel cun in tschantscherlim davart Aspirin e siemis. Ma lura survegn il podcast schlantsch cun l'istorgia co ch'il rumantsch daventa internaziunal cun discussiuns davart munds fictivs e na l'ultim grazia a la debatta davart il destin da giats malsauns. «CHECK!»

Quest'emna va il podcast sut la pel ed en ils egls. Marcus ha finalmain puspè ina vista da 100%, grazia ad in'operaziun cun laser ed Elias ha realisà ses chasti – in tattoo da Marcus. Dolur partida è be la mesa dolur? Scuvri en l'episoda 67, frestg or dal furn auditiv.

Il sulegl splendura ed i savura da primavaira en il StuRa 2. Tuttina ha Marcus nauscha luna e na po betg decider tge ch'è la culpa. Sco antidepressivum auditiv fungeschan anecdotas or da l'hotellaria, innovaziuns tecnicas potenzialas u nums creativs per acturas ed acturs da pornos.

Las chommas èn anc deblas, il triceps fa mal ed il sentiment è sco suenter sortida. Ma mentalmain splendura il sulegl: il maraton da skis è dumagnà. Anc in'ultima giada datti da discutar davart quest sport antipatic avant che nus sfundrain puspè pelvair en il «pod». F*** passlung e heja, heja!

Il titel na descriva betg il cuntegn da l'episoda ma in giavisch per il futur da Marcus ed Elias. Cler, ch'i dat puspè da discutar davart il sport il pli pauc cool sin il mund. Dentant datti era quitads da vegliadetgna, patratgs davart conflicts mundials e las observaziuns classicas dal mintgadi.

Forsa èsi las vacanzas, forsa èsi il frust dal passlung. Po er esser che la primavaira dat energia infantila. Ils motivs n'èn betg clers, fatg è dentant che l'episoda è daventada picanta – ma er scharmanta. Atgnamain in bun mix. Ma nus laschain decider Vus. Il pievel ha adina raschun.

Che umens èn buns cun suflar si tscherts numers è enconuschent ed in bun exempel per «Boy Math». Ma tge pomai è quai? La resposta han voss experts d'internet EFZ Marcus ed Elias. E respostas datti speranza era davart la coolness da biadias da Tony Hawk e Kurt Cobain e davart la etiquette en biro.

Marcus ed Elias han dumagnà e purtà il podcast era en il 2024. Gratulesch! Grazia! Co vinavant? Sco enfin uss! 30 giadas datti qua era quest onn ina maschaida da barats reals e fictivs trafilads cun anecdotas, savidas e fantasia. Ils chanuns da viz èn chargiads, giai davos noda!

Bun di, bun onn e chars, chars salids.M+E

Per l'episoda finala da quest onn han ILS DUS DA NUS anc ina giada dà tut e bandunà la zona da confort. Empè da registrar l'episoda sco adina hai dà in'ura live al radio RTR ensemen cun Vus!

Suenter in'emprova cun disturbi funcziuna il podcast almain tar la segunda registraziun. Sche quai è gartegià stuais vus dir, temas avessi dentant era anc dà per anc ina terza emprova. Ed era rubricas: sper duas classicas la premiera uffiziala d'ina nova. Finalmain datti d'udir istorgias da Vus!

Quest'emna datti in'episoda a distanza: Marcus sesa per l'emprima giada sulet en il studio radio 2 ed è l'um als regulaturs, ed Elias è collià via lingia da la redacziun regiunala a Scuol. I dat impressiuns da Scuol, invistas en la preparaziun dal maraton da skis ed il tschantscherlim usità.

Magari ston ins forza far in pass enavos e cumbatter la digitalisaziun per esser pli cuntents. Davent cul smartphone. Sche quai è massa stentus gida forza era da far dapli sport? Co fissi cun in maraton da skis engiadinais? Quella sfida è per I2DN pli realistica sco dar giu il natel.

Sunar la flauta è magari sco online dating. Ins ha savens be success sch'ins è gia interessant senza la flauta u il profil da Tinder. Questa observaziun avain nus fatg displaschaivlamain suenter il podcast, ella mussa dentant che l'artg tematic è era quest'emna fitg tendì.

La vita sco DJ n'è betg simpla, declera Elias. La vita fiss pli simpla sch'ins pudess discurrer cun animals, declera Marcus, e pli agreabla fiss la vita senza musica en il bus, di Jacqueline Badran. Mintgina e mintgin ha pia ses cumbats dal mintgadi e da quels dattan da discutar era ad I2DN.

Tgi avess pensà, ch'i dat dals Beatles nova musica dal 2023? E tgi avess pensà ch'i dat puspè ina visita tar il medi? Nus garantì betg, dentant vuleva il destin che questemna discutain nus musica nova, medis vegls, visitas en il spa e trifla senza gust. Bainvegni en il podcast da bainstar!

Las barrieras sa tiran tras l'episoda sco in fil cotschen. Saja quai barrieras biologicas, che Elias ha experienzà, barrieras linguisticas co che la SBB para da crear u barrieras en il vair senn dal pled che tangheschan Marcus. Naginas barrieras datti dentant per Vus, i vala be da smatgar «play»!

Ina bella surpraisa lantscha lepisoda questemna: in salid da noss probabel pli giuven auditur. Chars, chars salids! Las tractandas che suondan èn pannas tar la BBC, concerts dad auts e publics da bass, las elecziuns federalas, la schelta e dultscharias aschas. In quel segn «Uei Pimpel!».

En in mund plain conflicts ed ina dschungla d'infurmaziuns emprovan Marcus ed Elias da chattar lur moda da navigar. Sin quella via passan ILS DUS DA NUS era tar DJs surpajads, differenzas tranter generaziuns e las ulteriuras piculezzas usualas. Damain sgnoccas e speranza dapli charn a l'oss.

Ils cucuns siglian per 50 episodas baterliez. Sper bunas novas e l'experientscha auditiva datti er in viadi en il mund da savurs (cac per exempel). Cumplettada vegn l'episoda cun il segund meglier ami da l'uman, musica da boxar e concerts elitars. Gizzai e tirai si il nas!

Artitgels en la gasetta, in nov chanal per cuntanscher ILS DUS DA NUS, prenums e nums d'artistas rumantschs; Marcus ed Elias portan bleras novas. E laschan plinavant ora la gritta davart intginas manieras. Tadlai attentamain, i va in culp suenter l'auter! «Barclamieu, betg far tema als uffants!»